قازاقستان رەسپۋبليكاسى

پارلامەنتى ءماجىلىسىنىڭ

دەپۋتاتتارى ە.ت. جاڭبىرشين مەن س.ب. مۋساباەۆ مىرزاعا!

قۇرمەتتى ەدىل تەرەكبايۇلى!

قۇرمەتتى سامات بازاربايۇلى!

سىزدەر قاسيەتتى ماڭعىستاۋ وبلىسىنىڭ تۋماسىسىزدار. بۇكىل الاش جۇرتىنىڭ ايبىنى بولعان كەشەگى ماحامبەت پەن يساتايدىڭ ۇرپاعىسىزدار. قازىر ءماجىلىستىڭ ەڭ بىلىكتى، ەڭ بەلسەندى جانە ەڭ ىقپالدى دەپۋتاتىسىزدار. ماجىلىسكە كەلىپ تۇسكەن ءاربىر زاڭ جوباسىنا ىجداعاتپەن قاراپ، وعان ءوز جاندارىڭىزدان وزگەرتۋلەر مەن تولىقتىرۋ ەنگىزۋگە بار كۇشتەرىڭىزدى سالىپ كەلە جاتقاندارىڭىزدى دا جانە وزدەرىڭىز كوتەرىپ شىققان سول وزگەرىستەر مەن تولىقتىرۋلاردى زاڭ جوباسىنا ەنگىزۋگە كەلگەندە، الدىلارىڭىزعا جان سالمايتىندارىڭىزدى دا مەن جاقسى بىلەمىن. جاقسى ءبىلىپ قانا قويماي، ءوز ريزاشىلىعىمدى ۇنەمى ايتىپ تا، جازىپ كەلەمىن. ءتىپتى، سىزدەردى ءماجىلىستىڭ بۇگىنگى ماحامبەتى مەن يساتايى دەپ باعالاعانىمدى دا جاقسى بىلەسىزدەر.

قازاقتا «قانىنا تارتپاعاننىڭ قارى سىنسىن!» دەگەن قارعىس بار.

قۇداي ءتىل مەن كوزدەن ساقتاسىن، قانىنا تارتقان جىگىت بولسا، سىزدەردەي-اق بولسىن!

بۇگىن سول ءماجىلىستىڭ ماحامبەتى مەن يساتايى بولعان سىزدەرگە ارنايى حات جازىپ، ءبىر ماسەلەنىڭ بايىبىن سۇراپ، جاۋابىن ءوز قولدارىڭىزدان العىم كەلدى.

وزدەرىڭىز دە حاباردار بولارسىزدار، وتكەن جىلدان بەرى مەن قازاقستاننىڭ ۋزۋرپاتسيالانعان مەملەكەت ەكەنىن، قاسىم-جومارت توقاەۆتىڭ پرەزيدەنتتىك تاعدىرى سول تيمۋر قۇلىباەۆ پەن كارىم ءماسىموۆ ۋزۋرپاتسيالاپ العان جۇيەگە ءدوپ كەلىپ قالعان پرەزيدەنت ەكەنىن ايتىپ، سول ۋزۋرپاتسياعا اپارىپ سوقتىرعان «قازاقستان رەسپۋبليكاسىنىڭ ۇلتتىق كاسىپكەرلەر پالاتاسى تۋرالى» زاڭىنىڭ كۇشىن جويۋ تۋرالى تىنباي ماسەلە كوتەرىپ كەلەمىن.

وسى ماسەلەگە قاتىستى زاڭداردى اقتارىپ وتىرىپ، ءبىر نورماعا كوزىم ءتۇستى.

ول – «جەر قويناۋى جانە جەر قويناۋىن پايدالانۋ تۋرالى» كودەكستىڭ 28-بابى.

اتالعان باپتىڭ ءبىرىنشى تارماعىندا «كومىرسۋتەكتەر، ۋران ءوندىرۋ جانە پايدالى قاتتى قازبالار سالاسىنداعى ۋاكىلەتتى ورگاندار قازاقستان رەسپۋبليكاسىنىڭ ۇلتتىق كاسىپكەرلەر پالاتاسىمەن جانە جەر قويناۋىن پايدالانۋشىلارمەن ەرىكتى نەگىزدە جاساساتىن جانە جەرگىلىكتى وندىرۋشىلەردى قولداۋعا باعىتتالعان كەلىسىمدەر كاسىپكەرلىكتى ىنتالاندىرۋ تۋرالى كەلىسىم دەپ تۇسىنىلەدى»،-دەپ جازىلىپتى.

كومىرسۋتەكتەر، ۋران ءوندىرۋ جانە پايدالى قاتتى قازبالار سالاسىنداعى ۋاكىلەتتى ورگاندار دەپ وتىرعانى – قازىرگى قر ەنەرگەتيكا مينيسترلىگى، قر ەنەرگەتيكا مينيسترلىگىنىڭ اتومدىق جانە ەنەرگەتيكالىق قاداعالاۋ مەن باقىلاۋ كوميتەتى جانە يندۋستريا جانە قۇرىلىس مينيسترلىگىنىڭ گەولوگيا كوميتەتى بولسا كەرەك.

دەمەك، بۇل – ەلىمىزدىڭ ۇلتتىق بايلىعى بولىپ سانالاتىن كومىرسۋتەكتەر، ۋران ءوندىرۋ جانە پايدالى قاتتى قازبالارعا قاتىستى كەلىسىمدى وسى سالاداعى ۋاكىلەتتى ورگاندار تەك ۇلتتىق كاسىپكەرلەر پالاتاسىمەن عانا جاسايدى دەگەن ءسوز!

