اق ءۇي گرەنلانديانى يەمدەنۋ اقش-تىڭ "ۇلتتىق قاۋىپسىزدىك باسىمدىقتارىنىڭ" ءبىرى ەكەنىن مالىمدەپ، بۇل ماقساتقا جەتۋ ءۇشىن اقش قارۋلى كۇشتەرىن پايدالانۋ مۇمكىندىگى دە قاراستىرىلىپ وتىرعانىن ايتتى.

اق ءۇيدىڭ ءباسپاسوز حاتشىسى كەرولاين ءليۆيتتتىڭ ايتۋىنشا، پرەزيدەنت ترامپ گرەنلانديانى يەمدەنۋ امەريكا قۇراما شتاتتارىنىڭ ۇلتتىق قاۋىپسىزدىگى ءۇشىن اسا ماڭىزدى ەكەنىن جانە اركتيكا ايماعىندا قارسىلاستاردى تەجەۋ شەشۋشى مانگە يە ەكەنىن اشىق بىلدىرگەن.

پرەزيدەنت پەن ونىڭ كومانداسى وسى ماڭىزدى سىرتقى ساياسي ماقساتقا جەتۋدىڭ بىرنەشە نۇسقاسىن تالقىلاپ جاتىر. ارينە، اقش قارۋلى كۇشتەرىن قولدانۋ مۇمكىندىگى باس قولباسشىنىڭ قۇزىرىندا ءاردايىم بار، — دەلىنگەن مالىمدەمەدە.

اق ءۇيدىڭ بۇل مالىمدەمەسى ەۋروپاداعى نەگىزگى وداقتاستار، ونىڭ ىشىندە دانيا، بىرلەسكەن ۇندەۋ جاساپ، گرەنلانديانىڭ ەگەمەندىگى مەن اۋماقتىق تۇتاستىعىن قورعاۋدان «باس تارتپايتىنىن» مالىمدەگەننەن كەيىن جاسالدى.

اق ءۇيدىڭ جوعارى لاۋازىمدى وكىلى NBC News-كە بەرگەن اقپاراتىندا قاراستىرىلىپ جاتقان نۇسقالاردىڭ قاتارىندا گرەنلانديا اۋماعىن دانيادان ساتىپ الۋ نەمەسە ارالمەن "ەركىن قاۋىمداستىق تۋرالى كەلىسىم" دەپ اتالاتىن شارت جاساسۋ بار ەكەنىن ايتتى.

اقش بۇعان دەيىن مارشالل ارالدارى رەسپۋبليكاسىمەن، ميكرونەزيا فەدەراتيۆتىك شتاتتارىمەن جانە پالاۋ رەسپۋبليكاسىمەن وسىنداي كەلىسىمدەر جاساعان. بۇل كەلىسىمدەر اقش-قا قاۋىپسىزدىك كۇشتەرىن ورنالاستىرۋعا رۇقسات بەرۋ ەسەبىنەن قارجىلاي كومەك كورسەتۋدى كوزدەيدى.

بۇعان دەيىن اق ءۇيدىڭ اعا كەڭەسشىسى ستيۆەن ميللەردىڭ جۇبايى كەتي ميللەر X الەۋمەتتىك جەلىسىندە گرەنلانديا كارتاسىن اقش تۋىنىڭ تۇستەرىمەن بوياپ، «جاقىندا» دەگەن جازۋمەن جاريالاعانى حابارلانعان بولاتىن. ال دانيا ءوز كەزەگىندە ترامپ اكىمشىلىگىن قوقان-لوققىنى توقتاتۋعا شاقىردى.

Abai.kz