قاراعاندى وبلىسىندا «زاڭ جانە ءتارتىپ» يدەولوگەماسى اياسىندا تۇرعىنداردىڭ قۇقىقتىق ساۋاتتىلىعىن ارتتىرۋعا باعىتتالعان «قۇقىقتىق ءتارتىپ الىپپەسى» اكتسياسى جۇيەلى تۇردە جالعاسۋدا. 

ءىس-شارا بارىسىندا ءماسليحات دەپۋتاتتارى، قوعامدىق بەلسەندىلەر، جاستار كوشباسشىلارى، بۇقارالىق اقپارات قۇرالدارىنىڭ وكىلدەرى مەن بلوگەرلەر وبلىستىق دەڭگەيدەگى باسقارمالاردىڭ قىزمەتىمەن ىشكى فورماتتا تانىستى. اتالعان كەزدەسۋ وبلىستىق پروكۋراتۋرا جانىنداعى جوبالىق وفيس جۇرگىزىپ وتىرعان كەشەندى جۇمىستىڭ ءبىر بولىگى بولىپ تابىلادى. بۇل الاڭدا كۇن سايىن حالىققا ارنالعان اقپاراتتىق ءىس-شارالار، دارىستەر مەن پروفيلاكتيكالىق كەزدەسۋلەر وتكىزىلەدى.

– بۇگىن ءبىز «قۇقىقتىق ءتارتىپ الىپپەسى» اكتسياسىن وبلىس اكىمدىگىنىڭ الاڭىندا جالعاستىرىپ وتىرمىز. بۇل باستاما «زاڭ جانە ءتارتىپ» تۇجىرىمداماسىنىڭ نەگىزگى ماقساتتارىن جۇزەگە اسىرۋعا باعىتتالعان. اتاپ ايتقاندا، زاڭ ۇستەمدىگىن نىعايتۋ، مەملەكەتتىك ورگاندار قىزمەتىنىڭ اشىقتىعىن قامتاماسىز ەتۋ جانە ازاماتتاردىڭ بيلىككە دەگەن سەنىمىن ارتتىرۋ، – دەدى قاراعاندى وبلىسى پروكۋرورىنىڭ ورىنباسارى ەدىل جۇبانوۆ.

قاتىسۋشىلارعا قۇتتىقتاۋ ءسوز سويلەگەن وبلىس اكىمىنىڭ ورىنباسارى الىبەك الدەنەي اكتسيانىڭ قوعام اراسىندا كەڭ قولداۋ تاۋىپ كەلە جاتقانىن اتاپ ءوتتى.

– الەۋمەتتىك جەلىلەردە جاريالانعان ماتەريالداردا قۇقىق قورعاۋ ورگاندارىنىڭ ازاماتتاردىڭ قۇقىقتارى مەن زاڭدى مۇددەلەرىن قورعاۋداعى ناقتى جۇمىسى كورىنىس تاۋىپ، بۇل ءوز كەزەگىندە حالىقتىڭ مەملەكەتتىك ورگاندارعا دەگەن سەنىمىنىڭ ارتۋىنا ىقپال ەتتى، – دەدى ول.

اكتسيا اياسىندا كەلۋشىلەر ءۇشىن التى باسقارمانىڭ ەسىگى اشىلدى. اتاپ ايتقاندا، قۇرىلىس جانە ساۋلەت، كاسىپكەرلىك جانە ونەركاسىپ، تۇرعىن ءۇي-كوممۋنالدىق شارۋاشىلىق جانە ەنەرگەتيكا، اۋىل شارۋاشىلىعى، جۇمىسپەن قامتۋدى ۇيلەستىرۋ جانە الەۋمەتتىك باعدارلامالار، سونداي-اق دەنساۋلىق ساقتاۋ باسقارمالارى.

شىعۋ فورماتىنداعى ءىس-شارالار بارىسىندا مەملەكەتتىك ورگانداردىڭ حالىقپەن ءوزارا ءىس-قيمىلى ناقتى كورسەتىلدى. قاتىسۋشىلار قالالىق مانساپ ورتالىعىنىڭ جۇمىسىمەن تانىسىپ، گرانت يەگەرلەرىمەن جانە مەملەكەتتىك باعدارلامالار شەڭبەرىندە قولداۋ العان تۇرعىندارمەن پىكىر الماستى.

ەمحانالار مەن جەدەل جاردەم قىزمەتتەرىنە بارىپ، مەديتسينالىق قىزمەت كورسەتۋ جۇيەسىنىڭ قالاي جۇمىس ىستەيتىنىن كوزبەن كوردى.

باعدارلاما مازمۇنى جاعىنان اۋقىمدى بولدى. اكتسياعا قاتىسۋشىلار ءبىلىم بەرۋ نىساندارىنىڭ قۇرىلىسى مەن مەملەكەتتىك ارحيۆ عيماراتىن قايتا جاڭعىرتۋ بارىسىن باقىلادى.

سونىمەن قاتار ونەركاسىپ جانە ساۋدا سالاسىنداعى بىرقاتار نىساندارعا باردى. اتاپ ايتقاندا، رەزەڭكە-تەحنيكالىق بۇيىمدار وندىرەتىن زاۋىتقا، «TEEZ» ەلەكتروندى ماركەتپلەيسىنىڭ الاڭىنا، سونداي-اق تۇراقتاندىرۋ قورىنا ساتىپ الىنعان ازىق-تۇلىك ساقتالاتىن «سارىارقا» اكك» اق-نىڭ قويما كەشەنىنە ەكسكۋرسيالار ۇيىمداستىرىلدى.

قوعام وكىلدەرىنىڭ پىكىرىنشە، مۇنداي اشىق فورمات مەملەكەتتىك جانە قۇقىق قورعاۋ ورگاندارىنىڭ قىزمەتىن تەرەڭىرەك تۇسىنۋگە مۇمكىندىك بەرەدى.

بۇل ازاماتتار مەن مەملەكەت اراسىنداعى سەنىمدى نىعايتىپ قانا قويماي، قۇقىقتىق مادەنيەتتى قالىپتاستىرۋعا جانە زاڭعا باعىنۋ قاعيداتتارىن قوعامدا ورنىقتىرۋعا ىقپال ەتەدى.

Abai.kz