قر مادەنيەت جانە اقپارات مينيسترلىگى ۇلتتىق كينونى دامىتۋ جانە حالىقارالىق دەڭگەيدە ىلگەرىلەتۋ جۇمىستارىن جالعاستىرۋدا.

وتاندىق تۋىندىلار 300-دەن استام حالىقارالىق كينوفەستيۆالگە قاتىسىپ، 177 جۇلدە يەلەندى. 2020-2025 جىلدار ارالىعىندا ۇلتتىق كينونى قولداۋ مەملەكەتتىك ورتالىعى ءتۇرلى جانرداعى 119 كينوجوبانى جۇزەگە اسىردى.

سوڭعى ەكى جىلدا ءۇش پيتچينگ (كينوجوبانى قارجىلاندىرۋعا نيەتتى ينۆەستورلاردى تارتۋ ماقساتىندا وتكىزىلەتىن ۆيزۋالدى تانىستىرىلىم) وتكىزىلىپ، ونىڭ ناتيجەسىندە 57 جوبانىڭ 40-ى جاس كينەماتوگرافيستەردىڭ قاتىسۋىمەن جۇزەگە اسىرىلۋدا.

2024 جىلى كونكۋرسقا ىرىكتەۋ ەرەجەلەرى قايتا قارالىپ، پروتسەسس اشىق ءارى ءتيىمدى بولدى. باسىم تاقىرىپتار بەلگىلەنىپ، ستسەناري ازىرلەۋ مەرزىمى قىسقاردى. قۇجاتتاردى ەلەكتروندى تۇردە قابىلداۋ ەنگىزىلىپ، ساراپشىلار كەڭەسىنىڭ داۋىس بەرۋ مەحانيزمى جەتىلدىرىلدى. بۇل وزگەرىستەر قازاق تىلىندەگى ستسەناريلەر ۇلەسىن 75%-عا جەتكىزىپ، رەجيسسەرلەردىڭ قاتىسۋىن ارتتىردى.

«Qaitadan» ءفيلمى مەملەكەتتىك قولداۋ الىپ، وتاندىق پروكاتتا 1 ميلليارد تەڭگەدەن استام كاسسا جيناپ، ماڭىزدى جەتىستىككە جەتتى. فيلم مەملەكەتتىك ينۆەستيتسيالاردى بەس ەسە قايتارىپ، مەملەكەتتىك قولداۋ مەحانيزمدەرىنىڭ تيىمدىلىگىن دالەلدەدى.

2025 جىلى جاڭادان تالانتتى اكتەرلەردى (اسىرەسە وڭىرلەردەن) ىزدەۋ جانە قولداۋ ماقساتىندا «JARQYRA» رەسپۋبليكالىق كاستينگى باستالدى. بۇل جوبا ارقىلى جاس ارتىستەر وزدەرىن تانىتىپ، ۇلتتىق كينەماتوگرافياعا قوسىلۋ مۇمكىندىگىنە يە بولدى.

«قازاق كينوسىنىڭ ونكۇندىگى» اكتسياسى اياسىندا وتاندىق فيلمدەردىڭ كورسەتىلىمى قاراعاندى، جامبىل، سولتۇستىك قازاقستان، باتىس قازاقستان جانە جەتىسۋ وبلىستارىندا وتكىزىلدى.

وتاندىق فيلمدەر كورەرمەنگە قولجەتىمدى بولا ءتۇستى. قازىر ولار تەك كينوتەاترلاردا عانا ەمەس، ونلاين پلاتفورمالاردا دا كورسەتىلەدى. «كينوپويسك» پلاتفورماسىمەن بىرلەسىپ، 17 قازاقستاندىق فيلمنەن تۇراتىن ارنايى جيناق دايىندالدى. وعان «پاتريوتتار ۋاقىتى»، «كانيكۋلى off-line 2»، «دوس-مۇقاسان»، «قاجىمۇقان» جانە باسقا دا تۋىندىلار كىرەدى. بۇل شارا قازاقستاندىق كينەماتوگرافيانىڭ تانىمالدىلىعىن ارتتىرۋعا جاڭا مۇمكىندىكتەر اشۋدا.

قازاقستاندىق كينو ونەرى حالىقارالىق دەڭگەيدە تۇراقتى ورىن الا باستادى. سوڭعى 30 جىل ىشىندە العاش رەت ەلىمىز كانن كينوفەستيۆالى اياسىنداعى ءىرى Marché du Film كينونارىعىنا قاتىسىپ، KazakhCinema ۇلتتىق ستەندى ارقىلى وتاندىق جوبالاردى دامىتۋعا ماڭىزدى مۇمكىندىك تۋعىزدى.

كانن قالاسىندا فرانتسيا مەن گرۋزيانىڭ ۇلتتىق كينوورتالىقتارىمەن مەموراندۋمدارعا قول قويىلدى. ال، اقتاۋدا ازەربايجان، قىرعىزستان، تۇركيا، تۇرىكمەنستان جانە وزبەكستاننىڭ كينو ۇيىمدارىمەن ىنتىماقتاستىق تۋرالى كەلىسىمدەر جاسالدى.

حالىقارالىق جوبالار قاتارىندا لوكارنو مەن پۋسان فەستيۆالدەرىندە ۇسىنىلعان «سكازكا و مورسكيح پساح» اتتى دەرەكتى فيلم جانە «پوبەديتەلەي ۆيدنو نا ستارتە» اتتى بىرلەسكەن فيلم بار.

قازاقستاندىق كينو ونەرى جاڭا بەلەستەردى باعىندىرا وتىرىپ، وتاندىق جانە شەتەلدىك كورەرمەنگە سەنىمدى تۇردە جول تابۋدا.

قر مادەنيەت جانە اقپارات مينيسترلىگىنىڭ ءباسپاسوز قىزمەتى

Abai.kz