بىلايشا ايتقاندا، وسى نورما ارقىلى ەلىمىزدىڭ ۇلتتىق بايلىعى تيمۋر قۇلىباەۆ باسىندا تۇرعان از عانا توپتىڭ باسقارۋىنا، ەنشىسىنە ءوتىپ كەتككەن.

ءبىر قىزىعى بۇل نورما 2021 جىلى 15 قاراشادا قابىلدانىپ، 2022 جىلدىڭ 1 قاڭتارىنان باستاپ قولدانىسقا ەنىپتى.

ءسويتىپ، ەلىمىزدىڭ كومىرسۋتەكتەر، ۋران ءوندىرۋ جانە پايدالى قاتتى قازبالارعا قاتىستى بارلىق شارۋا قازىرگى تاڭدا وسى نورمانىڭ اياسىندا جۇزەگە اسۋدا...

قۇرمەتتى ەدىل تەرەكبايۇلى!

قۇرمەتتى سامات بازاربايۇلى!

بۇل حاتتى ارنايى سىزدەردىڭ اتتارىڭىزعا جازىپ وتىرعان سەبەبىم، وسى نورمانى ءماجىلىستىڭ VII شاقىرىلىمى ماقۇلداپتى.

ءدال سول كەزدە سىزدەر سول VII شاقىرىلىمنىڭ دا دەپۋتاتى بولاتىنسىزدار.

ارينە، بۇل نورمانى تەك ءسىز ەكەۋىڭىز عانا ماقۇلداعان جوقسىزدار. الدىمەن ارنايى جۇمىس توبىندا تالقىلانىپ، سوڭىندا ءماجىلىستىڭ جالپى وتىرىسىندا بەكىتىلگەنى بەلگىلى.

دەمەك، كومىرسۋتەكتەر، ۋران ءوندىرۋ جانە پايدالى قاتتى قازبالار سىندى ەلىمىزدىڭ ۇلتتىق، ستراتەگيالىق بايلىعى تۇگەلىمەن «ۇلتتىق كاسىپكەرلەر پالاتاسى» دەپ اتالاتىن كوممەرتسيالىق ەمەس ۇيىمنىڭ، ناقتىلاپ ايتسام، تيمۋر قۇلىباەۆ باسىندا تۇرعان ازعانتاي توپتىڭ قولىنا ءوتىپ، وسى سالاعا جاۋاپتى ۋاكىلەتتى ورگاندار «قۋىرشاققا» اينالىپ جاتقاندا، ءماجىلىستىڭ ماحامبەتى مەن يساتايى تەكتەس مەنىڭ ەدىل جاڭبىرشين مەن سامات مۋساباەۆ اعام قانداي كۇيدە بولدى ەكەن؟!

اتالارى جاۋدان قايتپاعان جىگىتتەر ەدى عوي، ەكى اعام بۇل نورماعا قارسىلىق تانىتتى ما ەكەن، الدە كوپپەن بىرگە كنوۆكا باسىپ، قولداي سالدى ما ەكەن؟! بۇل – ءبىر!

ەكىنشى، وسى نورمانى قابىلداپ جاتقان ساتتە تيمۋر قۇلىباەۆتىڭ كەسىرىنەن 2011 جىلى وققا ۇشقان، قان جوسا بولىپ سابالعان جاڭاوزەندىك جەرلەستەرى تۋرالى ەكى اعام ءبىر ءسات ويلاندى ما ەكەن؟!

ءۇشىنشى، ەسكى جۇيە قۇلادى. ەندى ەكى اعام وزدەرى قابىلداعان وسى نورماعا «ىقپالدى پارلامەنتتىڭ» ءماجىلىسىنىڭ شىڭىندا تۇرىپ، «قاڭتار» قىرعىنىنان كەيىن قۇرىلىپ جاتقان «جاڭا، ادىلەتتى، تازا قازاقستاننىڭ» كوزىمەن قايتا ءبىر بۇرىلىپ قاراپ كوردى مە ەكەن؟!!

كورسە، نە ويلادى ەكەن؟!!

ءتورتىنشى، بۇل نورمادان قۇتىلۋدىڭ ءبىر-اق جولى بار، ول — «قازاقستان رەسپۋبليكاسىنىڭ ۇلتتىق كاسىپكەرلەر پالاتاسى تۋرالى» زاڭىنىڭ كۇشىن جويۋ!

ەگەر، مەن ۇسىنىس جاساسام، ەكى اعامنىڭ «قازاقستان رەسپۋبليكاسىنىڭ ۇلتتىق كاسىپكەرلەر پالاتاسى تۋرالى» زاڭنىڭ كۇشىن جويۋ تۋرالى ءماجىلىس تورىنەن ماسەلە كوتەرۋگە دارمەندەرى بار ما ەكەن؟!!

قۇرمەتتى ەدىل تەرەكبايۇلى!

قۇرمەتتى سامات بازاربايۇلى!

اتتارىڭىزعا ارنايى حات جازىپ، مەنىڭ سىزدەردەن بىلەيىن دەگەنىم – وسى ەدى.

حات eOtinish ارقىلى جولداندى.

وزدەرىڭىزدەن ناقتى، تۇشىمدى جانە ناتيجەلى جاۋاپ كۇتەمىن!

ەسكەرتۋ: قوسىمشا ەكى ماقالا تىركەلدى.

زور قۇرمەتپەن،

اۋىت مۇقيبەك

Abai.kz