ءماجىلىس دەپۋتاتى ايدوس سارىم ەلدەگى قۇرىلىس ساياساتى مەن دەموگرافيالىق باعىتتىڭ ءوزارا ۇيلەسپەي وتىرعانىن سىنعا الدى. ونىڭ ايتۋىنشا، قازىرگى تۇرعىن ءۇي قۇرىلىسى حالىقتىڭ شىنايى سۇرانىسىنا ساي ەمەس.

«مەن ارنايى ستاتيستيكانى قارادىم. بۇرىن، 15–20 جىل بۇرىن 2-3 بولمەلى پاتەرلەر باسىم سالىنسا، قازىر قالالاردا سالىنىپ جاتقان ۇيلەردىڭ جارتىسى — 1 جانە 2 بولمەلى پاتەرلەر. سوڭعى ون جىلدا ءبىر بولمەلى پاتەرلەردىڭ ۇلەسى كۇرت ارتقان. ال مۇنداي جاعدايدا كوپبالالى وتباسىلاردىڭ قالاعا كەلىپ، پاتەر الۋ مۇمكىندىگى تومەن»، – دەدى دەپۋتات.

ايدوس سارىمنىڭ پىكىرىنشە، قۇرىلىس كومپانيالارىنا ناقتى باعىت بەرۋ قاجەت:

«مەملەكەت تاراپىنان قالالارعا كوپ بولمەلى پاتەرلەر كوبىرەك كەرەك دەگەن ناقتى سيگنال بولۋى ءتيىس. كومپانيالارعا بەلگىلى ءبىر جەڭىلدىكتەر ۇسىنۋ كەرەك شىعار. ويتكەنى قازىر كوپبالالى وتباسىلاردى قالا شەتىندەگى جەر ۇيلەرگە ىعىستىرىپ، وڭىرلەرگە كوشۋگە ماجبۇرلەپ وتىرمىز. قۇرىلىس ساياساتى دەموگرافيالىق ساياساتپەن قاتار ءجۇرۋى كەرەك»، – دەدى ول.

Abai.kz