Шығыс Қазақстан облысы, Аягөз қаласында дүниеге келген Мейржан бала кезінен теміржолға ерекше қызығушылық танытты. Арманына адал болған ол Алматыдағы Қазақ көлік және коммуникациялар академиясын аяқтап, кәсіби жолын 2012 жылы бастады. Сол жылдан бері 13 жылдан астам уақыт бойы Алматы локомотив пайдалану депосында үздіксіз еңбек етіп келеді. Бұл жылдар оның кәсіби шеберлігін шыңдаған, жауапкершілігін арттырған, әрі жеке тұлға ретінде дамуына мүмкіндік берген маңызды кезең болды.

Еңбек жолының алғашқы қадамдары жеңіл болған жоқ. Әуелде машинисттің көмекшісі ретінде тәжірибе жинақтап, саланың қыр-сырын меңгерді. Ал өзінің алғашқы рет толыққанды машинист ретінде жауапты орынға отырған сәтін Мейржан өміріндегі ең ерекше оқиға деп санайды. Сол кезде ол мыңдаған тонна жүктің, жүздеген жолаушының тағдыры өз қолында екенін түсініп, үлкен жауапкершілікті сезінді. Бұл сәт – оның кәсіби өміріндегі басты белес, үлкен сынақ әрі мақтанышқа айналды.

Мейржан Советович үшін теміржол – жай ғана жұмыс емес, өмірлік миссия. Оның басты қағидасы – еңбектен қашпау, үнемі іздену, білмегенін үйрену, білгенін толықтыру. Өз мамандығының үздігі болуды мақсат еткен ол әрбір сапарға үлкен ыждағатпен дайындалып, жолаушылардың қауіпсіздігі мен жүктердің дер кезінде жеткізілуін басты міндет санайды. Оның кәсібіне деген шексіз сүйіспеншілігі мен ұқыптылығы – әріптестеріне үлгі, жас мамандарға бағыт-бағдар.

Теміржол машинисті – сырт көзге романтикаға толы мамандық сияқты көрінгенімен, іс жүзінде ол ерекше жауапкершілік пен жоғары кәсіби шеберлікті талап етеді. Жуманбаев Мейржан осы талаптарға толық сай, кез келген жағдайда салқынқандылық пен шеберлігін көрсете білетін маман. Оның әрбір шешімі, әрбір іс-қимылы – қауіпсіздік пен сапаның кепілі.

13 жыл ішінде Мейржан 5 мыңнан астам сапарға қатысып, 2 миллионнан аса жолаушыны діттеген жеріне қауіпсіз жеткізуге және 10 миллион тоннаға жуық жүкті тасымалдауға атсалысты. Бұл көрсеткіштер оның қажырлы еңбегінің айқын дәлелі.

Мейржан Советовичтің өмірлік ұстанымы – талпыныс пен ізденіс, кәсіби шеберліктің үздік үлгісі, адал еңбектің айғағы. Ол әрбір сапарды тек міндет ретінде емес, жауапкершіліктің, абыройдың, адал еңбектің көрінісі ретінде қабылдайды. Осының арқасында ол тек өз мамандығының ғана емес, еліміздің теміржол саласының да мақтанышы болып отыр.

Жуманбаев Мейржан Советович – адал еңбектің, кәсіби шеберліктің және адамгершіліктің үлгісі. Оның қажырлы еңбегі мен кәсібіне деген сүйіспеншілігі – Қазақстан темір жолының сенімділігін арттырып қана қоймай, жас мамандарға үлкен шабыт береді. Осылайша оның үлесі тек бүгінгі күні ғана емес, болашақта да елдің теміржол саласының дамуына айрықша ықпал ететіндігі сөзсіз.

Abai.kz