جەتىسۋ وبلىسى الاكول اۋدانى دوستىق اۋىلىندا «كەلەشەك مەكتەبى» ۇلتتىق جوباسىمەن زاماناۋي جاڭا مەكتەپ سالىنىپ، پايدالانۋعا بەرىلدى. التى ءجۇز ورىنعا ارنالعان بۇل ءبىلىم مەكەمەسى اتالعان جوبا اياسىندا تۇرعىزىلعان وبلىستاعى ەكىنشى مەكتەپ. بۇعان دەيىن وسىنداي 1200 ورىندىق پانفيلوۆ اۋدانىنىڭ جاركەنت قالاسىندا اشىلعان بولاتىن.

(سۋرەت:https://www.gov.kz/)

جاڭا مەكتەپتىڭ اشىلۋىنا ارنايى بارعان وبلىس اكىمىنىڭ ورىنباسارى دياس ەسداۋلەتوۆ اۋىل تۇرعىندارىن قۋانىشتارىمەن قۇتتىقتادى:

- رەسپۋبليكالىق تامىز كونفەرەنتسياسىندا پرەزيدەنتىمىز قالا مەن اۋىل مەكتەپتەرىندەگى ءبىلىم بەرۋ دەڭگەيىن تەڭەستىرۋ مىندەتىن قويعان بولاتىن. سوعان سايكەس وبلىستا اسىرەسە اۋىلدىق جەرلەردەگى ءبىلىم سالاسىنىڭ ينفراقۇرىلىمىن جاقسارتۋعا كوپ كوڭىل ءبولىنىپ كەلەدى. جىل سايىن مەكتەپتەردىڭ ماتەريالدىق-تەحنيكالىق بازاسىن نىعاتۋعا دا ەرەكشە نازار اۋدارىلادى. «كەلەشەك مەكتەبى» جوباسىنىڭ دا نەگىزگى ماقساتى وسى، - دەگەن دياس ەسداۋلەتوۆ وقۋشىلارعا وقۋدا تابىس، مەكتەپ ۇجىمىنىڭ ەڭبەكتەرىنە جەمىس تىلەپ، مەكتەپكە اۆتوبۋس كولىگىنىڭ كىلتىن تاپسىردى.

سول سياقتى «Samruk-Kazyna Construction» اق  ۇلتتىق جوبانى ىسكە اسىرۋ جانە وڭىرلىك دامۋ جونىندەگى قۇرىلىس دەپارتامەنتىنىڭ ديرەكتورى قايرات وتەگەنوۆ تىلەگىن ءبىلدىردى. مۇنان سوڭ «VentKarkara service» قۇرىلىس كومپانياسىنىڭ ديرەكتورى ەركىن احمەتجانوۆ مەكتەپ ديرەكتورى ايناگۇل ساديەۆاعا مەكتەپتىڭ سيمۆولدىق كىلتىن ۇسىندى.

وسىدان كەيىن قوناقتار، جالپى جينالعان قاۋىم مەكتەپتىڭ ءىشىن ارالاپ كوردى. بۇل جاڭا مەكتەپ تالاپقا ساي جابدىقتالعان، مۇندا وقۋشىلاردىڭ جان-جاقتى دامۋىنا بارلىق جاعداي جاسالعان. جاڭا ءپان كابينەتتەرى، روبوتوتەحنيكا، لينگۆيستيكا كابينەتتەرى، STEM زەرتحاناسى، كىتاپحانا، شەبەرحانا، حورەوگرافيا زالى، اسحانا جانە باسقا دا قاجەتتى سىنىپتار مەن زالدار قاراستىرىلعان. مەكتەپتە 59 مۇعالىم جۇمىس ىستەيدى. سولاردىڭ ىشىندە جاڭادان وقۋ ءبىتىرىپ كەلگەن جاس ماماندار دا بار.

- مەن مەكتەپتى وسى دوستىق اۋىلىنان وقىپ بىتىرگەنمىن. جوعارى وقۋ ورنىن ءتامامداپ، جاس مامان رەتىندە ءوز اۋىلىما ەڭبەگىمدى سىڭىرۋگە كەلىپ وتىرمىن. قازاق ءتىلى مەن ادەبيەتى ءپانىنىڭ مۇعالىمىمىن. العاشقى ەڭبەك جولىمدى وسىنداي «كەلەشەك مەكتەبىنەن» باستاۋ – مەن ءۇشىن مارتەبە. كورسەتىلىپ جاتقان ادىستەمەلىك كومەكتەر، قولدانۋعا ىڭعايلى ينفوقۇرىلىمدىق تەحنولوگيالار جاس ماماندارعا ۇلكەن قولداۋ بولادى دەپ ويلايمىن، - دەيدى گۇلنۇر ابىلايحانوۆا.

اتا-انالار قاۋىمى دا جاڭا مەكتەپتىڭ سالىنعانىنا ءدان رازى.

- بۇگىن بارشامىز ءۇشىن ەرەكشە قۋانىشتى كۇن. شالعاي ورنالاسقان دوستىق اۋىلىندا ءبىلىم مەن تاربيەنىڭ جاڭا ورداسى اشىلىپ وتىر. اتا-انالار قاۋىمى دا، بالالارىمىز دا وسى كۇندى اسىعا كۇتتىك. اتىنا زاتى ساي زاماناۋي تەحنيكامەن  جابدىقتالعان وسىنداي مەكتەپتە وقۋ - ءبىزدىڭ بالالارىمىز ءۇشىن كەرەمەت مۇمكىندىك. ساپالى ءبىلىم الىپ قانا قويماي مۇندا ءتۇرلى ۇيىرمەلەرگە قاتىسىپ، جان-جاقتى دامۋلارىنا بارلىق جاعداي جاسالعانى ءبىزدى قاتتى قۋانتتى. ەندى تەك قانا جاقسى وقىپ، الاڭسىز ءبىلىم الۋىن اتا-انا رەتىندە قاداعالاپ، مۇعالىمدەرمەن قويان-قولتىق جۇمىس ىستەيمىز، - دەيدى جادىرا مۇجىباەۆا.

جالپى جەتىسۋ وبلىسىندا بۇگىنگى كۇنى وبلىستا 6 مەكتەپتىڭ قۇرىلىسى جۇرگىزىلۋدە، سونىڭ 3-ەۋى بيىل قولدانىسقا بەرىلەدى.

Abai.kz