ناتو باس حاتشىسى مارك ريۋتتە قاراشانىڭ باسىندا بۋحارەستتە (رۋمىنيادا) وتكەن ناتو فورۋمىندا رەسەي جاقىن بولاشاقتا ەۋروپا مەن الەمدە تۇراقسىزدىق تۋعىزاتىن فاكتور بولىپ قالا بەرەتىنىن مالىمدەدى.

ريۋتتە بۇل تۋرالى بۋحارەستتە وتكەن «ناتو-ونەركاسىپ» فورۋمىندا ۋكراينادا جالعاسىپ جاتقان سوعىسقا بايلانىستى سوزىندە ايتتى.

«ناتو-ونەركاسىپ فورۋمى» ونەركاسىپتىك سەرىكتەستەردىڭ ناتو-نىڭ قورعانىس ينۆەستيتسيالارى مەن وندىرىستىك ماقساتتارىنا قالاي قولداۋ كورسەتە الاتىنىن باستى نازارعا الىپ، ناتو مەن ونەركاسىپ اراسىنداعى ديالوگتى نىعايتۋعا باعىتتالعان. بيىلعى فورۋمعا ناتو-نىڭ 26 مۇشەسىمەن سەرىكتەس ەلدەرىنەن 800-دەن استام وكىل، سونداي-اق قورعانىس ونەركاسىبىنىڭ 300-دەن استام كومپانياسى قاتىسقان.

قاۋىپسىزدىك ماسەلەلەرىنە قاتىستى ريۋتتە تۇراقتى قاۋىپپەن كۇرەسۋ ءۇشىن وزىق تەحنولوگيا مەن اتىس كۇشى قاجەت ەكەنىن اتاپ وتتەن ول: «ناتو ناقتى جانە تۇراقتى قاۋىپ-قاتەرگە تاپ بولىپ وتىر، رەسەيدىڭ ۋكرايناداعى سەبەپسىز سوعىسى وعان ەڭ جارقىن مىسال. بىراق رەسەيدەن كەلەتىن قاۋىپ وسى سوعىستىڭ توقتاۋىمەن اياقتالمايدى. جاقىن بولاشاقتا رەسەي ەۋروپادا جانە الەمدە دەسترۋكتيۆتى كۇش بولىپ قالا بەرەدى»، - دەدى.

رۋمىنيا پرەزيدەنتى نيكۋچور دان: «بەيبىتشىلىك پەن قاۋىپسىزدىك ەشقاشان تەگىن بەرىلمەيدى. قايتا قارۋلانۋ – بۇل وپتسيا ەمەس، قاجەتتىلىك. ءبىز ءوزىمىزدى قورعاۋ ءۇشىن كوبىرەك ارەكەت ەتۋىمىز كەرەك»، -دەدى. ول بىلاي دەپ قوستى: «رەسەيدىڭ ۋكراينادان تىس جەرلەردەگى اگرەسسيۆتى ارەكەتتەرى جاقىندا وداقتاستاردىڭ اۋە كەڭىستىگىن بۇزۋعا جانە گيبريدتى شابۋىلدارعا ۇلاستى. ءبىز رۋمىنيانىڭ ۇلتتىق، ەۋروپالىق جانە ترانساتلانتيكالىق قورعانىس ونەركاسىبىن نىعايتۋىمىز كەرەك»، - دەدى.

سوڭعى ايلاردا ناتو اۋە كەڭىستىگىنە ۇشقىشسىز ۇشاقتاردىڭ كوپتەپ كىرۋىنە بايلانىستى ناتو مۇشەلەرى پولشا مەن رۋمىنيا رەسەيلىك ۇشقىشسىز ۇشاقتاردان قورعانىس ءۇشىن جاڭا قارۋ جۇيەسىن ورنالاستىرا باستادى. «Merops» دەپ اتالاتىن اقش-تا جاسالعان بۇل جۇيە ورتاشا ولشەمدى جۇك كولىگىنىڭ توسەگىنە سىياتىنداي شاعىن. ول درونداردى انىقتاپ، ولارعا جاقىنداي الادى جانە سپۋتنيكتىك جانە ەلەكتروندى بايلانىس كەدەرگىگە تاپ بولعاندا ناۆيگاتسيا ءۇشىن جاساندى ينتەللەكت پايدالانادى.

ناتو اسكەري شەنەۋنىكتەرىنىڭ «Associated Press» اگەنتتىگىنە حابارلاۋىنشا، بۇل جۇيەنى پولشا مەن رۋمىنيادان باسقا دانيا دا پايدالانادى. بۇل ناتو-نىڭ رەسەيمەن شەكارا قورعانىسىن قامتاماسىز ەتۋ، قورعانىسىن قۇشەيتۋ ارەكەتىنىڭ ءبىر بولىگى. جاڭا قورعانىس جۇيەسى سولتۇستىكتەگى نورۆەگيادان وڭتۇستىگىندەگى تۇركياعا دەيىنگى، سونداي-اق شىعىس قاناتىنداعى ەلدەرگە رەسەي اسكەرىنىڭ باسا-كوكتەپ كىرۋىنە توسقاۋىل قويادى.

Abai.kz