شىمكەنت قالاسىندا العاش رەت حالىقارالىق «MIRAS» تۇركى ساندىك ەتنوديزاينەرلەر فورۋمى ءوتتى. شارا شىمكەنت قالاسى اكىمدىگى مەن تۇركى مادەنيەتى جانە مۇراسى حالىقارالىق قورى (ازەربايجان رەسپۋبليكاسى) بىرلەسۋىمەن ۇيىمداستىرىلىپ، تۇركى دۇنيەسىنىڭ كيىم مادەنيەتىن، ساندىك-قولدانبالى ونەرىن جانە ەتنوديزاينداعى زاماناۋي باعىتتاردى تالقىلاۋعا ارنالعان ءىرى الاڭعا اينالدى.

سۋرەت: gov.kz سايتىنان الىندى.

فورۋمعا تۇركيا، ازەربايجان، قىرعىزستان، وزبەكستان مەملەكەتتەرىنەن، سونداي-اق قازاقستاننىڭ استانا، الماتى جانە شىمكەنت قالالارىنان كەلگەن ديزاينەرلەر، قولونەر شەبەرلەرى، عالىمدار مەن ونەرتانۋشىلار قاتىسىپ، ۇلتتىق مۇرانىڭ ءمان-ماڭىزى مەن زاماناۋي ءسان يندۋسترياسىنداعى ورنى جونىندە وي ءبولىستى. «قىزعالداق» سارايىندا وتكەن «تۇركى كيىمتانۋى جانە ورنەك سەميوتيكاسى» اتتى عىلىمي-تانىمدىق كونفەرەنتسيا فورۋمنىڭ العاشقى ءبولىمى بولدى. اشىلۋ سالتاناتىندا شىمكەنت قالاسى اكىمىنىڭ ورىنباسارى سارسەن قۇرانبەك قاتىستى. ول ءوز سوزىندە قوناقتاردى قۇتتىقتاپ، مۇنداي فورۋمنىڭ تۇركى حالىقتارىنىڭ مادەني بايلانىسىن نىعايتىپ، ەتنوديزاين سالاسىنداعى كاسىبي سەرىكتەستىكتى ارتتىرۋدا ماڭىزدى ءرول اتقاراتىنىن اتاپ ءوتتى. ول ۇلتتىق كيىم مەن ءداستۇرلى ونەردى دارىپتەۋ – جاس ۇرپاقتىڭ رۋحاني دۇنيەسىن بايىتىپ، ۇلتتىق بىرەگەيلىكتى كۇشەيتەتىنىن ايتتى.

سۋرەت: gov.kz سايتىنان الىندى.

كونفەرەنتسيا بارىسىندا حالىقارالىق تۇركى مادەنيەتى جانە مۇراسى حالىقارالىق قورىنىڭ پرەزيدەنتى اقتوتى رايىمقۇلوۆا تۇركى حالىقتارىنىڭ كيىم مادەنيەتى – ۇلتتىڭ تاريحي كودى، رۋحاني تامىرى ەكەنىن اتاپ ءوتتى. ونىڭ ايتۋىنشا، ءاربىر ويۋ-ورنەكتىڭ استارىندا حالىقتىڭ دۇنيەتانىمى مەن فيلوسوفياسى جاتىر جانە ەتنوديزايننىڭ جاڭا تولقىنى وسى قۇندىلىقتاردى زاماناۋي ۇلگىدە تانىتۋعا ءتيىس.

ازەربايجان ۇلتتىق تاريح مۋزەيىنىڭ ەرەكشە قورىنىڭ مەڭگەرۋشىسى، فيلوسوفيا عىلىمدارىنىڭ دوكتورى افەت رۋستامباەۆا دا تۇركى الەمىندەگى كيىم داستۇرلەرىنىڭ ورتاقتىعىن ءسوز ەتتى. ول ەتنوديزاين – وتكەندى ساقتاپ قانا قويماي، ونى جاڭاشا مانمەن تولىقتىراتىن شىعارماشىلىق باعىت ەكەنىن ايتتى.

سۋرەت: gov.kz سايتىنان الىندى.

ۇيىمداستىرۋشىلاردىڭ ايتۋىنشا، «MIRAS» فورۋمى كەلەشەكتە ءداستۇرلى تۇردە وتكىزىلىپ، تۇركى حالىقتارىنىڭ مادەني بايلانىسىن ودان ءارى نىعايتۋعا، ەتنوديزاين سالاسىنداعى كاسىبي بىلىكتىلىكتى دامىتۋعا باعىتتالماق.

Abai.kz