اۋىل ەجەلدەن-اق حالقىمىزدىڭ ۇيىتقىسى، ىرىستىڭ باستاۋى بولىپ سانالادى. قازاقتىڭ قاسيەتتى قۇت مەكەنى – اۋىلدىڭ قازىرگى جاعدايى ايتپاسا دا تۇسىنىكتى. ونسىز دا سانى جىل سايىن ازايىپ جاتقان اۋىلدارىمىز قاڭىراپ قالماسىن دەسەك اۋىل شارۋاشىلىعىنىڭ دامۋىنا باسا كوڭىل ءبولۋىمىز قاجەت. اۋىل جاعدايى قۇلدىراسا قازاقتىڭ دا جاعدايى مۇشكىل بولماق. 

بۇگىن اۋىل شارۋاشىلىعى ەڭبەككەرلەرىنىڭ ەكىنشى فورۋمى ءوتتى. وعان مەملەكەت باسشىسى قاسىم-جومارت توقاەۆ قاتىستى.

ءداستۇرلى جيىنعا 2 مىڭنان استام ادام، سونىڭ ىشىندە اۋىل شارۋاشىلىعى ءونىمىن وندىرۋشىلەر، سالالىق قاۋىمداستىقتار مەن حالىقارالىق ۇيىمدار وكىلدەرى، ينۆەستورلار، ارداگەرلەر، سونداي-اق اگرارلىق سالا ماماندىقتارىندا وقىپ جاتقان ستۋدەنتتەر جينالدى.

پرەزيدەنت اتالعان جيىندا قانداي ماسەلەلەرگە توقتالدى؟ قاراڭىز:

ناقتى ناتيجە: 27 ملن توننا استىق جينالدى!

پرەزيدەنت: «اۋىل شارۋاشىلىعى ءاردايىم مەملەكەت نازارىندا. پرەزيدەنت رەتىندە مەن وسى سالانىڭ قارقىندى دامۋىنا ەرەكشە ءمان بەرەمىن. حالقىمىز «ەگىن ەكسە – ەل توق» دەپ بەكەر ايتپاعان. بىلتىر ءبىز مول استىق الىپ، سوڭعى ون جىلداعى رەكوردتىق كورسەتكىشكە قول جەتكىزدىك. بيىل دا كۇزگى جيىن-تەرىن بەرەكەلى بولدى. ديقاندارىمىز 27 ميلليون توننا استىق جينادى. ءار ايماق ەل قامباسىنا مول ۇلەس قوستى. سونىڭ ىشىندە اقمولا وبلىسى ەڭ جوعارى كورسەتكىشكە (7,5 ميلليون توننا) يە بولدى. قىركۇيەك ايىندا ەگىن وراعىنىڭ بارىسىن كورۋ ءۇشىن وبلىسقا ارنايى بارعانىمدى بىلەسىزدەر», - دەدى.

مەملەكەت باسشىسى سوڭعى ون جىلدا ەلىمىزدە اۋىل شارۋاشىلىق سەكتورىنىڭ ءوسىمى 2,5 ەسەدەن اسقانىن ايتتى.

