مۇنداي رەكورد قىتاي بيزنەسىنىڭ قازاقستانداعى قاتىسۋىن كەڭەيتۋ بويىنشا بەلسەندىلىگىنىڭ كۇشەيۋىمەن تىكەلەي بايلانىستى.  

2025 جىلى 1 قىركۇيەك پەن 1 قازانعا دەيىنگى ارالىقتا قىتاي ازاماتتارى يەلىك ەتەتىن نەمەسە ولاردىڭ قاتىسۋى بار زاڭدى تۇلعالار مەن فيليالدار سانى قازاقستاندا 307-گە ارتىپ، 7,1 مىڭعا جەتتى، دەپ جازادى inbusiness.kz سايتى.

بۇل 3,5 جىلدان استام ۋاقىتتاعى ەڭ جوعارى ايلىق ءوسىم بولىپ سانالادى. قىتايمەن بايلانىسى بار كومپانيالار سانىنىڭ ءوسۋى قاتارىنان 4 اي بويى ۇدەي ءتۇستى.

جالپى العاندا، 100-دەن استام ايلىق ءوسىم شامامەن 1,5 جىل بويى تۇراقتى ساقتالىپ كەلەدى. ەرەكشە جاعداي – 2025 جىلدىڭ قاڭتارى، ول كەزدە ءوسىم +98 بولعان. كورسەتكىشتىڭ قىركۇيەكتە كۇرت ارتۋىنا تولىقتاي شاعىن ۇيىمدار ۇلەس قوسقان سىڭايلى، سەبەبى ءىرى جانە ورتا كاسىپورىندار سانى اي قورىتىندىسىندا وزگەرىسسىز قالدى.

ديناميكادا نەگىزگى ءرولدى 3 سالا اتقاردى: ساۋدا (+123 بىرلىك), وڭدەۋ ونەركاسىبى (+34) جانە وزگە دە قىزمەتتەر (+31). وسى ءۇش باعىت جالپى ءوسىمنىڭ شامامەن ەكى ءۇشىن ءبىرىن قالىپتاستىردى.

قىركۇيەك قورىتىندىسى بويىنشا قىتاي بارلىق ەل ىشىندە ەڭ جوعارى ءوسىم كورسەتكەن مەملەكەت بولدى. تىركەلگەن زاڭدى تۇلعالار مەن فيليالداردىڭ ابسوليۋتتىك ءوسىمى بويىنشا ەكىنشى ورىندا وزبەكستان (+167 بىرلىك).

الايدا سوعان قاراماستان، جالپى رەيتينگتە قىتاي ءۇشىنشى ورىندى، ال 7,4 مىڭ تىركەلگەن زاڭدى تۇلعا نەمەسە فيليالعا يە وزبەكستان ەكىنشى ورىندى ساقتاپ قالدى. كوشباسشى ەل – رەسەي، بىراق ونىڭ كورسەتكىشى تەرىس ناتيجەگە يە بولدى: ءبىر ايدا 22-گە ازايىپ، 23,1 مىڭعا دەيىن تومەندەدى.

"1 قازانعا دەيىن قىتاي قۇرىلتايشىلارى بار 5,3 مىڭ زاڭدى تۇلعا نەمەسە فيليال بەلسەندى جۇمىس ىستەپ تۇرعان، بۇل تىركەلگەندەردىڭ جالپى سانىنىڭ 74%-ىن قۇرايدى. سونىمەن قاتار بەلسەندى ۇيىمدار سانى بويىنشا دا ءوسىم بىردەي بولدى +306", – دەپ مالىمدەدى DATA HUB.

Abai.kz