جۇمىسشى ماماندىقتار جىلى:احمەت ياساۋي ۋنيۆەرسيتەتىندە يننوۆاتسيالىق عىلىمي -تەحنولوگيالىق سەسسيا ءوتتى
قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىندە ەڭبەك ادامدارىنىڭ مارتەبەسىن كوتەرۋگە، ولاردىڭ قوعامداعى ءرولىن ارتتىرۋعا جانە جۇمىسشى ماماندىقتاردىڭ بەدەلىن نىعايتۋعا باعىتتالعان يننوۆاتسيالىق عىلىمي-تەحنولوگيالىق سەسسيا جانە «ەڭبەك» فوتوكورمەسى ءوتتى. ءىس-شارا مەملەكەت باسشىسى قاسىم-جومارت توقاەۆتىڭ «جۇمىسشى ماماندىقتار جىلى» باستاماسى اياسىندا ۇيىمداستىرىلدى.
عىلىمي-تەحنولوگيالىق سەسسياعا وقۋشىلار، ستۋدەنتتەر، جاس ماماندار مەن جاڭاشىل يدەيا ۇسىنۋعا ىنتالى جاستار جينالىپ، ءوڭىردىڭ وزەكتى ماسەلەلەرىن شەشۋگە باعىتتالعان جوبالارىن ورتاعا سالدى. ءىس-شاراعا قاتىسقان 20-عا جۋىق كوماندا اۋىل شارۋاشىلىعى، ەكولوگيا جانە تسيفرلاندىرۋ باعىتتارى بويىنشا ناقتى ءارى قولدانبالى شەشىمدەر ۇسىندى. قاتىسۋشىلار قىسقا ۋاقىت ىشىندە يدەيانى پىسىقتاپ، ونى يننوۆاتسيالىق جوباعا اينالدىرۋ ارقىلى وزدەرىنىڭ كاسىبي بىلىكتىلىگى مەن كوماندالىق جۇمىس داعدىلارىن كورسەتتى.
(سۋرەت:https://www.gov.kz/)
ۇسىنىلعان جوبالار يدەيانىڭ وزەكتىلىگى، تەحنيكالىق جۇزەگە اسىرىلۋ دەڭگەيى، جاڭاشىلدىعى، پراكتيكالىق ماڭىزدىلىعى جانە تانىستىرىلىم ساپاسى بويىنشا ساراپشىلار تاراپىنان باعالاندى. يننوۆاتسيالىق عىلىمي-تەحنولوگيالىق سەسسيا جاس تالانتتاردى قولداۋعا، جاڭا باستامالاردى دامىتۋعا جانە ۋنيۆەرسيتەتتىڭ يننوۆاتسيالىق ەكوجۇيەسىن نىعايتۋعا باعىتتالعان ءتيىمدى الاڭعا اينالدى.
سونداي-اق وقۋ ورنىندا وتكەن «ەڭبەك» فوتوكورمەسى ەڭبەك ادامىن دارىپتەۋگە ارنالدى. كورمەدە 40-قا جۋىق كەيىپكەردىڭ كۇندەلىكتى ەڭبەگى بەينەلەنگەن فوتوسۋرەتتەر قويىلدى. اتاپ ايتقاندا، وقۋ ورنىنىڭ شارۋاشىلىق-تەحنيكالىق سالاسىندا ەڭبەك ەتەتىن قىزمەتكەرلەرىنە ەرەكشە نازار اۋدارىلدى. ولاردىڭ قاتارىندا ۋنيۆەرسيتەت اشىلعالى بەرى 30 جىلدان استام ۋاقىت ەڭبەك ەتىپ كەلە جاتقان تاجىريبەلى ماماندار بار.
«ۋنيۆەرسيتەتىمىزدە 400-گە جۋىق جۇمىسشى مامان قىزمەت اتقارادى. ولاردىڭ اراسىندا وقۋ وردامىزدا 10-30 جىلدان استام ۋاقىتتان بەرى ەڭبەك ەتىپ جۇرگەن ماماندار بار. سوندىقتان ولارعا ارناپ بۇگىنگىدەي جوبا دايىندادىق. جۇمىسشى ماماندارىمىزدىڭ ماڭداي تەرى مەن ادال ەڭبەگى قۇرمەتكە لايىق. ۋنيۆەرسيتەتتىڭ دامۋىنا ۇلەس قوسىپ جۇرگەن بارشا جانعا ۇلكەن العىس بىلدىرەمىن!» – دەدى ۋنيۆەرسيتەت رەكتورى جانار تەمىربەكوۆا.
Abai.kz
