پانفيلوۆ اۋدانىندا 26 ەلدى مەكەن گازداندىرۋعا جاتادى. بۇگىنگى كۇنى جاركەنت قالاسى تولىق گازداندىرىلدى. قالعان 25 ەلدى مەكەندى گازداندىرۋ بويىنشا جۇمىستار جۇرگىزىلۋدە، سونىڭ 12-سىندە بۇگىنگى كۇنى قۇرىلىس جۇمىستارى اياقتالدى.

بۇل رەتتە تۇرعىندارىنىڭ سانى 1900-دەن اساتىن اۆات جانە اقكەنت اۋىلدارىنا گاز جەتكىزىلدى، ال وسى اپتانىڭ سوڭىنا دەيىن نادەك اۋىلىنا كوگىلدىر وتىن بەرىلەدى. ءسويتىپ جىل اياعىنا دەيىن اۋدانداعى ەلدى مەكەندەردىڭ تەڭ جارتىسى گازداندىرىلادى. بۇل تۋرالى وبلىس اكىمى بەيبىت يساباەۆتىڭ پانفيلوۆ اۋدانى تۇرعىندارىمەن كەزدەسۋىندە بەلگىلى بولدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

ءوڭىر باسشىسىنىڭ ايتۋىنشا، قالعان 13 ەلدى مەكەندە اۋىلعا دەيىنگى گاز قۇبىرىنىڭ قۇرىلىسى بيىل اياقتالىپ، كەلەسى جىلى اۋىلىشىلىك گاز تاراتۋ جەلىلەرى جۇرگىزىلەتىن بولادى.

- سونىڭ ناتيجەسىندە كەلەسى جىلدىڭ سوڭىنا دەيىن اۋداننىڭ 114,3 مىڭ تۇرعىنى، ياعني 85%-ى تابيعي گازعا قول جەتكىزە الادى، - دەپ اتاپ ءوتتى ب. يساباەۆ.

حالىقتى ساپالى اۋىز سۋمەن قامتاماسىز ەتۋ ماسەلەسىنە دە ەرەكشە كوڭىل بولىنگەن. وسى ورايدا اۋدانداعى 40 ەلدى مەكەننىڭ ءبارى ورتالىقتاندىرىلعان سۋمەن قامتاماسىز ەتىلدى، سونىڭ ىشىندە جيدەلى اۋىلىنا بيىل جەرگىلىكتى بيۋدجەتتەن قاراجات ءبولىنىپ، ساپالى اۋىز سۋمەن قامتىلدى.

حالىقتىڭ تۇرمىس دەڭگەيىن كوتەرۋ ماقساتىندا قولعا الىنعان باعىتتىڭ ءبىرى – تۇرعىن ۇيمەن قامتۋ. بۇل رەتتە وبلىس باسشىسى وسى جىلدىڭ 24 مامىرىنان كەزەككە قويۋ جانە تۇرعىن ءۇي بەرۋ فۋنكتسياسى جەرگىلىكتى اتقارۋشى ورگانداردان وتباسى بانكىنە وتكەنىن، ەندى تۇرعىن ۇيلەر وسى بانك ارقىلى بەرىلەتىنىن ەسكە سالىپ، بىلتىر اۋداندا قۇرىلىستى قارقىندى جۇرگىزۋدىڭ ارقاسىندا 480 پاتەر مەن 140 جەكە تۇرعىن ءۇي قولدانىسقا بەرىلگەنىن اتاپ ءوتتى. ال جىل سوڭىنا دەيىن 120 پاتەر مەن 200 جەكە تۇرعىن ءۇيدى تاپسىرۋ كوزدەلگەن. اتالعان ۇيلەر وتباسى بانكى ارقىلى كەزەڭ-كەزەڭىمەن بەرىلىپ، تۇرعىن ءۇي كەزەگى 4%-عا قىسقارادى دەگەن جوسپار بار. سونىمەن قاتار اۋىلدىق جەرلەردە تۇراتىن الەۋمەتتىك وسال وتباسىلاردى تۇرعىن ۇيمەن قامتۋ ءۇشىن شولاقاي اۋىلىندا 373 جەر ۋچاسكەسىنە ينجەنەرلىك جەلىلەر جۇرگىزىلۋدە، قۇرىلىس كەلەسى جىلدىڭ تامىز ايىندا اياقتالادى.

الەۋمەتتىك-ەكونوميكالىق دامۋدىڭ نەگىزگى باعىتتارى بويىنشا حالىقتىڭ ءومىر ءسۇرۋ دەڭگەيىن جاقسارتۋ ماقساتىندا قابىلدانىپ جاتقان شارالارعا جان-جاقتى توقتالعان ايماق باسشىسى تۇرعىنداردى تولعاندىرعان سۇراقتارعا جاۋاپ بەردى.

