الەۋمەتتىك جەلىدە وسى تۇرىسبەك مالدىباەۆ دەگەن قىرعىز شالدىڭ «وتىرىك تاريحتارىنىڭ» ءۇزىلدى-كەسىلدى قيىندىلارى ءجيى شىعىپ كەتتى. قاراساق، 2 ساعاتتىق سۇحبات ەكەن.

جاسى جەتپىسكە تاياعان بۇل قىرعىز تاريحشى مالدىباەۆ: «وزەكتەن شىققان ءورت جامان، ىشىڭنەن شىققان جاۋ جامان» دەگەن ماقالدى ءسوزمىسال ەتىپ، ۇيعىردى، قازاقتى جانە وزبەكتى قىرعىز جاساۋعا تىرىسۋدىڭ بارىپ تۇرعان باسبۇزارلىعىن جاسايدى.

«ورتالىق ازياداعى جالعىز ۇستەم ۇلت – قىرعىزدار. قالعاندارى بىزدەن ءوربىپ-وسكەن. قازاق پەن وزبەكتى قىرعىزدان ءبولىنىپ شىققان ۇلتتار»، - دەيدى.

ونان ءارى: «بالاسى اكەسىنىڭ بەتىنەن العان تىرلىكتى قازاقتار بىزگە جاساپ كەلەدى»، - دەپ، زار قاعادى. ورتالىق ازيانى تولىق «قىرعىزداندىرعان» تۇرەكەڭ، قۇلاشىن الىسقا سىلتەپ، ەۋروپاداعى قىرعىزداردى «تۇركى» اتاندىرادى.

سوسىن: «قازاق پەن وزبەكتىڭ تازىسى دەگەنىمىز – بۇل ءبىزدىڭ تايعان»، - دەپ ءتىپتى، يت ەكەش ءيتتى دە اتالعان قوس حالىقتان قىزعانعانىنا نە دەرسىز؟!

ءبىر ۋاقتا: «تۇركىستاندى بىزدەن ءبولىپ، ءتورت قىرعىز رەسپۋبليكاسى بولىپ قالعانبىز. ءبىرىنشى قىرعىز اسر – بۇل قازىرگى قازاقستان»، - دەپ جالعاستىرادى.

قىسقاسى وسىنداي بىلشىل...

تۇركى بىرىلىگىنە سىنا قاعىپ، تۋىس حالىقتاردى ءبىر-بىرىنە قارسى قويۋشىلىق سوڭعى 20 جىلدا قىرعىز اعايىندار اراسىندا ورشەلەنە بەلەڭ الىپ، ساياسات پەن تاريحقا قاتىستى ەكى اراعا ىرىتكى سالۋشىلىق تەندەنتسياعا اينالىپ كەلەدى. وكىنىشتى بولسا دا، بۇل شىندىق...

وسى ورايدا ەسىمىزگە «وزبەك – ءوز اعام، سارت – ساداعام» دەگەن ماقالدىڭ ءۇشىنشى ياعني، بىزدەن جاسىرىن «قىرعىز – قايمانام» تارماعى ويعا ورالادى.

اتالعان عىلىمسىماقتىڭ ەكى ساعاتقا جۋىق وتتاۋبايى قىرعىزداردىڭ قۇلاعىنا جاعاتىن شىعار، بىراق قازاق پەن وزبەكتىڭ شىن زيالىلارى مەن تاريحشىلارى مۇنداي قيسىنسىزعا ساۋاتتى جاۋاپ قاتارى انىق.

وكىنىشتىسى سول – قىرعىز اعايىندار اراسىندا وسىنداي تاريحشىسىماقتاردىڭ «اق دەگەنى العىس، قارا دەگەنى قارعىس» بولىپ تۇر، قازىر. ولاردىڭ ەڭ ءىرىسى – قازاقتىڭ سوڭعى حانى – كەنەسارىعا ءتىل تيگىزىپ: «قىرعىزعا شاپقان كەنەسارى لايىقتى جاۋابىن الدى»، - دەگەن پرەزيدەنت سادىر جاپاروۆ بولىپ تۇر!

Abai.kz