جاقىندا رەسەي استاناسى ماسكەۋدە مەن ءوزىم وقىپ بىتىرگەن كينەماتوگرافيستەر ينستيتۋتىندا (ۆگيك) كينوگەرلەر وداعىنىڭ سەزى ءوتىپتى، كينوعا قاتىسىم بولعان سوڭ وسى جاڭالىق تۋرالى ايتقىم كەلدى. كينوگەرلەر وداعى رەسەيدە وتە ۇلكەن ورىن الاتىنى ءسوزسىز جانە مادەنيەتتىك ىقپالى زور دەۋگە بولادى. كەيبىرەۋلەر بوتەن بىرەۋلەردىڭ سەزىندە نە شاتاعىمىز بار دەۋى مۇمكىن، بىراق بۇنداي كورشى ەلدىڭ مادەنيەت ومىرىندەگى ءىرى شارا ءبىزدىڭ مادەنيەتتەگى جاعدايعا دا اسەر ەتەتىنى ءسوزسىز، ويتكەنى بەلشەمىزدەن رەسەيگە بايلانىپ قالعان ەكونوميكامىز بەن بيلىگىمىزدىڭ ارقاسىندا امالسىز كورشىنىڭ بولىپ جاتقان ءار قيمىل قوزعالىسىنا ءمان بەرۋگە تۋرا كەلەدى. اسىرەسە ولاردىڭ مادەنيەت پەن ونەردەگى وزگەرىستەرى ءبىزدىڭ دە قوعامعا اسەرى مول ەكەنىن ەسكەرسەك. ۇلكەن كورشىنىڭ مادەنيەتتەگى يدەولوگيالىق ۇستانىمى مەن باعىتى ءبىزدىڭ مەملەكەتتىك اقپاراتتىق كەڭىستىكتە باسىمدىعى زور بولعاندىقتان ءبىزدىڭ قوعام ساعات سايىن سولاردىڭ ناسيحاتىنا تاۋەلدى، ال ناسيحات قوعامدى تاربيەلەيدى.

رەسەي كينوگەرلەر وداعىنىڭ سەزدەرىندەگى قويىلعان باستى باعىتى ۇلتتىق كينونى بيىك دەڭگەيدە دامىتۋ، مادەني يدەولوگيانىڭ باستى ناسيحاتى سوعىستى (سۆونى) دارىپتەۋ، باسقىنشى ساياساتتى مەيلىنشە قاسيەتتى ەتىپ كورسەتۋ، تيتۋلدىق حالىقتىڭ پاك جانە تازا كەلبەتىن ۇگىتتەۋ! مىنە قانداي وراسان زور باعىت قويىلعان، ال ەندى وسى يدەولوگيالىق ۇلكەن دۇنيە بىزگە اسەر ەتە مە؟ البەتتە، اسەر ەتپەك تۇرماق قوعامىمىزعا باتپانداپ كىرىپ، الاقايلاپ جايلايتىنى انىق، ويتكەنى ءبىزدىڭ كينومىز دا، تەلەديدارىمىز دا، اقپاراتتىق كەڭىستىگىمىز دە وسى "ۇلى كورشىمىزدىڭ" تابانىنىڭ استىندا.

وسكەلەڭ ۇرپاعىمىز بەن جاستارىمىز رەسەيدىڭ قاندىقول سوعىسقۇمار باسقىنشى ساياساتىن جان-تانىمەن قابىلداپ، ونىڭ قىلمىستىق تىرشىلىگىنە ءسۇيسىنىپ ۋلانسا ورعا جىعىلعانىمىز دا...

اسىرەسە كينوگەرلەر وداعىن باسقاراتىن جانە قايتا باسشى بولىپ سايلانعان 80 جاستاعى ن. ميحالكوۆتىڭ ورنى ءتىپتى بولەك، بۇل كەزىندە وتە تالانتى كينورەجيسسەر بولعان تۇلعا، قازىرگى كۇندە "سوعىسقۇمار" ساياساتتىڭ اتاسى، "ورىس شوۆينيزمىنىڭ" باس قولداۋشىسى، اقپاراتتىق كەڭىستىكتەگى "شايتانسوققىش" (بەساگون) ساردار. وسى سوقىر سوعىستى (سۆونى) دارىپتەيتىن "اقساقال" ءارى قاراي رەسەيدىڭ اگرەسسيۆتىك، ميليتاريستىك باعىتىن ۇلكەن دەڭگەيگە كوتەرۋگە بارلىق كۇشىن سالماق ەكەن.

مىنە، وسىنداي اگرەسسيۆتى "مادەني ەكسپانسيا" جۇرگىزەتىن مەملەكەتتىڭ استىندا وتىرعان قازاقستاننىڭ جاعدايى نە بولماق دەگەن ۇرەي تۋادى وسىندايدا. ءبىزدىڭ مادەنيەت پەن اقپارات مينيستىرلىگى ۇلتتىق كينوعا دۇرىس ءمان بەرەر مە ەكەن، الدە تابىس ىزدەپ كومەديا مەن كوممەرتسياعا جول بەرىپ، "ۇلكەن كورشىنىڭ" ۇگىت ناسيحاتىنا قاۋقارسىز قاراپ وتىرا ما؟

اقپارات قوعامدىق قارۋ بولسا، مادەنيەت قوعامدىق يدەولوگيالىق قالقان.

ءسابيت قۇرمانبەك، رەجيسسەر

Abai.kz