«قازىر حالقىمىزدىڭ 37 پايىزى، ياعني 7,5 ميلليون ادام اۋىلدا تۇرادى. اۋىل – حالقىمىزدىڭ تامىرى، رۋحاني قازىعى. بۇرىن سولاي بولعان، بولاشاقتا دا سولاي بولىپ قالا بەرمەك. تۇپتەپ كەلگەندە، اۋىل شارۋاشىلىعىن دامىتۋ ماسەلەسىنە جالپى اۋىل-ايماقتاردى، ياعني بۇكىل ەلدى دامىتۋ دەپ قاراعان ءجون. وسى باعىتتا ءبىز سوڭعى جىلدارى اۋقىمدى رەفورمالار جۇرگىزىپ جاتىرمىز. ەلىمىزدىڭ نەگىزگى كورسەتكىشتەرى تۇراقتى. بيىلعى ون ايدا ەكونوميكامىز 6,4 پايىزعا ءوستى. سونىڭ ىشىندە اۋىل شارۋاشىلىعى دا قارقىندى دامۋدا. جىل باسىنان بەرى وسى سالاداعى نەگىزگى كاپيتالعا سالىنعان ينۆەستيتسيا 20 پايىزدان استام ءوسىپ، 790 ميلليارد تەڭگەگە جەتتى. ال ەڭبەك ونىمدىلىگى ءۇش جىلدا 37,3 پايىزعا ارتتى. قازاقستان جاھاندىق ازىق-تۇلىك قاۋىپسىزدىگى رەيتينگى بويىنشا (Global Food Security Index) 32-ءشى ورىندا تۇر. بۇل – جاقسى كورسەتكىش. بىراق بۇل ءماز بولىپ، قول قۋسىرىپ وتىرۋعا بولادى دەگەن ءسوز ەمەس. سەبەبى اشىعىن ايتۋىمىز كەرەك، ءبىز اۋىل شارۋاشىلىعىنىڭ وراسان زور الەۋەتىن ءالى دە تولىق قولدانباي وتىرمىز. ەلىمىز جايىلىمدىق جەر اۋماعى بويىنشا الەمدە 6-شى ورىن الادى. ال ەگىس القابى بويىنشا 8-ءشى ورىندا تۇر. دەمەك قولىمىزدا قاجەتتى رەسۋرس بار، تەك سونى ءتيىمدى پايدالانۋىمىز قاجەت. سوڭعى ون جىلدا اۋىل شارۋاشىلىعىنىڭ جالپى ءونىمى 2,5 ەسەدەن استام ءوستى، ياعني 3,3 تريلليون تەڭگەدەن 8,3 تريلليون تەڭگەگە دەيىن كوبەيدى. 2030 جىلعا دەيىن بۇل كورسەتكىشتى تاعى 2 ەسە ارتتىرۋىمىز كەرەك. بۇل – ءبىزدىڭ قولىمىزدان كەلەتىن شارۋا. ۇلتتىق دامۋ جوسپارىمىز بار، ماقسات-مىندەتتەرىمىز دە – ايقىن. بىزگە كەرەگى – ساپالى جۇمىس پەن ناقتى ناتيجە. سول سەبەپتى الدىمەن اۋىل شارۋاشىلىعىن دامىتۋ ءۇشىن ەرەكشە نازار اۋداراتىن وزەكتى ماسەلەلەرگە توقتالىپ وتكىم كەلەدى», - دەدى توقاەۆ.

ونان سوڭ مەملەكەت باسشىسى مال شارۋاشىلىعىن دامىتۋ ماسەلەلەرىنە توقتالىپ، ەندى مال شارۋاشىلىعىنا باسا ءمان بەرىلەتىنىن اتاپ ايتتى.

ەندى مال شارۋاشىلىعىنا باسا ءمان بەرىلەدى!

«ءبىز بۇعان دەيىن ەگىن شارۋاشىلىعىن دامىتۋ باعىتىندا ءبىراز جۇمىس جۇرگىزدىك، جاقسى ناتيجەگە قول جەتكىزدىك. ەندى مال شارۋاشىلىعىنا باسا ءمان بەرۋىمىز كەرەك. بايتاق دالامىزدىڭ بارلىق ايماعىندا جىل ون ەكى اي بويى مال باعۋعا بولادى. وسى مۇمكىندىكتى دۇرىس پايدالانۋ قاجەت. ارينە، مالدى باعىپ، ءوسىرۋ، ونىڭ سانىن كوبەيتۋ – وڭاي شارۋا ەمەس، وتە كۇردەلى جۇمىس. مەملەكەت ءتيىستى قولداۋ كورسەتەدى. قازىر ناقتى قارجىلاندىرۋ تەتىكتەرى بار: جايىلىمداردى سۋمەن قامتاماسىز ەتۋگە، مال بورداقىلايتىن ورىن سالۋعا جانە اسىل تۇقىمدى مال الۋعا مەملەكەتتەن سۋبسيديا بەرىلىپ جاتىر. بىلتىردىڭ وزىندە وسى ماقساتقا 60 ميلليارد تەڭگەدەن استام قارجى ءبولىندى. سونداي-اق شارۋاشىلىعىن كەڭەيتەم دەگەن كاسىپ يەلەرىنە جەڭىلدىكپەن نەسيە الۋعا مۇمكىندىك بار. جولداۋدا مال شارۋاشىلىعى سالاسىنداعى اگروبيزنەستى قولداۋ جوسپارىن ازىرلەۋدى تاپسىردىم. ماقسات – مال باسىن ەسەلەۋ. سول ارقىلى قازاقستاننىڭ حالىقارالىق نارىققا ەت جەتكىزۋشى ءىرى ەل رەتىندەگى مارتەبەسىن بەكىتە الامىز. بۇل مۇراتقا جەتۋ ءۇشىن مال شارۋاشىلىعىن دامىتۋعا وڭتايلى جاعداي جاساۋ قاجەت. ەت باعىتىنداعى مال شارۋاشىلىعىنىڭ جۇيەلى وندىرىستىك تسيكلىن ەنگىزۋ جۇمىستارىن جالعاستىرعان ءجون. جايىلىمدىق جەرلەردى ءتيىمدى ءارى اۋىستىرىپ پايدالانۋ تاسىلىنە باسا ءمان بەرگەن دۇرىس. ۆەتەريناريا سالاسىنداعى جاعداي ءماز ەمەس ەكەنىن مويىنداۋ قاجەت. ەڭ الدىمەن، بۇل سالانى ماتەريالدىق-تەحنيكالىق تۇرعىدان قامتاماسىز ەتۋ كەرەك. مال دارىگەرلەرىنىڭ ەڭبەك جاعدايىن جاقسارتۋ قاجەت، ۆەتەرينار مامانداردى ىنتالاندىرۋ شارالارىن قاراستىرعان ءجون. ۆەتەريناريا سالاسىنىڭ ينفراقۇرىلىمىن كۇشەيتۋگە قاتىستى جۇمىستى ءتيىمدى تۇردە جالعاستىرۋ كەرەك», - دەدى مەملەكەت باسشىسى.

