2025 جىلى سۋارۋ ماۋسىمى قالاي ءوتتى: ناتيجە جاريالاندى

بۇگىن ورتالىق كوممۋنيكاتسيالار قىزمەتىنىڭ الاڭىندا وتكەن بريفينگتە سۋ رەسۋرستارىن رەتتەۋ، قورعاۋ جانە پايدالانۋ كوميتەتىنىڭ توراعاسى سەيىلبەك نۇرىمبەتوۆ 2025 جىلعى ۆەگەتاتسيا كەزەڭىنىڭ قورىتىندىسى مەن سۋ شارۋاشىلىعى سالاسىنداعى جاعداي تۋرالى باياندادى.

كوميتەت باسشىسىنىڭ ايتۋىنشا، ەلىمىزدە سۋدىڭ ەڭ ءىرى تۇتىنۋشىسى – اۋىل شارۋاشىلىعى سالاسى.

جالپى سۋ الۋدىڭ 60 پايىزى اگرارلىق سەكتورعا تيەسىلى، ونىڭ 77,6 پايىزى تۇراقتى سۋارۋ قاجەتتىلىكتەرىنە جۇمسالعان. نەگىزگى سۋ تۇتىنۋ كولەمىنىڭ باسىم بولىگى، ياعني 98 پايىزعا دەيىن، بەس وڭتۇستىك وڭىرگە – الماتى، جەتىسۋ، جامبىل، تۇركىستان جانە قىزىلوردا وبلىستارىنا تيەسىلى، – دەدى مينيسترلىك وكىلى.

نۇرىمبەتوۆتىڭ ايتۋىنشا، بيىل ۆەگەتاتسيا ماۋسىمى كۇردەلى كليماتتىق جاعدايدا ءوتتى. كوكتەمدە تەمپەراتۋرانىڭ ادەتتەن تىس جوعارى بولۋىنا بايلانىستى سۋارۋ ماۋسىمى ورتاشا مەرزىمىنەن 20 كۇن بۇرىن باستالعان.

رەسپۋبليكا بويىنشا ۆەگەتاتسيا كەزەڭىنىڭ قورىتىندىسىندا 1,2 ملن گەكتار جەر سۋارىلىپ، جالپى سۋ الۋ 11,01 ملرد تەكشە مەتردى قۇرادى.

الماتى جانە جەتىسۋ وبلىستارىن بىرگە العاندا 268 مىڭ گەكتاردان استام جەر سۋارىلدى. ونىڭ ىشىندە الماتى وبلىسىندا – 151 مىڭ گەكتار، جەتىسۋدا – 136 مىڭ گەكتار جەر سۋمەن قامتىلدى.

جامبىل وبلىسىندا تالاس وزەنىنىڭ باسسەينىندەگى ەگىستىك القاپتارى قىرعىزستانمەن كەلىسىلگەن كەستە بويىنشا شۋ جانە تالاس وزەندەرى ارقىلى سۋمەن قامتاماسىز ەتىلدى. سۋارۋ ماۋسىمىندا وبلىستا 78 مىڭ گەكتار جەر سۋارىلىپ، شامامەن 1 ملرد م³ سۋ الىندى.

قىزىلوردا وبلىسىندا سۋارمالى جەرلەردىڭ سۋمەن قامتاماسىز ەتىلۋى سىرداريا وزەنى باسسەينىندەگى اعىمداعى سۋ جاعدايىنا بايلانىستى بولدى. ۆەگەتاتسيا كەزەڭىندە 186,6 مىڭ گەكتار جەر سۋارىلىپ، 3,5 ملرد تەكشە مەتر سۋ پايدالانىلدى.

تۇركىستان وبلىسىندا سۋارۋ الاڭى 458 مىڭ گەكتاردى قۇراپ، الىنعان سۋ كولەمى 3,5 ملرد تەكشە مەتر بولدى.

كوميتەت توراعاسى وڭتۇستىك وڭىرلەردەگى سۋ قويمالارى قازىر جيناقتاۋ رەجيمىندە جۇمىس ىستەپ جاتقانىن اتاپ ءوتتى.

كوميتەت باسشىسىنىڭ ايتۋىنشا، پرەمەر-ءمينيستردىڭ ورىنباسارى قانات بوزىمباەۆتىڭ توراعالىعىمەن جامبىل، قىزىلوردا جانە تۇركىستان وبلىستارىندا الداعى سۋارۋ ماۋسىمىنا دايىندىققا ارنالعان ارنايى كەڭەس وتكەن.

كەڭەستە شارۋالار مەن جەرگىلىكتى اتقارۋشى ورگاندارعا كەلەر جىلى كۇتىلەتىن سۋ كولەمى جانە سۋ رەسۋرستارىنىڭ ازايۋىنىڭ ىقتيمال سالدارىن تومەندەتۋ شارالارى تۇسىندىرىلگەن.

قازاقستان جانە ورتالىق ازيا ەلدەرى ماماندارىنىڭ بولجامى بىردەي: كەلەسى ۆەگەتاتسيا ماۋسىمىندا سۋ كولەمى سوڭعى جىلدارمەن سالىستىرعاندا ازايۋى مۇمكىن. بۇل جاعداي اسىرەسە وڭتۇستىك وڭىرلەرگە قوسىمشا قاۋىپ توندىرەدى، سەبەبى ءدال وسى ايماقتاردا سۋ تاپشىلىعى بايقالۋى مۇمكىن، - دەدى سەيىلبەك نۇرىمبەتوۆ.

سۋ تاپشىلىعى تاۋەكەلىن ازايتۋ ماقساتىندا قىزىلوردا وبلىسىندا اۋىل شارۋاشىلىعى داقىلدارىن ءارتاراپتاندىرۋ جونىندەگى ارنايى جۇمىس توبى قۇرىلماق.

سۋ رەسۋرستارى جانە يرريگاتسيا مينيسترلىگى، اۋىل شارۋاشىلىعى مينيسترلىگى جانە جەرگىلىكتى اتقارۋشى ورگانداردىڭ ماماندارى بىرلەسىپ، الداعى ماۋسىمدا قولجەتىمدى سۋ كولەمىنە قاراي ىلعالدى كوپ قاجەت ەتەتىن داقىلداردىڭ ەگىس كولەمدەرىن قايتا قاراۋ، ولاردى وڭتايلاندىرۋ بويىنشا ناقتى شارالاردى ىسكە اسىرادى.

Abai.kz