قازاقستان سەناتىنىڭ دەپۋتاتتارى وزدەرى مەن وتباسى مۇشەلەرىنىڭ تابىسى تۋرالى دەكلاراتسيالاردى جاريالاي باستادى. «Bes.media» پورتالى 50 سەناتوردىڭ ىشىندە ءوز دەكلاراتسيالارىن اشىق جاريالاعان 4 سەناتوردىڭ قۇجاتتارىن ساراپتاپ شىعىپتى.

سونىمەن، سەناتورلار تابىس تۋرالى قۇجاتتارىندا قانداي دەرەكتەر كورسەتتى؟

سەناتور سۇلتان دۇيسەمبينوۆ ءوز دەكلاراتسياسىن اشىق جاريالاعان از دەپۋتاتتىڭ ءبىرى. قۇجاتتارعا سايكەس، دەپۋتاتتىڭ جۇبايى 2024 جىلى 5 ملن تەڭگە تابىس تاپقانىن اشىق كورسەتكەن.

ال تاعى ءبىر سەناتور نۇرلان بەكەننىڭ جۇبايى 11 ملن تەڭگە تابىس تاپقانىن جاريالاپتى.

راس-وتىرىگى وزىنە ايان، دەپۋتات ساعىندىق لۇقپانوۆ ءوز دەكلاراتسياسىندا 2024 جىلعى تابىسى 43 760 تەڭگە دەپ كورسەتكەن.

ال سەناتور زاكىرجان كۋزيەۆتىڭ جۇبايى دەكلاراتسيادا 3 274 602 تەڭگە تابىس تاپقانىن جازىپ كورسەتىپتى.

بۇعان دەيىن قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگى شەنەۋنىكتەردىڭ، پارلامەنت دەپۋتاتتارىنىڭ، سۋديالاردىڭ سالىق دەكلاراتسيالارىندا جاريالانعان دەرەكتەردىڭ ءتىزىمىن قىسقارتقان بولاتىن.

ەندى تەك جەكە تۇلعانىڭ سالىق سالىناتىن تابىسىنىڭ جالپى سوماسى مەن دەكلاراتسيا تاپسىرۋشى تۇلعانىڭ تولىق اتى-ءجونى كوپشىلىككە قولجەتىمدى بولادى. بۇعان دەيىن شەنەۋنىكتەر قازاقستانداعى جانە شەتەلدەگى مۇلىكتى ساتىپ الۋ جانە ساتۋ تۋرالى اقپاراتتى، شەتەلدىك بانكتەردەگى شوتتارى تۋرالى اقپاراتتى جانە مۇلىككە قاتىستى باسقا دا اقپاراتتى جاريالاۋعا مىندەتتى بولاتىن.

2024 جىلدىڭ قازان ايىنىڭ ورتاسىندا قارجى ءمينيسترى پرەزيدەنتتىڭ، پرەمەر-ءمينيستردىڭ، پارلامەنت سپيكەرلەرىنىڭ، ۇلتتىق قاۋىپسىزدىك كوميتەتى، باس پروكۋراتۋرا جانە ىشكى ىستەر مينيسترلىگى باسشىلارىنىڭ مالىمدەمەلەرىن قوسپاعاندا، دەكلاراتسيالاردى جاريالاۋ ساياسي شەنەۋنىكتەرگە مىندەتتى بولاتىنىن مالىمدەدى.

2025 جىلدىڭ 1 قاڭتارىنان باستاپ جالپىعا بىردەي تابىس پەن مۇلىك تۋرالى دەكلاراتسيانىڭ جاڭا ەرەجەلەرى كۇشىنە ەندى. مىسالى، دەكلاراتسيانىڭ ءتورتىنشى كەزەڭى جويىلدى: ەندى ازاماتتاردىڭ كوپشىلىگى كىرىس دەكلاراتسياسىن تاپسىرۋعا مىندەتتى ەمەس (250.00 نىسانى).

Abai.kz