الماتى وبلىسى شەتەل نارىعىندا سۇرانىسقا يە ءونىم كولەمىن ارتتىردى. اۋىل شارۋاشىلىعى ونىمدەرىنىڭ ەكسپورتى جىلدان-جىلعا ارتىپ كەلەدى.

بۇل — ءوڭىر اگروسەكتورىنىڭ الەۋەتى ءوسىپ، سىرتقى نارىقتا سۇرانىسقا يە بولا باستاعانىنىڭ كورسەتكىشى.
رەسمي مالىمەتتەرگە سۇيەنسەك، 2022 جىلى وبلىستىڭ اگروونىم ەكسپورتى 249,6 ميلليون اقش دوللارىن قۇرايدى. ال 2024 جىلدىڭ قورىتىندىسى بويىنشا بۇل كورسەتكىش 397,2 ميلليون دوللارعا جەتىپ، 1,5 ەسەدەن استام ۇلعايعان. ياعني نەبارى ەكى جىلدىڭ ىشىندە ەكسپورت كولەمى 147,6 ميلليون دوللارعا ارتقان.

2025 جىلدىڭ العاشقى التى ايىندا شەتەلگە 226,3 ميلليون دوللاردىڭ ءونىمى جونەلتىلدى. بۇل — جىل سوڭىنا دەيىن وتكەن جىلعى كورسەتكىشتەن دە اسىپ ءتۇسۋى مۇمكىن ەكەنىن اڭعارتادى.

ەكسپورت كولەمىنىڭ ۇلعايۋىنا بىرنەشە فاكتور ىقپال ەتتى: ساپالى ءونىم ءوندىرۋ، قايتا وڭدەۋ كاسىپورىندارىنىڭ دامۋى جانە شەتەلدىك نارىقپەن ءتيىمدى بايلانىس ورناتۋ. سونىمەن قاتار، مەملەكەتتىڭ اۋىل شارۋاشىلىعىنا باعىتتالعان قولداۋ باعدارلامالارى دا ءوز اسەرىن تيگىزىپ وتىر.

الماتى وبلىسى بۇگىندە ەت، قۇس ەتى، جەمىس-جيدەك جانە كوكونىس ونىمدەرىن ەكسپورتتاۋدا الدىڭعى قاتارعا شىقتى. ءوڭىردىڭ تابيعي-كليماتتىق جاعدايى مەن ەڭبەكقور شارۋالارى سىرتقى نارىقتا باسەكەگە قابىلەتتى ءونىم وندىرۋگە مۇمكىندىك بەرىپ وتىر.

اگروەكسپورتتىڭ ارتۋى — تەك ەكونوميكالىق پايدا عانا ەمەس، بۇل – اۋىلدا جۇمىس ورىندارىنىڭ كوبەيۋى، فەرمەرلەردىڭ تابىسىنىڭ ارتۋى جانە وڭىرلىك ەكونوميكانىڭ نىعايۋى.

Abai.kz