قازاقستان تاريحىنداعى اۋقىمدى اقتاڭداق كەزەڭ – التىن وردا ءداۋىرى. وتاندىق تاريحشىلار ازىرلەپ جاتقان اكادەميالىق باسىلىمنىڭ ءۇشىنشى تومى ءدال وسى كەزەڭگە ارنالعان. بۇگىن رەداكتسيا القاسىنىڭ كەزەكتى وتىرىسىندا الىپ يمپەريا ءداۋىرى قامتىلعان جيناقتىڭ قولجازباسىن بەكىتۋ تۋرالى شەشىم قابىلداندى. ەندىگى مىندەت – باسىپ شىعارۋعا ازىرلەۋ.

وتاندىق تاريح عىلىمىندا التىن وردا تاقىرىبىنىڭ ماڭىزى ەرەكشە. ويتكەنى وتكەن كەڭەستىك كەزەڭدە اتالعان تاقىرىپتى جان-جاقتى زەرتتەۋگە ۇزاق ۋاقىت بويى شەكتەۋ قويىلدى. وكىنىشكە قاراي بۇل جاعداي تاريح عىلىمىنىڭ دامۋىنا كەرى اسەرىن تيگىزدى. عالىمدارىمىز جاڭا تومدى تەك باسپاعا دايىنداپ قانا قويماي، تاريحي ادىلدىكتى دە قالپىنا كەلتىردى.

وزدەرىڭىز بىلەتىندەي، 2022 جىلى مەملەكەت باسشىسىنىڭ باستاماسىمەن جوشى ۇلىسىن زەرتتەۋ عىلىمي ينستيتۋتى قۇرىلدى. كەلەر جىلى ەلىمىزدە التىن وردا مۇراسىن زەردەلەۋگە ارنالعان حالىقارالىق كونفەرەنتسيا وتكىزۋ جوسپارلانىپ وتىر. ەندى، مىنە، قازاقستان تاريحىنىڭ التىن وردا داۋىرىنە ارنالعان جەكە اكادەميالىق تومى بەكىتىلدى. تۇپتەپ كەلگەندە وسىنىڭ ءبارى قازاقستاندا التىن وردانى زەرتتەۋ جونىندە ارنايى عىلىمي-تاريحي مەكتەپ قالىپتاسىپ جاتقانىن ايعاقتايدى.

سونداي-اق رەداكتسيا القاسىنىڭ بۇگىنگى وتىرىسىندا جەتى تومدىق ەڭبەكتىڭ قازاق حاندىعىنا ارنالعان ءتورتىنشى تومىنىڭ مازمۇنىن تالقىلادىق. اۆتورلار ۇجىمنىڭ جەتەكشىسى، تاريح عىلىمدارىنىڭ دوكتورى مەرۋەرت ابۋسەيىتوۆا جانە تومنىڭ ۇيلەستىرۋشىسى، تاريح عىلىمدارىنىڭ دوكتورى زيابەك قابىلدينوۆ بايانداما جاسادى. تاريح عىلىمدارىنىڭ دوكتورى ەركىن ءابىلدىڭ، تاريح عىلىمدارىنىڭ كانديداتى كۇلگازيرا بالتاباەۆانىڭ، «قازاق تاريحي قوعامىنىڭ» باسقارما توراعاسى راديك تەمىرعاليەۆتىڭ رەتسەنزيالارى تىڭدالدى. سونداي-اق رەداكتسيا القاسىنىڭ باسقا دا مۇشەلەرى ءوز وي-پىكىرىن ورتاعا سالدى.

جيىن سوڭىندا رەداكتسيا القاسى ءتورتىنشى تومدى جەتىلدىرۋ جۇمىسىن جالعاستىرۋ جانە كەلەسى وتىرىستا قاراستىرۋ جونىندە شەشىم قابىلدادى.

ەرلان قارين،

قازاقستان رەسپۋبليكاسىنىڭ مەملەكەتتىك كەڭەسشىسى

Abai.kz