قازاقستاندا تۇڭعىش رەت تاەكۆوندودان (WT) الەم چەمپيوناتى وتەدى. بۇل تۋرالى شەشىم بۇگىن ۋسي قالاسىندا دۇنيەجۇزىلىك تاەكۆوندو (WT) فەدەراتسياسىنىڭ الەم چەمپيوناتى اياسىنداعى جيىنىندا رەسمي حابارلاندى.

وسىعان دەيىن قازاقستان 2027 جىلعى الەم چەمپيوناتىن وتكىزۋگە ۇمىتكەر ەلدەردىڭ قاتارىنا قوسىلعان بولاتىن. بۇگىنگى جيىن بارىسىندا دۇنيەجۇزىلىك تاەكۆوندو فەدەراتسياسى مەن وعان مۇشە ەلدەردىڭ وكىلدەرى قازاقستاننىڭ كانديداتۋراسىن ءبىراۋىزدان قولدادى.

«قازاقستاندى تاەكۆوندودان الەم چەمپيوناتىن قابىلداۋعا قاۋقارلى ەلمىز دەپ سانايمىن. ءبىز كەز كەلگەن جارىستى جوعارى دارەجەدە، الەمدىك تالاپتارعا ساي قابىلداي الاتىنىمىزدى استانادا وتكەن «Kazakhstan Open» جارىسىندا دالەلدەدىك دەپ ويلايمىن. تامىز ايىندا وتكەن حالىقارالىق جارىسىمىزعا 700-دەن استام سپورتشى قاتىستى. ودان بولەك،  دۇنيەجۇزىلىك تاەكۆوندو فەدەراتسياسىنىڭ پرەزيدەنتى دوكتور چۋنگۆون چوۋ مىرزادان باستاپ، جارىسىمىزعا قوناق بولعان بارلىق وكىل جوعارى باعالادى.

ءبىزدىڭ سپورتشىلارىمىز دا، تورەشىلەرىمىز دە، ماماندارىمىز دا وسى ۋاقىت ارالىعىندا شىڭدالدى جانە الەم چەمپيوناتىن قابىلداۋعا ابدەن دايىن.

2028 جىلعى لوس-اندجەلەستە وتەتىن جازعى وليمپيادا ويىندارى الدىنداعى شەشۋشى ءارى جاۋاپكەرشىلىگى مول الەم چەمپيوناتىن ەلىمىزدە وتكىزۋ ءبىز ءۇشىن ۇلكەن مارتەبە. ەلىمىزدىڭ اتىن دۇنيەجۇزىلىك تاەكۆوندو كارتاسىندا بەلگىلەيتىنىمىزگە قۋانىشتىمىز! بارشا قازاق ەلىن وسىنداي ءسۇيىنشى جاڭالىقپەن قۇتتىقتايمىن. بۇل ءبىزدىڭ جۇمىلا اتقارعان جۇمىسىمىزدىڭ جەمىسىنىڭ ءبىرى»، - دەدى قازاقستاندىق تاەكۆوندو (WT) فەدەراتسياسىنىڭ پرەزيدەنتى كۋدرات شاميەۆ.

وسىلايشا، قازاقستان ورتا ازيادا تاەكۆوندودان (WT) الەم چەمپيوناتىن قابىلدايتىن العاشقى ەل بولىپ تىركەلدى. فەدەراتسيا 2027 جىلعى الەم چەمپيوناتىن استانا قالاسىندا وتكىزۋدى جوسپارلاۋدا.

ايتا كەتەرلىگى، قازىرگى تاڭدا ۋسي قالاسىنا الەمنىڭ 179 ەلىنەن 991 تاەكۆوندوشىسى 2025 جىلعى الەم چەمپيوناتىنا قاتىسۋعا جينالدى. 24-30 قازان ارالىعىندا وتەتىن الەم بىرىنشىلىگىندە ەل نامىسىن 16 تاەكۆوندوشى قورعادى.

قازاقستاندىق تاەكۆوندو (WT) فەدەراتسياسىنىڭ ءباسپاسوز قىزمەتى

Abai.kz