بۇل ماقساتتا زووباققا ىرگەلەس جەر تەلىمدەرى ساتىپ الىنباق.  

الماتى قالاسىنداعى حايۋاناتتار باعىن جاڭعىرتۋ جوسپارلانىپ وتىر. بۇل تۋرالى قالا اكىمىنىڭ ورىنباسارى بەيبىت شاحانوۆ مالىمدەدى.

ونىڭ ايتۋىنشا، زووباققا كەلۋشىلەر سانى ارتىپ وتىر. سوندىقتان قازىرگى قورشاۋلاردىڭ، اينالاداعى اۋماقتار مەن ينجەنەرلىك ينفراقۇرىلىمنىڭ جاعدايى ەداۋىر ەسكىرگەنىن، جۇرتقا ساپالى قىزمەت كورسەتۋگە مۇمكىندىك بەرمەيتىنىن ايتادى. قازىرگى قورشاۋلار جانۋارلاردى كۇتىپ-ۇستاۋدىڭ الەمدىك ستاندارتىنا دا ساي كەلمەيدى.

"الەمنىڭ بارلىق ەلىندە زووباقتاردى تابيعي ورتاعا ۇقسايتىنداي ەتىپ، جان-جانۋارلارعا بارىنشا جايلى جاعداي جاساپ جاتىر، ءبىز دە وسى باعىتتا جۇمىس ىستەۋگە بەت الدىق", – دەدى بەيبىت شاحانوۆ.

قالالىق اكىمدىكتىڭ حابارلاۋىنشا، قايتا جاڭعىرتۋعا دايىندىقتىڭ نەگىزگى كەزەڭىنىڭ ءبىرى – ىرگەلەس جەر تەلىمدەرىن ساتىپ الۋ. ول – ينفراقۇرىلىمدى تولىق جاڭارتىپ، جانۋارلاردى ۇستاۋعا ارنالعان زامانعا ساي تابيعي ايماقتار قۇرىپ، اۆتوتۇراق اۋماعىن كەڭەيتۋ دەگەن ءسوز.

"جوبالىق-سمەتالىق قۇجاتتاما ازىرلەنىپ جاتقان كەزدە كليماتتىق جاعدايى ۇقساس ەلدەردىڭ زووپاركتەرىن جاڭعىرتۋ تاجىريبەسى ەسكەرىلۋدە. ۆولەرلەرگە قويىلاتىن تالاپتار جەتەكشى الەمدىك ساراپشىلاردىڭ قاتىسۋىمەن ازىرلەنگەن. مودەرنيزاتسيانىڭ ماستەر-جوسپارىندا بەلگىلەنگەن جانۋارلاردى كۇتىپ-ۇستاۋ ستاندارتتارىنا تولىق سايكەس كەلەدى. جوبالاۋعا ەۋروپا مەن رەسەيدەن كەلگەن زووارحيتەكتورلار قاتىسىپ جاتىر", – دەپ اتاپ ءوتتى قالا اكىمىنىڭ ورىنباسارى.

جوبا بويىنشا جۇمىس باستالىپ كەتتى. كەلەسى جىلى جوبالاۋ-سمەتالىق قۇجاتتامانى ازىرلەۋ اياقتالادى.

ال 10 جەر تەلىمىن ساتىپ العاننان كەيىن قالا زووپاركتى اۋقىمدى تۇردە قايتا قۇرۋعا كىرىسەدى.

Abai.kz