شىعىس قازاقستان وبلىسى، اياگوز قالاسىندا دۇنيەگە كەلگەن مەيرجان بالا كەزىنەن تەمىرجولعا ەرەكشە قىزىعۋشىلىق تانىتتى. ارمانىنا ادال بولعان ول الماتىداعى قازاق كولىك جانە كوممۋنيكاتسيالار اكادەمياسىن اياقتاپ، كاسىبي جولىن 2012 جىلى باستادى. سول جىلدان بەرى 13 جىلدان استام ۋاقىت بويى الماتى لوكوموتيۆ پايدالانۋ دەپوسىندا ۇزدىكسىز ەڭبەك ەتىپ كەلەدى. بۇل جىلدار ونىڭ كاسىبي شەبەرلىگىن شىڭداعان، جاۋاپكەرشىلىگىن ارتتىرعان، ءارى جەكە تۇلعا رەتىندە دامۋىنا مۇمكىندىك بەرگەن ماڭىزدى كەزەڭ بولدى.

ەڭبەك جولىنىڭ العاشقى قادامدارى جەڭىل بولعان جوق. اۋەلدە ءماشينيستتىڭ كومەكشىسى رەتىندە تاجىريبە جيناقتاپ، سالانىڭ قىر-سىرىن مەڭگەردى. ال ءوزىنىڭ العاشقى رەت تولىققاندى ماشينيست رەتىندە جاۋاپتى ورىنعا وتىرعان ءساتىن مەيرجان ومىرىندەگى ەڭ ەرەكشە وقيعا دەپ سانايدى. سول كەزدە ول مىڭداعان توننا جۇكتىڭ، جۇزدەگەن جولاۋشىنىڭ تاعدىرى ءوز قولىندا ەكەنىن ءتۇسىنىپ، ۇلكەن جاۋاپكەرشىلىكتى سەزىندى. بۇل ءسات – ونىڭ كاسىبي ومىرىندەگى باستى بەلەس، ۇلكەن سىناق ءارى ماقتانىشقا اينالدى.

مەيرجان سوۆەتوۆيچ ءۇشىن تەمىرجول – جاي عانا جۇمىس ەمەس، ومىرلىك ميسسيا. ونىڭ باستى قاعيداسى – ەڭبەكتەن قاشپاۋ، ۇنەمى ىزدەنۋ، بىلمەگەنىن ۇيرەنۋ، بىلگەنىن تولىقتىرۋ. ءوز ماماندىعىنىڭ ۇزدىگى بولۋدى ماقسات ەتكەن ول ءاربىر ساپارعا ۇلكەن ىجداعاتپەن دايىندالىپ، جولاۋشىلاردىڭ قاۋىپسىزدىگى مەن جۇكتەردىڭ دەر كەزىندە جەتكىزىلۋىن باستى مىندەت سانايدى. ونىڭ كاسىبىنە دەگەن شەكسىز سۇيىسپەنشىلىگى مەن ۇقىپتىلىعى – ارىپتەستەرىنە ۇلگى، جاس ماماندارعا باعىت-باعدار.

تەمىرجول ءماشينيستى – سىرت كوزگە رومانتيكاعا تولى ماماندىق سياقتى كورىنگەنىمەن، ءىس جۇزىندە ول ەرەكشە جاۋاپكەرشىلىك پەن جوعارى كاسىبي شەبەرلىكتى تالاپ ەتەدى. جۋمانباەۆ مەيرجان وسى تالاپتارعا تولىق ساي، كەز كەلگەن جاعدايدا سالقىنقاندىلىق پەن شەبەرلىگىن كورسەتە بىلەتىن مامان. ونىڭ ءاربىر شەشىمى، ءاربىر ءىس-قيمىلى – قاۋىپسىزدىك پەن ساپانىڭ كەپىلى.

13 جىل ىشىندە مەيرجان 5 مىڭنان استام ساپارعا قاتىسىپ، 2 ميلليوننان اسا جولاۋشىنى دىتتەگەن جەرىنە قاۋىپسىز جەتكىزۋگە جانە 10 ميلليون تونناعا جۋىق جۇكتى تاسىمالداۋعا اتسالىستى. بۇل كورسەتكىشتەر ونىڭ قاجىرلى ەڭبەگىنىڭ ايقىن دالەلى.

مەيرجان سوۆەتوۆيچتىڭ ومىرلىك ۇستانىمى – تالپىنىس پەن ىزدەنىس، كاسىبي شەبەرلىكتىڭ ۇزدىك ۇلگىسى، ادال ەڭبەكتىڭ ايعاعى. ول ءاربىر ساپاردى تەك مىندەت رەتىندە ەمەس، جاۋاپكەرشىلىكتىڭ، ابىرويدىڭ، ادال ەڭبەكتىڭ كورىنىسى رەتىندە قابىلدايدى. وسىنىڭ ارقاسىندا ول تەك ءوز ماماندىعىنىڭ عانا ەمەس، ەلىمىزدىڭ تەمىرجول سالاسىنىڭ دا ماقتانىشى بولىپ وتىر.

جۋمانباەۆ مەيرجان سوۆەتوۆيچ – ادال ەڭبەكتىڭ، كاسىبي شەبەرلىكتىڭ جانە ادامگەرشىلىكتىڭ ۇلگىسى. ونىڭ قاجىرلى ەڭبەگى مەن كاسىبىنە دەگەن سۇيىسپەنشىلىگى – قازاقستان تەمىر جولىنىڭ سەنىمدىلىگىن ارتتىرىپ قانا قويماي، جاس ماماندارعا ۇلكەن شابىت بەرەدى. وسىلايشا ونىڭ ۇلەسى تەك بۇگىنگى كۇنى عانا ەمەس، بولاشاقتا دا ەلدىڭ تەمىرجول سالاسىنىڭ دامۋىنا ايرىقشا ىقپال ەتەتىندىگى ءسوزسىز.

Abai.kz