ساۋدا جانە ينتەگراتسيا ۆيتسە-ءمينيسترى ايدار ابىلدابەكوۆ ۇكىمەتتە وتكەن ءباسپاسوز بريفينگىندە جاڭا جىل مەرەكەسى قارساڭىندا باعانىڭ نەگە قىمباتتايتىنىنا قاتىستى پىكىر ءبىلدىردى.

سونداي-اق ۆيتسە-مينيستر جاڭا جىل قارساڭىندا ازىق-تۇلىك باعاسىنىڭ قىمباتتاۋ ىقتيمالدىعىنا قاتىستى ءوز بولجامىن دا ايتتى.

جۋرناليستەر ودان: «مەرەكە الدىندا باعاعا قاتىستى ابىگەر بولۋى مۇمكىن بە؟» دەپ سۇرادى.

بۇگىنگى تاڭدا ەشقانداي ابىگەردىڭ بولاتىنىن كۇتىپ وتىرعان جوقپىز. جاڭا جىلدىق داستارحان – ادامنىڭ جاعدايىنا، مۇمكىندىگىنە جانە قالاۋىنا بايلانىستى. ونى 50 مىڭ تەڭگەگە دە، 500 مىڭ تەڭگەگە دە جاساۋعا بولادى. ءبارى قالتاڭىزعا جانە قالاۋىڭىزعا قاراي، – دەدى ايدار ابىلدابەكوۆ.

سونىمەن قوسا ول جاڭا جىل الدىندا ساتىپ الۋ مۇمكىندىگى ادەتتەگىدەن ارتادى دەپ وتىر.

جاڭا جىل جاقىنداعان سايىن حالىقتىڭ ساتىپ الۋ قابىلەتى بىرنەشە ەسە وسەدى. بارلىعى ءبىر كۇندىك داستارقانعا عانا ەمەس، الدىن الا قور جاساپ الادى. سوندىقتان سۇرانىس ارتادى. مەن 90-جىلدارى ءوزىم دە ساۋدامەن اينالىستىم. سول كەزدە جاڭاجىلدىق ەكى-ءۇش كۇندىك تابىسىم بۇكىل ايلىق تابىستان كوپ بولاتىن. ەگەر كەز كەلگەن تاۋاردىڭ ازداپ تاپشىلىعى بولسا، ساتۋشىنىڭ باعانى كوتەرۋگە دەگەن نيەتى پايدا بولادى، ويتكەنى تۇتىنۋشىلار ونى ءبارىبىر ساتىپ الادى. مەملەكەت بۇنى باقىلامايدى، تەك الەۋمەتتىك ماڭىزى بار تاۋارلار بويىنشا قاداعالايدى. قالعان تاۋارلار – ەركىن نارىقتا، – دەپ ءتۇسىندىردى ۆيتسە-مينيستر.

Abai.kz