قازاقستاندا نان قىمباتتاي ما؟ ەلدە استىق باعاسى كوتەرىلۋى مۇمكىن بە؟ دەگەن ساۋالدارعا قر اۋىل شارۋاشىلىعى مينيسترلىگى ەگىنشىلىك دەپارتامەنتىنىڭ ديرەكتورى نازگۇل حاتەپوۆا «ءتۇيىن» اقپاراتتىق-تالدامالىق باعدارلاماسىنا بەرگەن سۇحباتىندا جاۋاپ بەردى.

سپيكەردىڭ ايتۋىنشا، قازىر وڭىرلەردە جاڭا تۇسكەن بيدايدىڭ تونناسى 85-90 مىڭ تەڭگەدەن ساتىلىپ جاتىر. بۇل قولايلى باعا، سوندىقتان قىمباتشىلىق كۇتىلمەيدى.

-  ناننىڭ وزىندىك قۇنىنداعى بيدايدىڭ ۇلەسى 50% شاماسىندا. قالعانى ەلەكتر ەنەرگياسى، جانار ماي، جالاقى سەكىلدى بالامالى شىعىندار. بيدايعا كەلەتىن بولساق، ىشكى نارىقتا جاڭا ءونىم بيدايى 85-90 مىڭ تەڭگەدەن ساتىلىپ جاتىر. قايتا وڭدەۋشىلەر ءۇشىن بۇل قىمبات ەمەس، ىڭعايلى باعا. سوندىقتان، قازىر ىشكى نارىقتا وتە كوپ كولەمدە جاڭا ءونىم تۇسكەننەن كەيىن ياعني ۇسىنىستىڭ كوپ بولۋىنا بايلانىستى بيداي باعاسىنىڭ ودان ءارى شارىقتاۋىن كۇتپەيمىز، - دەدى نازگۇل حاتەپوۆا.

بۇگىندە قازاقستان بيدايىن الەمنىڭ 50-گە جۋىق مەملەكەتى ساتىپ الادى. بىلتىر العاش رەت ماروككوعا 60 مىڭ توننا بيداي، ۆەتنامعا العاشقى 15 مىڭ توننا بيداي جونەلتىلدى. سونداي-اق يرانعا 1 ملن توننا ارپا جەتكىزىلدى.

اشم: ەلدە استىق كەپتىرۋ اگرەگاتتارى جەتكىلىكتى

وڭىرلەردە استىق كەپتىرۋ اگرەگاتتارى جەتكىلىكتى. بۇگىندە ەل بويىنشا 3,1 ملن توننا استىق كەپتىرىلىپ, قامباعا قۇيىلعان. ەل بويىنشا 17 ملن توننا استىق باستىرىلدى. نازگۇل حاتەپوۆا «ءتۇيىن» اقپاراتتىق-تالدامالىق باعدارلاماسىنا بەرگەن سۇحباتىندا بۇل جايىندا دا توقتالدى. استىق كەپتىرۋ ءۇشىن 40 مىڭ توننا ارزانداتىلعان ديزەل وتىنى بولىنگەن.

- استىقتى وندىرگەننەن كەيىنگى ەڭ نەگىزگى ماسەلە بۇل استىقتى ساقتاپ قالۋ. ساقتاۋ ءۇشىن كونديتسيالىعىنا جەتكىزىپ ونى كەپتىرۋ كەرەك. ءبىز بۇل ماسەلەنى  اكىمدىكتەرمەن بىرگە ءجىتى باقىلاۋدا ۇستاپ تۇرمىز. قازىر ەل بويىنشا 1172 استىق كەپتىرۋ اگرەگاتى بار. بۇل ءونىمدى تولىققاندى كەپتىرىپ، ودان كەيىن ساقتاۋعا جىبەرۋگە تولىعىمەن جەتكىلىكتى،  - دەدى سپيكەر.

باعدارلامانىڭ تولىق نۇسقاسى:

Abai.kz