ەكىنشى اپتاعا جالعاسىپ جاتقان يرانداعى تولقۋلار بۇگىندە ۋشىققان ۇستىنە ۋشىعا ءتۇستى. يراننىڭ جۇزدەگەن قالاسىندا نارازىلىقتار، كۇشتىك قۇرىلىمدارمەن قاقتىعىستار وتۋدە.

اسىرەسە كەشە تولقۋلار كۇشتى بولدى. ەڭ اۋقىمدىسى تەھەراندا ءوتتى. جارتى ميلليونعا جۋىق ادام كوشەگە شىقتى. قازىر نارازىلار مەن كۇشتىك قۇرىلىمدار اراسىندا قازا تاپقاندار سانى كوبەيۋدە. رەسمي 45 ادام ءولدى دەگەنمەن، ودان الدەقايدا كوپ بولۋى مۇمكىن.

كسير (ساقشىلار كورپۋسى) نارازىلارعا قارسى ۇرىس قارۋلارىن قولدانا باستاعانى ايتىلادى.

حالىق: «اياتوللاعا ءولىم»، «ديكتاتوردى قۇلاتۋ كەرەك»، «بىزگە گازا مەن ليۆان ەمەس، يراننىڭ ماسەلەسىن شەشۋ ماڭىزدى»، «پاحلەۆي بىزگە بوستاندىق سىيلايدى»، - دەپ ۇرانداۋدا.

شەرۋگە يرانداعى كۇردتەر مەن ءازىبايجاندار دا قوسىلۋدا. يران وپپوزيتسياسى جاپپاي نارازىلىقتى كۇشەيتۋگە شاقىردى. يرانداعى كۇردىستان ۇيىمدارى دا حالىقتى نارازىلىققا شىعۋعا شاقىرعان.

يران بيلىگى ينتەرنەتتى ءوشىردى. ال يران وپپوزيتسياسى ۇكىمەت عيماراتتارىن كۇشپەن باسىپ الۋعا شاقىرۋدا.

ترامپ: «ەگەر يراندا نارازى حالىق قىرىلاتىن بولسا، اقش تەھەرەنعا سوققى جاسايدى»، - دەدى.

اقش پرەزيدەنتى دونالد ترامپ «Fox News» تىلشىسىنە بەرگەن سۇحباتىندا: «يراننىڭ جوعارعى كوشباسشىسى ءالي حامەنەي ەلدەن كەتۋدى جوسپارلاپ وتىر»، - دەپ  مالىمدەدى.

حامەنەي رەسەيگە قاشۋعا نيەتتى دەگەن اقپاراتقا تۇسىنىك بەرە وتىرىپ: «ول (حامەنەي) ايتەۋىر ءبىر جەرگە كەتۋدى جوسپارلاپ وتىر»، - دەدى ترامپ.

بۇعان دەيىن بريتاندىق «The Times» گازەتى بارلاۋ بايانداماسىنا سىلتەمە جاساي وتىرىپ، يراندا اياتوللا ءالي حامەنەيدىڭ قاۋىپسىزدىك كۇشتەرى نارازىلىقتاردى باسا الماي، داعدىرسا نەمەسە قارۋلارىن تاستاسا، ونداي جاعدايدا حامەنەيدىڭ ماسكەۋگە كەتۋىنە ارنالعان قوسالقى جوسپارى ازىرلەنگەنىن حابارلاعان ەدى.

«The Times» گازەتىنە بارلاۋ دەرەككوزدەرى: «وسى قوسالقى جوسپار حامەنەي مەن ونىڭ اينالاسىنا، ونىڭ ىشىندە ۇلى مەن بولجامدى مۇراگەرى مودجتابۋعا دا ارنالعان»، - دەگەن اقپار تاراتتى.

جوسپار بويىنشا حامەنەي ءوزى عانا كەتپەي، اكتيۆتەرىن، شەتەلدەگى جىلجىمايتىن مۇلىكى مەن قولما-قول اقشاسىن الا كەتپەك.

امەريكالىق ساياساتتانۋشىلار: يرانداعى بۇلعاقتىق احۋالعا جانە جالپىۇلتتىق نارازىلىقتاردىڭ كەڭ قانات جايۋىنا سىلتەمە جاساي وتىرىپ، يسلام رەسپۋبليكاسىنىڭ باسشىلارىنىڭ شيپالارى ابدەن ءبىتىپ، تەك باس ساۋعالاپ ەلدەن كەتۋدى سوڭعى مۇمكىندىك كورىپ وتىرعانىن ايتادى.

Abai.kz