كەشە قارت كاسپيدىڭ ارعى بەتىنەن بەرگى بەتكە، ارقاداعى استاناعا ءازىربايجان پرەزيدەنتى يلحام اليەۆ ۇشىپ كەلگەن. بۇگىن «اقوردا» رەزيدەنتسياسىندا ازەربايجان پرەزيدەنتىن رەسمي قارسى الۋ ءراسىمى ءوتتى.

سۋرەت: اقوردا تەلەگرام ارناسىنان الىندى.

قاسىم-جومارت توقاەۆ پەن يلحام اليەۆ ءبىر-بىرىنە رەسمي دەلەگاتسيا مۇشەلەرىن تانىستىردى. قۇرمەت قاراۋىلى روتاسىنىڭ باستىعى مەملەكەتتەر باسشىلارىنا راپورت بەردى. بۇدان سوڭ ەكى ەلدىڭ ءانۇراندارى ورىندالدى. ونان ءارى مەملەكەت باسشىلارى كەلىسسوز جۇرگىزدى.

قاسىم-جومارت توقاەۆ:

– ءسىزدى مەملەكەتتىك ساپارىڭىز اياسىندا قازاقستاندا قارسى الۋ – مەن ءۇشىن ۇلكەن مارتەبە. بۇل – ەلدەرىمىزدىڭ اراسىنداعى ستراتەگيالىق سەرىكتەستىك پەن وداقتاستىق قاتىناستاردى ودان ءارى دامىتۋ تۇرعىسىنان وتە ماڭىزدى وقيعا. قازاقستان مەن ازەربايجان تەك دوستاس ەلدەر ەمەس، سونداي-اق باۋىرلاس حالىقتار. سوندىقتان ءسىزدىڭ ەلىڭىزبەن سان قىرلى ىنتىماقتاستىقتى وركەندەتۋگە باسا ءمان بەرەمىز. قازىرگى كەزدە ازەربايجان ءسىزدىڭ قۋاتتى كوشباسشىلىعىڭىزبەن حالىقارالىق ارەناداعى ابىروي-بەدەلىن ەلەۋلى تۇردە ارتتىردى، ءوز وڭىرىندە ىقپالدى مەملەكەت رەتىندە وتە ماڭىزدى ءرول اتقارادى. ءبىز ءۇشىن ازەربايجانمەن ساۋدا-ەكونوميكالىق ىنتىماقتاستىقتى جانە ساياسي سەرىكتەستىكتى نىعايتۋ – اسا وزەكتى مىندەت، – دەدى.

يلحام اليەۆ:

– بۇگىندە قازاقستان دامۋدىڭ جوعارى دەڭگەيىن كورسەتىپ وتىر. ەلىڭىزدەگى قوعامدىق-ساياسي جاعداي تۇراقتى، ەكونوميكالىق دامۋ قالىپتى. ءسىز جۇرگىزىپ جاتقان رەفورمالاردى زور قىزىعۋشىلىقپەن باقىلاپ وتىرمىز. ەلىڭىزدى جاڭعىرتۋ مەن الەۋەتىن ارتتىرۋ جولىنداعى باعدارىڭىزدى تولىق قولدايمىز. ەكىجاقتى قارىم-قاتىناستىڭ ستراتەگيالىق، وداقتاستىق سيپات العانىن اتاپ ءوتتىڭىز. ءبىز بارلىق باعىتتاعى ىقپالداستىقتى نىعايتۋعا نيەتتىمىز. بۇگىنگى كەلىسسوز، سونداي-اق جوعارى مەملەكەتارالىق كەڭەس وتىرىسى بارىسىندا اۋقىمدى كۇن ءتارتىبىن تاعى دا پىسىقتاپ، ءوزارا سەرىكتەستىكتىڭ الداعى قادامدارىن ايقىندايمىز، – دەدى.

سۋرەت: اقوردا تەلەگرام ارناسىنان الىندى.

مەملەكەتتەر باسشىلارى ساۋدا-ەكونوميكا، ينۆەستيتسيا، اۋىل شارۋاشىلىعى جانە كولىك-ترانزيت سالالارىنداعى ىنتىماقتاستىقتى نىعايتۋ ماسەلەسىن جان-جاقتى تالقىلادى. سونداي-اق مادەني-گۋمانيتارلىق ىقپالداستىققا نازار اۋداردى. تاراپتار ايماقتىق جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.

قاسىم-جومارت توقاەۆ پەن يلحام اليەۆكە ورتا ءدالىزدى دامىتۋ جوباسى تانىستىرىلدى. مەملەكەتتەر باسشىلارىنا قازاق-ازەربايجان ماماندارىنىڭ ورتا ءدالىزدى دامىتۋ بويىنشا اتقارىپ جاتقان جۇيەلى جۇمىستارى جونىندە مالىمەت بەرىلدى.

سۋرەت: اقوردا تەلەگرام ارناسىنان الىندى.

قازاقستان پرەزيدەنتىنىڭ كەڭەسشىسى اسەل جاناسوۆا ورتا ءدالىزدى دامىتۋ جوسپارىن تانىستىردى. بۇل – قىتاي مەن ورتالىق ازيا مەملەكەتتەرىن ەۋروپا ەلدەرىمەن بايلانىستىراتىن نەگىزگى كولىك-لوگيستيكالىق باعىت.

قاسىم-جومارت توقاەۆ پەن يلحام اليەۆكە قىتايدان ازەربايجانعا تاسىمال كولەمىنىڭ ۇلعايۋى ورتا ءدالىزدىڭ دامۋىنا تىڭ سەرپىن بەرگەنى جونىندە باياندالدى. بۇگىندە جۇك قىتاي شەكاراسىنان گرۋزيا پورتتارىنا دەيىن 15-18 كۇندە جەتكىزىلەدى. بولجامعا سايكەس، 2030 جىلعا قاراي بۇل باعىتتاعى جۇك اينالىمى ءۇش ەسە ارتۋى مۇمكىن.

مەملەكەتتەر باسشىلارىنا ورتا ءدالىزدىڭ تيىمدىلىگى مەن باسەكەگە قابىلەتتىلىگىن كۇشەيتۋگە، سونداي-اق ەۋرازياداعى ترانزيتتىك ءرولىن نىعايتۋعا باعىتتالعان ناقتى شارالار جانە باستامالار تۋرالى ايتىلدى.

Abai.kz