«قازاقستاننىڭ ءوز اۋماعىندا ناتو ستاندارتىنداعى ارتيللەريالىق سناريادتار ءوندىرىسىن جولعا قويۋ شەشىمى - «رەسەيگە قاتىستى دوستىققا جاتپايتىن قادام»، - دەپ مالىمدەدى مەملەكەتتىك دۋما قورعانىس كوميتەتى توراعاسىنىڭ ءبىرىنشى ورىنباسارى الەكسەي جۋراۆلەۆ.

«ءبىز باۋىرلاس رەسپۋبليكا ورىس تىلىنەن عانا ەمەس، كيريلليتسادان دا باس تارتقانىن بايقاماۋعا تىرىسامىز. كيەۆتە بوي كوتەرگەن «مىزعىماس كيىز ۇيلەرى» قازاقتاردىڭ ۋكراينانى قالاي قولداپ وتىرعانىن تانىتسا، ال ەندى وق-دارىلەر ءوندىرىسىن ناتو-لىق ستاندارتتارعا كوشىرۋدىڭ استارىندا، بۇل ەل بولاشاقتا رەسەيلىك قارۋ-جاراق ۇلگىلەرىنەن باس تارتىپ، ولاردى باتىستىق ۇلگىلەرمەن الماستىرۋعا قۇلىق تانىتۋى جاتقانى انىق»، - دەدى جۋراۆلەۆ.

ول 1992 جىلى قازاقستان سولتۇستىك اتلانت ىنتىماقتاستىعى كەڭەسىنە ەنگىزىلگەنىن، ال 1994 جىلى ەل ناتو-مەن «بەيبىتشىلىك جولىنداعى ارىپتەستىك» دەپ اتالاتىن نەگىزدەمەلىك شارت جاساسقانىن ەسكە سالدى.

«بىردەن سۇراق تۋىندايدى - ناتو نەگە قازاقستانعا وسىنشاما قىزىعۋشىلىق تانىتادى؟ مۇمكىن ول رەسەيمەن شەكارالاس بولعاندىقتان جانە وسى ەلدەن كەزەكتى رۋسوفوبيالىق فورپوست ۇيىمداستىرۋعا بولاتىندىقتان شىعار؟ ناتو-مەن مۇنداي ىنتىماقتاستىقتىڭ اقىرى نە بولعانىن كيەۆ مىسالىنان ءبارىمىز دە بىلەمىز»، - دەدى جۋراۆلەۆ.

بۇعان دەيىن قازاقستاندىق جوعارى لاۋازىمدى اسكەري قىزمەتكەر «RTVI» تەلەارناسىنا قازىرگى ۋاقىتتا ەل ارمياسىنىڭ جاۋىنگەرلىك قابىلەتتىلىگى كەڭەس زامانىنان قالعان قارۋ-جاراق قويمالارىنا، سونداي-اق رەسەيلىك جەتكىزىلىمدەرگە بايلانىستى ەكەنىن حابارلاعان بولاتىن.

ءوزىن سناريادتارمەن قامتاماسىز ەتۋ ءۇشىن قازاقستان «ASPAN» ۇلتتىق جوباسى اياسىندا رەسەيلىك ۇلگىدەگى عانا ەمەس، ناتو ستاندارتتارىنداعى ارتيللەريالىق وق-دارىلەر مەن مينالاردى شىعاراتىن ءتورت اسكەري زاۋىت سالۋدى ءجون دەپ شەشكەن. جوبانىڭ جالپى قۇنى شامامەن $1 ملرد، ال ءبىرىنشى زاۋىت 2027 جىلى ىسكە قوسىلادى.

وسىنىڭ ءبارى مەملەكەتتىك دۋما قورعانىس كوميتەتى توراعاسىنىڭ ءبىرىنشى ورىنباسارى الەكسەي جۋراۆلەۆتىڭ جىنىنا ءتيدى.

ءبىر ەمەس، ەكى ەمەس، بىرنەشە مارتە قازاقستاننىڭ ىشكى ىسىنە ارالاسىپ، داۋلى مالىمدەمە جاساعان رەسەي دەپۋتاتى الەكسەي جۋراۆلەۆكە قازاقستانعا كىرۋگە تىيىم سالاتىن ۋاقىت جەتتى. قازاقستاننىڭ قۇزىرلى ورگاندارى ناقتى شارا قابىلداۋى كەرەك-اق!

Abai.kz