ماسەلەن، المالى اۋىلىنىڭ تۇرعىنى اۋىلدىڭ دامۋىنا قاتىستى بىرقاتار ماسەلەلەردى كوتەردى. ول اۋىلدا امبۋلاتوريا سالىنعانىن، زاماناۋي ۆەتەرينارلىق پۋنكت جۇمىس ىستەيتىنىن، تۇرعىنداردىڭ وتىنىشتەرىنە سايكەس بىرنەشە كوشەگە اسفالت توسەلىپ، جارىقتاندىرۋ جۇرگىزىلگەنىن اتاپ ءوتتى. ەندى قازىرگى مادەنيەت ءۇيى مەن مەكتەپ عيماراتى 70-80 جىلدارى سالىنعاندىقتان، جاڭا مادەنيەت ءۇيى مەن مەكتەپ سالۋ قاجەت ەكەنىن جەتكىزدى.

مەكتەپ قۇرىلىسىنا قاتىستى سۇراقتاردى قوڭىرولەڭ، كىشىشىعان اۋىلدارىنىڭ تۇرعىندارى دا قويدى. جاۋاپتا ايتىلعانداي، المالى اۋىلىنداعى مەكتەپ قۇرىلىسىنا بيۋدجەتتىك ءوتىنىم كەلەسى جىلى بەرىلەدى. ال قوڭىرولەڭ، كىشىشىعان اۋىلدارىنداعى مادەنيەت ءۇيى مەن مەكتەپ قۇرىلىسىنا قاتىستى ماسەلەلەر قوسىمشا قارالاتىن بولادى.

سارىبەل اۋىلىنىڭ تۇرعىنى اۋىز سۋ ساپاسىنا قاتىستى ماسەلە كوتەردى. باياندامادا ايتىلعانداي، سۋ قۇبىرى جەلىلەرىن جاڭعىرتۋ جوباسى دايىندالعان، بۇل ماسەلە وڭ شەشىمىن تابادى. سونىمەن قاتار قىرىققۇدىق جانە شولاقاي اۋىلدارىندا سۋ قۇبىرى جەلىلەرىنىڭ جاڭعىرتىلۋى اياقتالدى. وسىنداي جۇمىستار بيىل كەرىمعاش اۋىلىندا دا باستالعان، نىساننىڭ قۇرىلىسى كەلەسى جىلى جالعاسادى. بۇدان بولەك، ءۇشارال اۋىلىنىڭ اۋىز سۋى ساپاسىن جاقسارتۋ بويىنشا جوبا ازىرلەنگەن.

كوكتال اۋىلىنىڭ تۇرعىنى ل. اسانوۆا كوشەسىن جوندەۋ تۋرالى ءسوز قوزعادى. جاۋاپتا ايتىلعاننان بەلگىلى بولعانى، جاركەنت قالاسىندا ە.سىپاتاەۆ كوشەسى جوندەلگەن، الداعى جوسپار بويىنشا ل. اسانوۆا كوشەسىن دە جوندەۋ جوسپاردا بار. جالپى، بيىل ۇزىندىعى 29 شاقىرىمدى قۇرايتىن جەرگىلىكتى ماڭىزى بار جولداردى جوندەۋ مەن كۇتىپ ۇستاۋ جۇمىستارىنا 3,5 ملرد تەڭگە بولىنگەن.

سونداي-اق تۇرعىندار سۋارمالى سۋمەن قامتاماسىز ەتۋ، مەكتەپتەردى كۇردەلى جوندەۋ، كوپ قاباتتى ۇيلەردىڭ شاتىرىن، قاسبەتىن جوندەۋ ماسەلەلەرىن كوتەردى. بارلىق سۇراقتارعا تولىققاندى جاۋاپتار بەرىلدى.

– وتكەن جىلدىڭ قورىتىندىسى بويىنشا پانفيلوۆ اۋدانى وبلىستاعى ەڭ ۇزدىك اۋدان دەپ تانىلدى. بۇل – اۋدان حالقىنىڭ ورتاق ەڭبەگىنىڭ ناتيجەسى. ءبىز ءوز تاراپىمىزدان  تۇرعىنداردىڭ ءومىر ساپاسىن ارتتىرۋ باعىتىندا ءتيىستى شارالاردى قابىلداپ جاتىرمىز. ەڭ ءبىرىنشى كەزەكتە ساپالى اۋىز سۋمەن قامتۋ، جول جوندەۋ، تۇرعىن ۇيلەر مەن الەۋمەتتىك نىساندار سالۋ ماسەلەلەرى شەشىلۋدە. گازداندىرۋ جۇمىستارى دا جالعاسىپ جاتىر. جالپى، پانفيلوۆ اۋدانى –ەكونوميكالىق الەۋەتى جوعارى، اۋىل شارۋاشىلىعى، ونەركاسىپ، لوگيستيكا، تۋريزم سالالارىن دامىتۋعا جاقسى مۇمكىندىكتەرى بار، جەتىسۋ وبلىسىنىڭ دامۋىنا ەلەۋلى ۇلەس قوسىپ وتىرعان ءوڭىر، – دەدى ءسوزىنىڭ قورىتىندىسىندا وبلىس اكىمى بەيبىت يساباەۆ.

اتاپ وتسەك، وسى كۇنى ءوڭىر باسشىسى ازاماتتاردى جەكە ماسەلەلەرى بويىنشا قابىلدادى. قابىلداۋعا كەلگەندەر نەگىزىنەن مەملەكەتتىك قولداۋ مەن الەۋمەتتىك كومەك الۋ مۇمكىندىكتەرىنە قاتىستى سۇراقتار قويدى.

Abai.kz