الماتى وبلىسى ماتىبۇلاقتاعى اسكەري بولىمدە 19 جاستاعى سارباز دىنمۇحامەد شىناربەك كوز جۇمدى. قۇرلىق اسكەردىڭ ءباسپاسوز قىزمەتى ساربازدىڭ ءوز-وزىنە قول جۇمساعانىن ايتسا، تۋىستارى كۇمان كەلتىرەدى.

ساربازدىڭ اپكەسى ەڭلىك قالتاەۆانىڭ سوزىنشە، ونىڭ باۋىرى دانيال شىناربەك 2024 جىلى كۇزدە اسكەرگە كەتكەن. كوكتەمدە ونىڭ ارتىنان ەگىز-باۋىرى دىنمۇحامەد شىناربەك تە اسكەرگە اتتانعان.

"ولار اسكەري بورىشىن بىرگە وتەپ جۇرگەن، الايدا اسكەري انت بەرگەننەن كەيىن دىنمۇحامەدتى ماتىبۇلاقتاعى 01098 اسكەري بولىمىنە اۋىستىردى. ەگىزدەردى ايىرۋعا بولماسا دا، ونى باۋىرىنان ايىرعان. ءدال سول جەردە قايعىلى وقيعا بولدى. بۇگىن دىنمۇحامەد شىناربەك وزىنە قول جۇمساعانىن حابارلادى" دەپ جازدى 17 قىركۇيەكتە ساربازدىڭ اپكەسى Instagram جەلىسىندە.

ساربازدىڭ جاقىندارى قايعىدان قان جۇتىپ وتىرعاندارىن، سارباز ءوز-وزىنە قول جۇمساعانىنا سەنە المايتىندىقتارىن دا جەتكىزگەن.

ولار پرەزيدەنت قاسىم-جومارت توقاەۆقا قايىرىلىپ، ساربازدىڭ ولىمىنە قاتىستى ءىستى جەكە باقىلاۋىنا الۋدى وتىنگەن.

"نەگە بەيبىت ۋاقىتتا جاس جىگىتتەر ءولىپ جاتىر؟ بىزگە اقيقات پەن ادىلدىك كەرەك" دەپ جازدى ەڭلىك قالتاەۆا.

قازاقستان قۇرلىق اسكەرىنىڭ ءباسپاسوز قىزمەتى بەيسەنبى كۇنى ساربازدىڭ قازاسىنا قاتىستى حابارلاما تاراتتى. ونىڭ حابارلاماسىن Orda سايتى جاريالادى.

"17 قىركۇيەكتە گۆارديالىق گارنيزوننىڭ اسكەري بولىمدەرىنىڭ بىرىندە جەدەل قىزمەتتىڭ اسكەري قىزمەتكەرى ءوز-وزىنە قول جۇمسادى. قىلمىستىق ءىس قوزعالدى. قۇرلىق اسكەرىنىڭ باس قولباسشىسى ءمان-جايدى انىقتاۋ ءۇشىن ارنايى كوميسسيا جىبەردى" دەپ جازىلعان حابارلامادا.

كەيىنگى كەزدە قازاقستاندا قاتارداعى جاۋىنگەرلەر مەن كۋرسانتتار اراسىندا ءولىم-ءجىتىم مەن سۋيتسيد جيىلەپ بارادى. بۇعان دەيىن قورعانىس مينيسترلىگى كەيىنگى ءۇش جىلدا قازاقستاندا 270 اسكەري قىزمەتكەر قازا بولدى دەپ مالىمدەگەن.

مارقۇمداردىڭ تۋىستارى دا، قوعام دا نەگىزىنەن اسكەر مەن ونىڭ باسشىلارىنا كىنا ارتادى. قاتارداعى جاۋىنگەرلەردىڭ قازاسىنا الىمجەتتىك تە سەبەپ ەكەنى ءجيى ايتىلادى. ال رەسمي اقپاراتقا سايكەس، ولاردىڭ ولىمىنە كوپ جاعدايدا اۋرۋ، جول اپاتى مەن سۋيتسيد سەبەپ بولعان.

بىلتىر اسكەردەگى سارباز ءولىمى جيىلەگەن تۇستا ePetition.kz پورتالىندا مىندەتتى اسكەري قىزمەتتى الىپ تاستاۋ تۋرالى پەتيتسيا جاريالانعان. قازاقستاننىڭ قورعانىس مينيسترلىگى "بۇل باستامانى ەلدىڭ قورعانىس قابىلەتىنە نۇقسان كەلتىرۋ" دەپ اتاپ، "ەلدىڭ قورعانىس ماسەلەسى پەتيتسياعا نەگىز بولا المايدى" دەپ مالىمدەگەن.

Abai.kz