حالىق جەردىڭ يگىلىگىن كورۋى كەرەك!

پرەزيدەنت توقاەۆ ءمان بەرگەن تاعى ءبىر ماڭىزدى ماسەلە – جايىلىمدىق جەرلەر ماسەلەسى. پرەزيدەنت جايىلىمدىق جەرلەر اۋىل تۇرعىندارىنا جانە ناقتى جوسپارى بار ينۆەستورلارعا بەرىلۋگە ءتيىس ەكەنىن باسا ايتتى.

توقاەۆ: «حالىق جەردىڭ يگىلىگىن كورۋى كەرەك. مەن بىرنەشە جىل بۇرىن زاڭسىز الىنعان جانە يگەرىلمەي بوس جاتقان جەرلەردى قايتارىپ الۋ تۋرالى ناقتى تاپسىرما بەردىم. بۇگىن وسى ماسەلە بويىنشا مينيستر باياندادى. 2022 جىلدان بەرى 14 ميلليون گەكتاردان استام اۋىل شارۋاشىلىعى جەرى مەملەكەتكە قايتارىلدى. جەردى قولىنان ءىس كەلەتىن، جۇمىس ىستەۋگە نيەتتى ازاماتتارعا بەرۋ كەرەك دەگەن تاپسىرما بىرنەشە رەت ايتىلدى. الايدا، بۇل ماڭىزدى جۇمىس باياۋ جۇرگىزىلىپ جاتىر. سوندىقتان جولداۋدا مەملەكەتكە قايتارىلعان جەردى كەلەسى جىلدىڭ ورتاسىنا دەيىن تۇگەلدەي تۇراقتى اينالىمعا ەنگىزۋ تۋرالى تاپسىرما بەرىلدى. اكىمدىكتەردىڭ وسى ماسەلەگە قاتىستى جوسپارلارى قاعاز جۇزىندە قالىپ قويماۋى كەرەك. ەڭ باستىسى، جەر تاعى دا يگەرىلمەي، بوس قالماۋى قاجەت. ۇكىمەت قازىر مال شارۋاشىلىعى سالاسىنداعى بيزنەستى قولداۋ جوسپارىن ازىرلەپ جاتىر. جايىلىمدىق جەرلەر اۋىل تۇرعىندارىنا جانە ناقتى جوسپارى بار ينۆەستورلارعا بەرىلۋگە ءتيىس. كەلەسى جىلدىڭ ورتاسىندا قابىلداناتىن بۇل قۇجاتتا وسى ماسەلەنىڭ شەشىمدەرى ايقىن كورسەتىلۋى كەرەك. تاعى ءبىر تۇيتكىل – جەرگە بەرىلەتىن كەپىلدىك قۇننىڭ تومەن بولۋى. كاداسترلىق باعالاۋ جۇيەسى قازىرگى نارىقتاعى شىنايى احۋالعا مۇلدەم سايكەس كەلمەيدى. ۇكىمەت بۇل ماسەلەگە نازار اۋدارۋى كەرەك، كاداسترلىق قۇندى ايقىنداۋ ءتاسىلىن قايتا قاراۋعا ءتيىس. جەر قاتىناستارى سالاسىنداعى كەدەرگىلەر قازىرگى زامانعا ساي شارۋاشىلىقتار قۇرۋعا بوگەت بولىپ وتىر. مەن جولداۋىمدا ۇكىمەتكە كەلەسى جىلدىڭ سوڭىنا دەيىن جەر رەسۋرستارىنىڭ بىرىڭعاي تسيفرلىق كارتاسىن ازىرلەۋدى تاپسىردىم. قۇزىرلى مينيسترلىكتەر وسى ماڭىزدى جۇمىس بويىنشا نە ىستەلىپ جاتقانىن 7 كۇننىڭ ىشىندە بايانداۋى كەرەك. كەلەسى ماسەلە. جەر تەلىمدەرى ەلەكتروندى كونكۋرس ارقىلى بەرىلۋى قاجەت. جەر العان ازاماتتاردىڭ ەڭ باستى مىندەتى – جەردى ءتيىمدى يگەرۋ، ياعني، بەرىلگەن جەردى كادەگە جاراتۋ. بۇعان قوسا، جەر رەسۋرستارىنا مونيتورينگ جۇرگىزۋ تاسىلدەرىن قايتا قاراۋ قاجەت. قازىر اۋىل شارۋاشىلىعى جەرلەرىنە قاتىستى دەرەكتەر تولىق ەمەس. مۇنداي احۋال جەرگە باقىلاۋ جاساۋعا جانە يگەرىلمەي بوس جاتقان جەرلەردى قايتارىپ الۋعا كەدەرگى كەلتىرەدى. جەردى ءبولىپ-تاراتۋ ۇدەرىسى بويىنشا اقپارات اشىق ءارى قولجەتىمدى بولۋى قاجەت», - دەدى.

