الماتىنىڭ جەتىسۋ اۋدانىنىڭ سانيتاريالىق-ەپيدەميولوگيالىق باقىلاۋ باسقارماسى بيىل تۇرعىنداردان قاتتى وتىندى پايدالانىپ، اينالاعا قويۋ ءتۇتىن تاراتاتىن كاۋاپحانالارعا قاتىستى بىرنەشە شاعىم تۇسكەنىن حابارلادى.

شاعىمداردىڭ ءبىرى نازارباەۆ كوشەسى، 28ا مەكەنجايىنداعى نىسانعا قاتىستى بولدى. تۇرعىننىڭ ايتۋىنشا، وندا انتيسانيتارلىق جاعداي ورناپ، مانگالدان ءتۇتىننىڭ تىم كوپ شىققان. جۇرگىزىلگەن جوسپاردان تىس تەكسەرىس بارىسىندا «ايانا» جك نىسانىندا جۇمىس تۋرالى ءتيىستى حابارلاما بەرىلمەگەن، قاتتى وتىن جاعاتىن مانگال قولدانىلعان، قوقىس كونتەينەرى مەن دەراتيزاتسيا شارالارى بولماعان، نىسان ىشىندە ۇشاتىن جاندىكتەر انىقتالدى دەگەندەي بىرقاتار سانيتارلىق تالاپتىڭ بۇزىلعانى انىقتالدى.تەكسەرۋ قورىتىندىسى بويىنشا كاسىپكەرگە 68 810 تەڭگە ايىپپۇل سالىنىپ، زاڭبۇزۋشىلىقتاردى جويۋ تۋرالى نۇسقاما بەرىلدى. الايدا قايتالاما تەكسەرىس بارىسىندا تالاپتاردىڭ ورىندالماعانى انىقتالىپ، سوت نىسان يەسىنە قوسىمشا 393 200 تەڭگە ايىپپۇل تاعايىندادى.

سونىمەن قاتار، سەرىكوۆ كوشەسى، 41 مەكەنجايىنداعى «التىن قازان» كافەسىنە («قۇلاگەر» جشس) قاتىستى دا بىرنەشە شاعىم تۇسكەن. تەكسەرۋ بارىسىندا مانگالدىڭ قاتتى وتىنمەن جۇمىس ىستەيتىنى جانە تۇرعىن ۇيلەرمەن جاپسارلاس سالىنعانى، بۇل سانيتارلىق تالاپتارعا قايشى ەكەنى ءارى تۇرعىندارعا قولايسىزدىق تۋدىراتىنى انىقتالدى. ءدامحانا باسشىسىنا 314 560 تەڭگە ايىپپۇل سالىنىپ، بۇزۋشىلىقتاردى جويۋ تۋرالى نۇسقاما بەرىلدى. الايدا قايتا تەكسەرگەندە مانگالدىڭ ءالى دە الىنباعانى انىقتالىپ، سوت قوسىمشا 275 240 تەڭگە ايىپپۇل تاعايىندادى.

كەيىن وسى نىسان بويىنشا تاعى ءبىر شاعىم ءتۇسىپ، مانگالدان شىققان ءتۇتىن مەن كۇيە قايتادان تىركەلدى. تەكسەرۋ ناتيجەسىندە بۇزۋشىلىقتار تاعى راستالدى. «قۇلاگەر» جشس-نە 314 560 تەڭگە مولشەرىندە ايىپپۇل سالىندى، ماتەريالدار مانگالدى پايدالانۋعا تىيىم سالۋ ماسەلەسىن سوتتا قاراستىرۋ ءۇشىن جولداندى. سوت قاتتى وتىن جاعاتىن مانگالدى پايدالانۋعا تىيىم سالۋ تۋرالى شەشىم قابىلدادى.

اۋداننىڭ سانيتارلىق-ەپيدەميولوگيالىق باقىلاۋ باسقارماسى مۇنداي قۇقىقبۇزۋشىلىقتاردى انىقتاۋ جانە جولىن كەسۋ جۇمىستارى جالعاساتىنىن اتاپ ءوتتى. ويتكەنى قاتتى وتىنمەن جۇمىس ىستەيتىن مانگالدار شامادان تىس ءتۇتىن شىعارىپ، اۋا ساپاسىن ناشارلاتادى جانە سانيتارلىق نورمالاردى ورەسكەل بۇزادى.

Abai.kz