مەملەكەت باسشىسى وپەك باس حاتشىسى حايتام ءال-گايستى قابىلدادى. قاسىم-جومارت توقاەۆ پەن حايتام ءال-گايس الەمدىك مۇناي نارىعىنىڭ قازىرگى جاعدايى مەن ىنتىماقتاستىقتىڭ وزەكتى ماسەلەلەرىن تالقىلادى.

مەملەكەت باسشىسى وپەك-ءتىڭ جاھاندىق مۇناي نارىعىنىڭ تۇراقتىلىعىن قامتاماسىز ەتۋگە باعىتتالعان كۇش-جىگەرىن جوعارى باعالادى.

قاسىم-جومارت توقاەۆ حايتام ءال-گايستىڭ ساپارىن ەلىمىز بەن ۇيىم اراسىنداعى كونسترۋكتيۆتى ديالوگتى دامىتۋدا ماڭىزدى قادام رەتىندە قاراستىراتىنىن اتاپ ءوتتى.

پرەزيدەنتتىڭ ايتۋىنشا، قازاقستان ۇلتتىق مۇددەنى قورعاۋعا باسىمدىق بەرە وتىرىپ، مۇناي ءوندىرۋ كولەمىن بىرتىندەپ ۇلعايتۋ جونىندەگى وپەك+ شەشىمىن قولدايدى.

اڭگىمەلەسۋ بارىسىندا وڭىردەگى ەنەرگەتيكالىق جۇيەنىڭ ورنىقتىلىعىن نىعايتۋ باعىتىنداعى بىرلەسكەن شارالار پىسىقتالدى. سونداي-اق مۇناي ءوندىرۋشى ەلدەر مەن كومىرسۋتەگىن يمپورتتاۋشى مەملەكەتتەر اراسىنداعى مۇددەلەر تەڭگەرىمىن ساقتاۋدىڭ ماڭىزىنا ءمان بەرىلدى.

Abai.kz