ماڭعىستاۋ وبلىستىق ءبىلىم باسقارماسىنىڭ ۇيىمداستىرۋىمەن مۇنايلى اۋدانى №20 جالپى ءبىلىم بەرەتىن مەكتەبىندە «تالقىLike» پودكاست-ستۋدياسىنىڭ سالتاناتتى اشىلۋ ءراسىمى ءوتتى، دەپ حابارلايدى قوعامدىق كوممۋنيكاتسيا ورتالىعى.

ءىس-شاراعا ماڭعىستاۋ وبلىستىق ءبىلىم باسقارماسىنىڭ وكىلدەرى، وبلىستىق قوعامدىق كەڭەس مۇشەلەرى، مۇنايلى اۋدانىنىڭ جاستار ساياساتى سالاسىنىڭ ماماندارى، مەكتەپ اكىمشىلىگى، جاس پەداگوگتەر مەن وقۋشىلار قاتىستى.

-جوبانىڭ نەگىزگى ماقساتى - وقۋشىلاردىڭ شىعارماشىلىق جانە كوممۋنيكاتيۆتىك قابىلەتتەرىن دامىتۋ، سوڭعى ۇلىگدەگى مەديا قۇرالدارىن ءتيىمدى پايدالانۋعا ۇيرەتۋ، سونداي-اق اقپاراتتىق ساۋات پەن سىني ويلاۋ داعدىلارىن قالىپتاستىرۋ، - دەدى مۇنايلى اۋدانى №20 جالپى ءبىلىم بەرەتىن مەكتەبىنىڭ ديرەكتورى كامشات بايساگەنوۆا.

«تالقىLike» باعدارلاماسى اياسىندا وقۋشىلار جۋرناليستيكا، مەديا جانە تسيفرلىق كونتەنت ءوندىرۋ سالالارىنا بەيىمدەلىپ، ءوز وي-پىكىرىن ەركىن جەتكىزۋگە، قوعامدىق جانە ءبىلىم بەرۋ تاقىرىپتارىندا ساپالى اۋديو-كونتەنت ازىرلەۋگە مۇمكىندىك الادى. سونىمەن قاتار، پودكاست-ستۋديا مەكتەپ ومىرىندەگى ماڭىزدى جاڭالىقتار مەن جەتىستىكتەردى، تاربيەلىك جانە تانىمدىق باعىتتاعى تاقىرىپتاردى كەڭىنەن ناسيحاتتاۋعا باعىتتالعان.

سۋرەت:ۇيىمداسترۋشىلاردان الىندى

باعدارلاما اپتاسىنا ەكى رەت «YouTube» پلاتفورماسىندا تىكەلەي ەفيردە كورسەتىلەدى. پودكاست جۇرگىزۋشىلەرى – مەكتەپتىڭ جاس ماماندارى. باعدارلاما قوناقتارى رەتىندە جەتىستىككە جەتكەن مۇعالىمدەر مەن بەلسەندى وقۋشىلار شاقىرىلادى. الداعى ۋاقىتتا جۋرناليستيكا سالاسىنا قىزىعۋشىلىق تانىتقان وقۋشىلاردى پودكاست جۇرگىزۋشىلىگىنە باۋلۋ جوسپارلانىپ وتىر.

«تالقىLike» باعدارلاماسىنىڭ العاشقى شىعارىلىمىنىڭ قوناقتارى وبلىستىق قوعامدىق كەڭەس مۇشەسى شىنار قۇرمەت، وڭىرلىك ءبىلىم باسقارماسىنىڭ ءباسپاسوز حاتشىسى بوتاگوز قازبەكوۆا جانە مۇنايلى اۋدانى جاستار ساياساتى ءبولىمىنىڭ باسشىسى اينۇر جاقسىلىقوۆا بولدى.

ايتا كەتەيىك، جوبا وقۋشىلاردىڭ شىعارماشىلىق الەۋەتىن ارتتىرىپ، ءبىلىم بەرۋ ۇيىمدارىندا زاماناۋي مەديا كەڭىستىكتى دامىتۋعا ىقپال ەتەتىن ماڭىزدى باستامالاردىڭ ءبىرى بولماق.

Abai.kz