اتالعان جيىندا پرەزيدەنت قاسىم-جومارت توقاەۆ سۋدى ءتيىمدى پايدالانۋ، يرريگاتسيالىق جەرلەردى جاڭعىرتۋ ماسەلەلەرىنە دە جەكە توقتالدى.

سۋدىڭ دا سۇراۋى بار!

مەملەكەت باسشىسى: «سۋ قويمالارىنىڭ شامامەن 60 پايىزى اۋىل شارۋاشىلىعى ەنشىسىندە. اگرارلىق سالادا سۋدى ءتيىمدى پايدالانۋ، سايىپ كەلگەندە، ەلدەگى بۇكىل سۋ ەكوجۇيەسىنىڭ تۇراقتىلىعىنا اسەر ەتەتىن فاكتورعا اينالىپ وتىر. اگروسەكتوردا زاماناۋي سۋ ۇنەمدەۋ تەحنولوگيالارى ەنگىزىلىپ، سۋدى كوپ قاجەت ەتەتىن داقىلدار القابى ازايتىلۋدا. بۇل ۇلكەن جۇمىستىڭ باسى عانا. ساراپشىلاردىڭ ەسەبىنشە، الداعى ءۇش جىلدا سۋ ۇنەمدەۋشى تەحنولوگيالار كەمىندە ءبىر ميلليون گەكتاردى قامتيتىن دەڭگەيگە جەتەدى. تسيفرلىق شەشىمدەردى ەنگىزۋ جانە جوبالاردى جۇزەگە اسىرۋدىڭ بارلىق كەزەڭىن قاتاڭ باقىلاۋعا الۋ ارقىلى سۋ ينفراقۇرىلىمىن جاڭعىرتۋدى جەدەلدەتكەن ءجون. سۋ شارۋاشىلىعىن جاڭعىرتۋ بويىنشا جۇمىس جەتكىلىكتى، الايدا بۇل اۋىل شارۋاشىلىعى سالاسىن دامىتۋ جوسپارىمەن ءوزارا بايلانىستى بولۋعا ءتيىس. ءبىزدىڭ ۆەدومستۆولار ءتۇرلى جوسپارلار مەن جول كارتالارىن ازىرلەۋمەن اۋەستەنىپ كەتتى. ءتىپتى، ونىڭ كوبى ءوز ارالارىندا كەلىسىلمەيدى، ءجۇردىم-باردىم جاسالادى. مۇندايدى دوعارۋ كەرەك. مەملەكەت جۇمساعان ءار تيىننىڭ قايتارىمى بولۋعا ءتيىس. بۇل داۋسىز. قارجىنى زاماناۋي سۋ پايدالانۋ تەحنولوگيالارىن بەلسەندى قولداناتىن وڭىرلەرگە بەرۋ قاجەت. سوندىقتان اۋىل شارۋاشىلىعى ءوندىرىسىنىڭ وڭىرلىك جوسپارى ۇكىمەت ازىرلەپ جاتقان سۋ رەسۋرستارىن باسقارۋ جونىندەگى باس جوسپارىنا ەنگىزىلۋگە ءتيىس», - دەدى.

