بۇگىندە تۋريستىك سالا ەكونوميكالىق ءوسۋدىڭ جانە قازاقستاننىڭ حالىقارالىق دەڭگەيدە تانىلۋىنىڭ قۋاتتى درايۆەرىنە اينالىپ كەلەدى.

ىشكى تۋريستەر سانى 10%-عا ءوسىپ، 8,6 ملن ادامعا جەتتى. قوناقۇيلەر مەن دەمالىس بازالارى كورسەتكەن قىزمەت كولەمى 17%-عا ارتىپ، 350 ملرد تەڭگەنى قۇرادى. سالاعا سالىنعان ينۆەستيتسيالار 32,6%-عا ءوسىپ، 1,256 ترلن تەڭگەگە جەتتى. جالپى، 2020 جىلدان بەرى 573 ينۆەستيتسيالىق جوبا ىسكە اسىرىلىپ، سونىڭ ناتيجەسىندە ەلدەگى ورنالاستىرۋ ورىندارىنىڭ قورى 25%-عا ۇلعايىپ، 4 482 نىسانعا جەتتى.

ساياحاتشىلاردى تارتۋ ماقساتىندا 84 مەملەكەتتىڭ ازاماتتارى ءۇشىن ۆيزاسىز رەجيم ەنگىزىلدى، ال 102 ەلدىڭ ازاماتتارىنا ەلەكتروندىق ۆيزا قولجەتىمدى.

سونىمەن قاتار قازاقستان 30 ەلمەن حالىقارالىق اۋە قاتىناسىن جۇزەگە اسىرىپ، 145 باعىت بويىنشا اپتاسىنا 812 رەيس ورىندايدى. 17 اۋەجايدا بەسىنشى "اۋە ەركىندىگى" دارەجەسىمەن "اشىق اسپان" رەجيمى قولدانىلادى.

بۇدان بولەك، كەندىرلىدە، زايساندا جانە قاتونقاراعايدا ءۇش جاڭا اۋەجاي سالىنىپ جاتىر، ارقالىق اۋەجايى قالپىنا كەلتىرىلۋدە، سونداي-اق الماتى، ءۇرجار، شىمكەنت جانە پاۆلودار قالالارىنداعى تەرمينالدار مەن ۇشۋ-قونۋ جولاقتارى جاڭعىرتىلىپ جاتىر.

ششۋچە-بۋراباي كۋرورتتىق ايماعىن، "ماڭعىستاۋ" تۋريستىك ايماعىن جانە الماتى تاۋ كلاستەرىن دامىتۋ جونىندەگى كەشەندى جوسپارلار ازىرلەندى.

تۋريستىك سالانى قولداۋ ماسەلەلەرى جونىندەگى جاڭا زاڭ بويىنشا گيدتەردىڭ قىزمەتىن جەكە كاسىپكەر رەتىندە تىركەۋگە مىندەتتى بولۋ تالابى الىنىپ تاستالدى، ۆيزيت-ورتالىقتاردىڭ قىزمەتىن رەتتەۋ ەنگىزىلىپ، تۋريستىك اۆتوبۋستاردىڭ مەملەكەتتىك شەكارادان جەدەل ءوتۋى ءۇشىن "جاسىل ءدالىز" تەتىگى ىسكە قوسىلدى.

Abai.kz