ەۋروپالىق وداق ەلدەرىنىڭ وكىلدەرى رەسەيدىڭ گاز جانە مۇناي يمپورتىنا تاۋەلدىلىكتەن بىرتىندەپ باس تارتۋ جونىندەگى جوسپارىن تالقىلاۋعا ارنالعان قۇجات دايىندادى، دەپ حابارلايدى Ulysmedia.kz.

قۇجات 20 قازاندا وتەتىن ەۋرووداقتىڭ ەنەرگەتيكا كەڭەسى وتىرىسىندا قارالادى. كوپتەگەن مۇشە مەملەكەتتەر رەسەيدەن گاز يمپورتىن توقتاتۋ ساياسي ماقساتىن قولداپ وتىر.

كوپ ەلدەر تىيىمدى قولدادى، الايدا بىرقاتارى جەڭىلدەتۋدى ۇسىنعان

كەيبىر مەملەكەتتەر تىيىمدى ورىنداۋ تەتىكتەرىن جەڭىلدەتۋدى ۇسىنعانىمەن، كوپشىلىك بۇعان قارسى شىققان. REPowerEU جوسپارىنىڭ ءماتىنى 15 قازاندا قايتا تالقىلانۋى مۇمكىن، الايدا دەرەككوزدىڭ ايتۋىنشا، قۇجات قوسىمشا تۇزەتۋسىز-اق مينيسترلەر تالقىلاۋىنا جىبەرىلۋى ىقتيمال.

سول كۇنى، 8 قازاندا، Reuters اگەنتتىگى دە ديپلوماتيالىق دەرەككوزدەرگە سىلتەمە جاساپ، ەۋرووداقتىڭ رەسەي مۇنايى مەن گازىنان 2028 جىلعا دەيىن تولىقتاي باس تارتۋ جوسپارى ماقۇلدانعانىن حابارلادى.

2028 جىلعا دەيىن رەسەي ەنەرگورەسۋرستارىنان باس تارتۋ كوزدەلگەن

Reuters دەرەگىنشە، 8 قازاندا وتكەن جابىق ەسىك جاعدايىنداعى كەزدەسۋدە ەلدەردىڭ تۇراقتى وكىلدەرى جوسپاردى مينيسترلەرگە بەكىتۋگە جولداۋ تۋرالى كەلىستى. بۇل شەشىم 20 قازانداعى مينيسترلەر جيىنىندا رەسمي تۇردە ماقۇلدانۋى ءتيىس.

قۇجاتتىڭ قابىلدانۋى ءۇشىن ەو ەلدەرىنىڭ 55 پايىزى، ياعني بىلىكتى كوپشىلىك داۋىس بەرۋى قاجەت. ۆەنگريا مەن سلوۆاكيانىڭ قارسىلىعىنا قاراماستان، باسىم كوپشىلىك ەلدەر باستامانى قولداپ وتىر.

ەو پورتتارىندا گازدىڭ شىعۋ تەگى قاتاڭ تەكسەرىلمەك

ماڭىزدى ماسەلەلەردىڭ ءبىرى – ەۋرووداق پورتتارىنا جەتكىزىلەتىن سۇيىتىلعان تابيعي گازدىڭ (ستگ) شىققان تەگىن انىقتاۋ. ەو رەسەيلىك گازدى ءۇشىنشى ەلدەر ارقىلى اكەلۋگە جول بەرمەۋ ءۇشىن الدىن الا جانە كەدەندىك تەكسەرۋلەردى كۇشەيتپەك.

REPOWEREU جوسپارى بويىنشا مەرزىمدەر

جوسپارعا سايكەس، رەسەي گازىن يمپورتتاۋعا تىيىم سالۋ بىرتىندەپ ەنگىزىلەدى:

• 2026 جىلدىڭ 1 قاڭتارىنان باستاپ – جاڭا كەلىسىمشارتتار بويىنشا;
• 2026 جىلدىڭ 17 ماۋسىمىنان – قىسقا مەرزىمدى كەلىسىمدەر بويىنشا;
• 2028 جىلدىڭ 1 قاڭتارىنان – ۇزاق مەرزىمدى كەلىسىمشارتتار بويىنشا.

سونىمەن قاتار، رەسەي مۇنايىن ءالى يمپورتتاپ وتىرعان ۆەنگريا مەن سلوۆاكيا 2028 جىلعا دەيىن ۇلتتىق باس تارتۋ جوسپارلارىن ازىرلەۋگە مىندەتتەلمەك.

رەسەي ەنەرگورەسۋرستارىنا تاۋەلدىلىك ەدەۋىر تومەندەگەن

قازىرگى تاڭدا رەسەيدەن جەتكىزىلەتىن گاز كولەمى ەو يمپورتىنىڭ 12 پايىزىنا تەڭ. ال 2022 جىلى بۇل كورسەتكىش 45 پايىز بولعان. ساراپشىلاردىڭ پىكىرىنشە، رەسەيدىڭ ەنەرگيا تاسىمالىنا تىيىم سالۋ ماسكەۋدى قارجىلىق تابىستان ايىرىپ، سوعىستى قارجىلاندىرۋ مۇمكىندىگىن ازايتۋعا باعىتتالعان.

Abai.kz