پرەزيدەنت ءوز سوزىندە اۋىل شارۋاشىلىعى سەكتورىن قارجىلاندىرۋ جانە تەحنيكالاردى جاڭعىرتۋ ماسەلەلەرىنىڭ وزەكتىلىگىن ايتتى.

توزعان تەحنيكالاردى جاڭارتۋ ماڭىزدى

قاسىم-جومارت توقاەۆ: «اگروونەركاسىپ كەشەنىن قارجىلاندىرۋ تاسىلدەرىن جەتىلدىرۋ كەرەك. بيىل اۋىل شارۋاشىلىعىنا ارنالعان جەڭىلدەتىلگەن نەسيە كولەمى ەل تاريحىندا العاش رەت 1 تريلليون تەڭگەدەن استى. بۇل – وسىدان 5 جىل بۇرىنعى جاعدايمەن سالىستىرعاندا 10 ەسە ارتىق كورسەتكىش. نەسيە قولجەتىمدى بولۋى ءۇشىن بانكتەرگە قۇزىرلى مەكەمە تاراپىنان كەپىلدىك بەرۋ ءتاسىلى ەنگىزىلدى. بيىل «دامۋ» قورى 1300 نەسيەگە كەپىلدىك بەردى. ءسويتىپ نەسيە الۋعا مۇلكى جەتكىلىكسىز كوپتەگەن شارۋانىڭ، اسىرەسە، شاعىن جانە ورتا دەڭگەيدەگى فەرمەرلەردىڭ ماسەلەسى وڭ شەشىمىن تاپتى. ەلىمىزدە وندىرىلەتىن تەحنيكا جەڭىلدەتىلگەن ليزينگپەن بەرىلە باستادى. بۇل ابدەن ەسكىرگەن تەحنيكانى جاڭارتۋعا ارنالعان وتە ءتيىمدى شەشىم بولدى. ءتورت جىل بۇرىن اۋىل شارۋاشىلىعى تەحنيكالارىنىڭ 90 پايىزى توزىپ تۇرعان ەدى. بۇل كورسەتكىش بيىل 70 پايىزعا دەيىن تومەندەدى. وسى باعىتتاعى جۇمىستى بيزنەس وكىلدەرىمەن بىرلەسىپ، ءارى قاراي جالعاستىرۋ قاجەت. قازىر شارۋالار الىپ جاتقان تەحنيكانىڭ 90 پايىزى قازاقستاندا شىعارىلعان. ەلىمىزدەگى 10 زاۋىتتا وسىنداي 19 ءتۇرلى تەحنيكا قۇراستىرىلادى. ولاردىڭ قاتارىندا الەمگە تانىمال برەندتەر بار. جاقىندا امەريكا قۇراما شتاتتارىنا جۇمىس ساپارىم كەزىندە John Deere كومپانياسىمەن بىرگە قۇنى 2,5 ميلليارد دوللار بولاتىن ستراتەگيالىق سەرىكتەستىك تۋرالى كەلىسىمگە قول قويىلدى. سوعان سايكەس الداعى بەس جىلدا ەلىمىزدە 3 مىڭعا جۋىق زاماناۋي تەحنيكا شىعارىلادى», - دەدى.

مامان تاپشىلىعىن شەشۋ كەرەك!

ونان ءارى قاسىم-جومارت توقاەۆ سالاداعى مامان تاپشىلىعى ماسەلەسىن كوتەردى.

