ءماجىلىس كرەاتيۆتى يندۋستريالاردى قولداۋ جانە دامىتۋ ماسەلەلەرى تۋرالى زاڭدى ەكىنشى وقىلىمدا قابىلدادى.

دەپۋتاتتار باستاماشى بولعان زاڭدا كرەاتيۆتى يندۋستريا قىزمەتكەرلەرىنىڭ قۇقىن قورعاۋ نورمالارى قاراستىرىلعان.

قۇجات 12 قاراشادا ءبىرىنشى وقىلىمدا ماقۇلداندى. تۇزەتۋلەر اياسىندا «مادەنيەت تۋرالى»، «مەملەكەتتىك جاستار ساياساتى تۋرالى» جانە «كينەماتوگرافيا تۋرالى» زاڭدارعا وزگەرىستەر ەنگىزىلەدى.

«كرەاتيۆتى يندۋستريا قىزمەتكەرى» جانە «كرەاتيۆتى يندۋستريا سۋبەكتىلەرىنىڭ ءتىزىلىمى» سىندى جاڭا ۇعىمدار قوسىلادى. مادەنيەت جانە اقپارات مينيسترلىگىنىڭ كرەاتيۆتى يندۋستريالار سالاسىنداعى جوبالارعا جەكە ينۆەستيتسيا تارتۋ مونيتورينگىن جۇرگىزۋ قۇزىرەتى ناقتىلانادى.

اكىمدىكتەرگە كرەاتيۆتى يندۋستريا سالاسىنداعى كاسىپكەرلىكتى دامىتۋ ارقىلى ونىڭ الەۋەتتى ارتتىرۋ، تالانتتاردى دامىتۋعا جاعداي جاساۋ قۇزىرەتى بەرىلەدى. شىعارماشىلىق جانە كاسىبي ەركىندىكتى دامىتۋ ماقساتىمەن كرەاتيۆتى يندۋستريا قىزمەتكەرلەرىنىڭ قۇقىن قورعاۋ نورمالارى قامتىلعان.

سونداي-اق جاستاردى كرەاتيۆتى يندۋستريا سالاسىنا تارتۋ بويىنشا مەملەكەتتىك جاستار ساياساتىنىڭ نەگىزگى باعىتتارى ايقىندالادى.

شەتەلدىك ارتىستەر قاتىساتىن ويىن-ساۋىق، مادەني-بۇقارالىق ءىس-شارالاردى وتكىزۋ كەزىندەگى ۇيىمداستىرۋشىلاردىڭ قىزمەتى رەگلامەنتتەلەدى. سونىمەن قاتار كينوپروكاتقا شىعاتىن فيلمدەرگە پروكات كۋالىگىن بەرۋ ءتارتىبى وزگەرەدى.

Abai.kz