قازاقستاندا ادامداردى ولاردىڭ كەلىسىمىنسىز فوتوعا جانە ۆيدەوعا تۇسىرۋگە تىيىم سالۋ ماسەلەسى تالقىلانىپ جاتىر. بۇل تۋرالى مادەنيەت جانە اقپارات ءمينيسترى ايدا بالاەۆا مالىمدەدى.

ءمينيستردىڭ ايتۋىنشا، باستامانىڭ ماقساتى – ازاماتتاردىڭ جەكە ءومىرىن قورعاۋ. قازىر كەز كەلگەن ادامدى قوعامدىق ورىنداردا جاسىرىن نەمەسە رۇقساتسىز ءتۇسىرىپ، الەۋمەتتىك جەلىگە جاريالاۋ كەڭ تاراعان.

«بۇل باستاما – شەنەۋنىكتەردى قورعاۋ ەمەس، قاراپايىم ادامداردىڭ جەكە كەڭىستىگىن ساقتاۋ تۋرالى. ازاماتتار وزدەرىن پرانكەرلەر جاسىرىن ءتۇسىرىپ، ادەپسىز ارەكەتتەرگە يتەرمەلەيتىنىن ايتىپ، ءجيى شاعىنادى. كەيبىرى ءتىپتى ۇيىنەن شىعۋعا قورقاتىنىن ايتادى»، – دەدى ايدا بالاەۆا.

ونىڭ سوزىنشە، بۇل ماسەلەنى شەشۋ ءۇشىن ارنايى جۇمىس توبى قۇرىلىپ جاتىر. توپقا باق وكىلدەرى مەن زاڭگەرلەر دە تارتىلادى. ولار كىمدى، قاشان جانە قانداي جاعدايدا تۇسىرۋگە بولاتىنىن انىقتايتىن ناقتى ەرەجەلەردى دايىندايدى.

Abai.kz