رەسپۋبليكا كۇنى قارساڭىندا شەت اۋدانىنىڭ ساكەن سەيفۋللين اتىنداعى كەنتىنىڭ تۇرعىندارى ۇلكەن قۋانىشقا كەنەلدى – مۇندا «كەلەشەك مەكتەبى» ۇلتتىق جوباسى اياسىندا جاڭا زاماناۋي مەكتەپ ءوز ەسىگىن ايقارا اشتى.300 ورىنعا ارنالعان ءبىلىم ورداسىندا وقۋشىلاردىڭ جان-جاقتى دامۋىنا جانە ساپالى ءبىلىم الۋىنا بارلىق مۇمكىندىك جاسالعان.

(سۋرەت:https://www.gov.kz/)

كەڭ ءارى جارىق كابينەتتەر زاماناۋي، ەرگونوميكالىق جيھازبەن جابدىقتالعان. مۇندا اسحانا، كىتاپحانا، اكت جانە سپورت زالدارى بار.  سونداي-اق STEM-زەرتحانا، جاراتىلىستانۋ-ماتەماتيكالىق باعىتتاعى سىنىپتار، روبوتوتەحنيكا مەن گرافيكالىق ديزاين كابينەتتەرى، ءتۇرلى ۇيىرمەلەرگە ارنالعان ارنايى بولمەلەر جۇمىس ىستەيدى. مەكتەپكە جاساندى ينتەللەكت تەحنولوگياسىمەن جابدىقتالعان 22 ينتەراكتيۆتى تاقتا ورناتىلعان.

ءبىلىم ورداسى قاۋىپسىزدىك تۇرعىسىنان دا زاماناۋي تالاپتارعا ساي. مۇندا پوليتسيامەن تىكەلەي بايلانىس ورناتۋعا ارنالعان دابىل تۇيمەلەرى قويىلعان. ولار بەينەكامەرالارمەن جابدىقتالعان، بۇل توتەنشە جاعدايدا احۋالدى جەدەل انىقتاپ، تەز ارەكەت ەتۋگە مۇمكىندىك بەرەدى.

– قىمباتتى بالالار! بۇگىن سىزدەردىڭ الدارىڭىزدا ۇلكەن مۇمكىندىكتەردىڭ ەسىگى اشىلدى. بۇل مەكتەپ سىزدەردىڭ ارماندارىڭىزدىڭ باستاۋىنا اينالسىن. ىزدەنىمپاز، بىلىمگە قۇشتار، وتانىن سۇيەتىن ۇرپاق بولىپ وسىڭىزدەر. ءبىز ۇستازدار مەن اتا-انالاردىڭ ەڭبەگىن جوعارى باعالايمىز – ول ەلىمىزدىڭ بولاشاعىنىڭ بەرىك ىرگەتاسى. بارشاڭىزدى رەسپۋبليكا كۇنىمەن جانە جاڭا مەكتەپتىڭ اشىلۋىمەن شىن جۇرەكتەن قۇتتىقتايمىن! بۇل ءبىلىم ورداسى وسكەلەڭ ۇرپاقتىڭ ناعىز ءبىلىم مەن تاربيە وشاعىنا اينالسىن، – دەدى سالتاناتتى شارادا ءسوز سويلەگەن وبلىس اكىمى ەرماعانبەت بولەكپاەۆ.

وقۋشىلار جاڭا مەكتەپپەن تانىسىپ، العاشقى ساباقتارىن باستاپ كەتتى.

– وسىنداي جاڭا مەكتەپتە وقۋ مۇمكىندىگى تۋعانىنا وتە قۋانىشتىمىن. ءبىز بۇل ءساتتى ۇزاق كۇتتىك. بارلىق كابينەتتەردى ارالاپ شىقتىق. ماعان اسىرەسە بي سىنىبى قاتتى ۇنادى – تۋرا فيلمدەگىدەي، – دەيدى 9-سىنىپ وقۋشىسى نۇراي ەرمەكوۆا.