پرەزيدەنت: «سوڭعى كەزدەرى اۋىل شارۋاشىلىعى ءونىمىن وندىرۋشىلەردەن جۇمىس كۇشى جەتىسپەيتىنى جونىندە كوپ ءوتىنىش ءتۇسىپ جاتىر. بۇل تۇيتكىل، اسىرەسە، ەگىن ەگۋ، جيىن-تەرىن ناۋقانىندا، ءوندىرىستى كەڭەيتۋ نەمەسە جاڭا نىساندار قۇرىلىسى كەزىندە قاتتى سەزىلەدى. مامان تاپشىلىعى كورشىلەس ەلدەردەن كەلەتىن ەڭبەك ميگرانتتارى ەسەبىنەن ءىشىنارا شەشىلەدى. شارۋالار كۆوتانى كوبەيتۋدى سۇرايدى. ولاردىڭ تالابىن ءىشىنارا ورىنداۋعا بولاتىن شىعار. بۇل ءوزى قىزىق جاعداي: ءبىرى اۋىلدا جۇمىس جوق دەسە، ەندى ءبىرى جۇمىسشى جەتىسپەيدى دەپ شاعىمدانادى. ارينە، جۇمىس بار، بىراق ونىمەن شۇعىلداناتىن ادام از. مۇنى مويىنداۋ كەرەك», - دەدى.

پرەزيدەنت تابىسقا جەتكەن ءاربىر كاسىپكەردى ءوز اۋىل-ايماعىنىڭ وركەندەۋىنە ۇلەس قوسۋعا شاقىردى.

مەملەكەت باسشىسى: «تاعى دا قايتالاپ ايتقىم كەلەدى: اۋىل شارۋاشىلىعى دامىسا، ەڭ الدىمەن اۋىلدىڭ جاعدايى جاقسارادى. مەملەكەت اۋىل-ايماقتاردى كوركەيتۋ ءۇشىن كوپتەگەن جوبالاردى قولعا الدى. ينفراقۇرىلىم سالۋدان باستاپ، اۋىلعا بىلىكتى مامان تارتۋ ماسەلەسىنە دەيىن اۋقىمدى جۇمىس جۇرگىزىلۋدە. 2019 جىلدان بەرى «اۋىل – ەل بەسىگى» جوباسى جۇزەگە اسىرىلىپ جاتىر. وسى جوبا اياسىندا اۋىل ينفراقۇرىلىمىن دامىتۋعا 700 ميلليارد تەڭگەدەن استام قارجى ءبولىندى. بۇكىل ەل بويىنشا 2,5 مىڭنان اسا ەلدى مەكەندە ناقتى جۇمىس اتقارىلدى. «اۋىل اماناتى» باعدارلاماسى اياسىندا 600-دەن استام بىرلەستىك قۇرىلدى. ۇكىمەت بيىل ايماقتاردى دامىتۋ تۋرالى ارنايى تۇجىرىمداما قابىلدادى. سوعان سايكەس اۋدان اكىمدەرىنىڭ قۇزىرى كەڭەيدى. ەندى ولار اۋداندى دامىتۋ جوسپارىن ءوز دەڭگەيىندە، دەربەس ازىرلەپ، جۇزەگە اسىرا الادى. اكىمدەر ءىرى كومپانيالارمەن كەلىسىم جاساپ، بىرلەسكەن شارۋاشىلىقتاردىڭ (كووپەراتيۆتەردىڭ) ءونىمىن وتكىزۋگە كومەكتەسۋى قاجەت. جالپى، اۋىلعا جەكە ينۆەستيتسيا تارتۋ وتە ماڭىزدى. بۇل جۇمىسقا بيزنەس وكىلدەرى بەلسەنە اتسالىسۋى كەرەك. تابىسقا جەتكەن ءاربىر كاسىپكەر ءوز اۋىل-ايماعىنىڭ وركەندەۋىنە ۇلەس قوسىپ، قارجى سالسا، ەلىمىزدەگى كوپتەگەن ەلدى مەكەن كوركەيە تۇسەرى انىق. ەڭبەكقور، ماقساتى ايقىن ازاماتتارىمىز كۇندەلىكتى ماڭداي تەرىمەن ۇلتتىق بايلىعىمىزدى ەسەلەپ، ەل كەلەشەگىنىڭ جارقىن بولۋىنا ايانباي ۇلەس قوسۋدا. مۇنداي ىسپەن اينالىسىپ جاتقان ادامدارعا قولايلى جاعداي جاساپ، ەلىمىزدىڭ شىنايى پاتريوتتارىن ىنتالاندىرىپ وتىرۋ كەرەك. ءبىز بۇل شارۋانى نازاردان تىس قالدىرمايمىز», - دەدى.

Abai.kz