مۇعادجارلىقتاعى (ەميگراتسياداعى) يراننىڭ مۇراگەر حانزاداسى رەزا پەحلەۆي يسلام رەسپۋبليكاسىنىڭ كۇش قۇرىلىمدارىن حالىق جاعىنا وتۋگە شاقىرىپ، مۇنى «ۇلتتىق بورىش» دەپ اتادى.

«بۇل يراننىڭ قارۋلى كۇشتەرى مەن قاۋىپسىزدىك كۇشتەرىنە تىكەلەي ۇندەۋ. ءسىز يران ۇلتىن قورعاۋ ءۇشىن اسكەري كيىم كيدىڭىز جانە ءسىز ايقىن، تاريحي تاڭداۋ الدىندا تۇرسىز. يراننىڭ باتىل حالقى تاريح جازىپ جاتقان كۇندەرى مەنىڭ سىزدەرگە سۇراعىم: تاريحتىڭ قاي جاعىندا تۇراسىز؟ قىلمىسكەرلەرمەن بىرگە مە، الدە حالىقپەن بىرگە مە؟

ەڭ باستى ماسەلە - يسلام رەسپۋبليكاسىنىڭ قۇلاۋىندا ەمەس، ونىڭ جەمقورلىق پەن رەپرەسسيالىق رەجيمگە اينالعانىندا. وسى شەشۋشى ساتتە مەن سىزدەردىڭ ۇلتتىڭ قۇشاعىنا ورالىپ، قارۋلارىڭىزدى حالىققا اتۋ ءۇشىن ەمەس، ونى قورعاۋ ءۇشىن پايدالاناسىزدار دەيمىن! وسىلاي جاساي وتىرىپ، ءسىز تەك ءوزىڭىزدىڭ ۇلتتىق بورىشىڭىزدى عانا اتقارمايسىز، ءوز بولاشاقتارىڭىز بەن وتباسىلارىڭىزدىڭ بولاشاعىن قورعايسىزدار!

التى اي بۇرىن حالىققا ادالدىقتى قامتاماسىز ەتۋ ءۇشىن ۇلتتىق ىنتىماقتاستىق پلاتفورماسى قۇرىلدى. سىزدەردىڭ ىشىڭىزدەن مىڭداعان جان وعان تىركەلدى. يرانداعى ۇلتتىق كوتەرىلىستىڭ قايتا جاڭعىرۋى جانە كوپتەگەن جاڭا سۇرانىستاردىڭ تولىعۋىمەن بۇل پلاتفورما ارقايسىڭىزعا شۇعىل جاۋاپ بەرۋ ءۇشىن قايتا جاڭعىرتىلدى. ەگەر ءسىز بۇرىن تىركەلىپ، جاۋاپ الماعان بولساڭىز، وندا ونى قايىرا جاساۋىڭىزدى سۇرايمىن. قازىرگى ۋاقىتتا تىركەۋدىڭ جالعىز قاۋىپسىز ءتاسىلى - Iran International تەلەارناسىندا تىكەلەي ترانسلياتسيا كەزىندە QR-كودتى سكانەرلەۋ.

ءبىزدىڭ باتىل ۇلتىمىزدىڭ ءاربىر ازاماتى حالىققا وق اتقانداردىڭ جازالاناتىنىنا كامىل سەنىمدى بولسىن. يران ۇلتىن قولدايتىندار ۇلتتىق دەڭگەيدە قۇرمەتكە يە بولادى. يران امان بولسىن!».

Iran International تەلەارناسىنىڭ حابارلاۋىنشا:

شيرازداعى قاۋىپسىزدىك كۇشتەرى سارسەنبى كۇنى نارازى حالىققا وق اتقان.

بەندەر-ابباس پورتىنداعى قالا تۇرعىندارى مەن دۇكەن يەلەرى كوشەگە شىعىپ، حانزادا پەحلەۆيدى ماقتاپ، نارازىلىق ۇراندارىن ايتتى.

كەرمانشاحتا ازاد ۋنيۆەرسيتەتىنىڭ ستۋدەنتتەرى جوو اۋماعىنا جينالىپ، «ستۋدەنت ولەدى، بىراق قورلاۋدى قابىلدامايدى» دەگەن ۇراندار ايتۋدا. ديزەلاباد اۋدانىندا جانە موساددەك الاڭىندا ساۋداگەرلەر دۇكەندەردى جاۋىپ، كوشەگە شىقتى. قاۋىپسىزدىك كۇشتەرى كوزدەن جاس اعىزاتىن گاز قولدانىپ، نارازىلارعا وق اتقان. تۇرعىندار مەن كۇش قۇرىلىمدارىنىڭ اراسىندا قاقتىعىستار ورىن الىپ، اكتسياعا قاتىسۋشىلار وعان «ديكتاتورعا ءولىم» دەگەن ۇرانمەن جاۋاپ بەردى.

تەھەران، شيراز، قازۆين جانە باسقا قالالاردا ساۋداگەرلەر، زاۋىتتار مەن كاسىپورىنداردىڭ جۇمىسشىلارى جاپپاي ەرەۋىل جاريالاپ، نارازىلىققا شىقتى. قاۋىپسىزدىك كۇشتەرىمەن سوقتىعىسۋ تۋرالى حابارلانادى.

سونىمەن قاتار، بيلىك كۇش كورسەتۋىن ۇدەتە كۇشەيتۋدە. تەھەراننان دشك پۋلەمەتىمەن (دەگتيارەۆ-شپاگين ءىرى كاليبرلى پۋلەمەتى) جانە اۆتوماتتى قارۋمەن جاراقتاندىرىلعان 100-گە جۋىق ارنايى اۆتوكولىكتەن تۇراتىن كولوننا جىلجىعانى ءسوز ەتىلدى.

نارازىلىق اكتسيالارى يراننىڭ وڭتۇستىگىندەگى فاسا قالاسىندا دا ءوتتى. ميتينگىگە قاتىسۋشىلار «حامەنەي - كىسى ءولتىرۋشى، ونىڭ بيلىگى زاڭسىز» دەگەن ۇرانداردى ايقايلادى.

يران بيلىگى تەبريز، اردەبيل جانە زەندجان قالالارىنا قوسىمشا كۇش جۇمىلدىرۋدا. نارازىلىقتار مەن قاقتىعىستار كۇشەيۋدە.

Fox News: يرانداعى تاعى ءبىر قالا - مالەكشاحي قالاسى نارازىلاردىڭ باقىلاۋىنا ءوتتى. تولقۋلار ءورشي ءتۇستى. حالىق: «حامەنەيگە ءولىم» دەپ ۇرانداۋدا. كۇنى كەشە يرانداعى مۇنايلى ابادان قالاسى نارازى حالىقتىڭ باقىلاۋىنا وتكەن.

Abai.kz