– مەكتەپ وتە كەرەمەت. قازىر ءبارىمىز قۋانا ارالاپ ءجۇرمىز. وتە كەڭ، جاڭا كابينەتتەر كوپ ەكەن! اسىرەسە اكت زالى مەن مۋزىكا بولمەسى ەرەكشە ۇنادى، – دەيدى نۇرايدىڭ سىنىپتاستارى.

جاڭا جابدىقتارمەن ۇستازدار دا تانىسىپ جاتىر.

– ءبىزدىڭ ەڭبەك كابينەتى وتە جاقسى جاراقتالعان. مۇندا تەمىر جانە اعاش شەبەرحانالارى، زاماناۋي قۇرال-جابدىقتار مەن پرەزەنتاتسيالار جاساۋعا ارنالعان تسيفرلىق تەحنولوگيالار بار. ەندى وقۋشىلاردىڭ ەڭبەك ساباعىنا دەگەن قىزىعۋشىلىعى بۇرىنعىدان دا ارتادى دەپ سەنەمىن، – دەيدى بەينەلەۋ ونەرى جانە ەڭبەك ءپانىنىڭ مۇعالىمى كومەكباي تۇسىپبەكوۆ. – شىنىمدى ايتسام، مەكتەبىمىزدە وسىنداي زاماناۋي تەحنيكا بولادى دەپ ويلاماپپىن. ەندى ءبىز دە جاڭا تەحنولوگيالاردى مەڭگەرىپ، بالالارعا ۇيرەتەتىن بولامىز.

ءبىلىم سالاسىنىڭ ارداگەرى ايناگۇل تۇسىپبەكوۆا 40 جىل بويى مەكتەپتە ەڭبەك ەتكەن. قازىر ول اتا-انالار كوميتەتىنىڭ ءتورايىمى. ەكى نەمەرەسى وسى جاڭا مەكتەپتە وقيدى. ارداگەردىڭ ايتۋىنشا، جاڭا وقۋ ورداسى ساپالى ءبىلىم الۋعا بارلىق جاعداي جاسايدى.

مەكتەپتىڭ ەرەكشەلىگى – باستاۋىش جانە جوعارى سىنىپتارعا ارنالعان بولەك بلوكتاردىڭ بولۋى.ەرەكشە ءبىلىم بەرۋدى قاجەت ەتەتىن بالالار ءۇشىن دە بارلىق جاعداي قاراستىرىلعان: ءبىرىنشى جانە ەكىنشى قاباتتى بايلانىستىراتىن ليفت ورناتىلعان.

– كەنتىمىزدە وسىنداي زاماناۋي مەكتەپتىڭ اشىلعانىنا ءبارىمىز وتە قۋانىشتىمىز. بۇرىن بۇل – تەك ارمان بولاتىن. ەندى مىنە، مەكتەبىمىز بارلىق زاماناۋي ءبىلىم ستاندارتتارىنا تولىق سايكەس كەلەدى. اسىرەسە باستاۋىش سىنىپتارعا ارنالعان كابينەتتەر وتە ىڭعايلى، – دەيدى ساكەن سەيفۋللين اتىنداعى تىرەك مەكتەبىنىڭ (رەسۋرستىق ورتالىقتىڭ) ديرەكتورى الما ابەۋوۆا. – پەداگوگيكالىق قۇرام تولىق جاساقتالعان.

مەكتەپ اۋماعى دا اباتتاندىرىلعان: فۋتبول، ۆولەيبول، باسكەتبول جانە حوككەي الاڭدارى، سونداي-اق ۆوركاۋت ايماعى بار. اۋىلدىق جەرلەردەگى ءبىلىم بەرۋ نىساندارىن جاڭعىرتۋ باعدارلاماسى جۇيەلى تۇردە جالعاسۋدا.  شەت اۋدانىنىڭ اقسك-ايۋلى اۋىلىندا دا «كەلەشەك مەكتەبى» جوباسى بويىنشا جاڭا مەكتەپتىڭ قۇرىلىسى ءجۇرىپ جاتىر. سوڭعى ەكى جىلدا قاراعاندى وبلىسىندا جەتى جاڭا مەكتەپ سالىندى، ونىڭ تورتەۋى ءدال وسى باعدارلاما اياسىندا ىسكە اسىرىلعان.

Abai.kz