«استانا وپەرا» قابىرعاسىندا وتكەن رەسمي ءىس-شارا بارىسىندا ەستونيا پرەزيدەنتى الار كاريس ەكى ەل اراسىنداعى ىنتىماقتاستىقتى كەڭەيتۋ باعىتتارىن اتاپ ءوتتى.

«بۇل ساپارعا ەستونيانىڭ جەتەكشى ۋنيۆەرسيتەتتەرىنىڭ رەكتورلارى مەن وكىلدەرى قامتىلعانى مەنى قۋانتادى. عىلىم مەن ءبىلىم ادامداردى بىرىكتىرەدى، شىعارماشىلىق ويدى توعىستىرىپ، حالىقتار اراسىنداعى ءوزارا تۇسىنىستىكتى نىعايتادى. ءبىزدىڭ ۋنيۆەرسيتەتتەر مەموراندۋمدارعا قول قويىپ، بۇرىننان بار بايلانىستاردى كۇشەيتتى جانە جاڭا سەرىكتەستىكتەردى باستادى»، — دەدى ەستونيا پرەزيدەنتى الار كاريس.

اللار كاريستىڭ ايتۋىنشا، بۇل ساپار بيزنەس-قوعامداستىق تاراپىنان دا ۇلكەن قىزىعۋشىلىق تۋدىرعان. قازاقستانعا 40-تان استام كاسىپكەر كەلىپ، مازمۇندى بيزنەس-فورۋم وتكىزىلىپ، جاڭا كەلىسىمدەر مەن ىنتىماقتاستىق مۇمكىندىكتەرى اشىلدى.

«ەستونيا مەن قازاقستاندى ماڭىزدى ءارى ۇزاق مەرزىمدى ەكونوميكالىق قارىم-قاتىناستار بايلانىستىرادى. لوگيستيكا سالاسىندا ەستونيا قازاقستاندىق تاۋارلاردىڭ الەمدىك نارىققا شىعۋىنا مۇمكىندىك بەرەتىن قاقپا ءرولىن اتقارادى. بۇل ارىپتەستىك وندىرۋشىلەردى، تەمىرجول جانە كولىك كومپانيالارىن، سونداي-اق ساپاسى مەن سەنىمدىلىگىمەن تانىمال ەستون پورتتارىن بىرىكتىرەدى. ءبىزدىڭ ىنتىماقتاستىعىمىز كولىك سالاسىن دا قامتيدى: قالالىق موبيلدىلىكتەن باستاپ، قالاارالىق تاسىمالدارعا، كاسپي فلوتىنا ارنالعان پاروم قاتىناسى مەن كەمە جاساۋ ىسىنە دەيىن»، — دەپ اتاپ ءوتتى ول.

جاساندى ينتەللەكتتىڭ جاھاندىق دامۋداعى رولىنە توقتالعان الار كاريس ەكى ەلدىڭ دە بۇل تەحنولوگيالاردى جاۋاپتى ءارى ادامعا باعدارلانعان تۇردە قولدانۋعا ۇمتىلاتىنىن ايتتى. ول ي تەحنولوگيالارىن ەرتە جاستان باستاپ ءبىلىم بەرۋ جۇيەسىنە ەنگىزۋدى نەگىزگى باسىمدىقتاردىڭ ءبىرى رەتىندە اتادى.

ەستونيا پرەزيدەنتى ىنتىماقتاستىقتىڭ نەگىزى ءوزارا تيىمدىلىك پەن ورتاق قاعيداتتار ەكەنىن دە اتاپ ءوتتى.

«ەستون تاۋارلارى مەن قىزمەتتەرى قازاقستاننىڭ ەكونوميكاسىن ءارتاراپتاندىرۋ جانە جاڭعىرتۋ جونىندەگى كۇش-جىگەرىن قولدايدى، سونىمەن بىرگە ەكى جاققا دا ءوسۋ مەن ينۆەستيتسيا ءۇشىن جاڭا مۇمكىندىكتەر اشادى. ىنتىماقتاستىقتىڭ جاڭا باعىتتارى پايدا بولىپ، ءداستۇرلى سالالار نىعايا تۇسۋدە. وسى ساپار اياسىندا قول قويىلعان ءوزارا تۇسىنىستىك تۋرالى مەموراندۋمدار كەڭ اۋقىمدى سالالاردا ىنتىماقتاستىعىمىزدى تەرەڭدەتۋگە بەرىك نەگىز بولادى دەپ سەنەمىن»، — دەدى ەستونيا پرەزيدەنتى الار كاريس.

Abai.kz