قازاقستان رەسپۋبليكاسى تۋريزم جانە سپورت مينيسترلىگىنىڭ ويىن بيزنەسىن جانە لوتەرەيانى رەتتەۋ كوميتەتى الەۋمەتتىك جەلىلەر مەن ونلاين-پلاتفورمالاردا زاڭسىز لوتەرەيا قىزمەتىن انىقتاۋ ماقساتىندا تۇراقتى مونيتورينگ جۇرگىزىپ كەلەدى.

مونيتورينگ ناتيجەسىندە جانە جەكە تۇلعالاردان كوميتەتكە كەلىپ تۇسكەن وتىنىشتەر نەگىزىندە 2025 جىلى 121 ادام قر اكىمشىلىك قۇقىق بۇزۋشىلىق تۋرالى كودەكسىنىڭ (اقبتك) 445-1-بابىنىڭ 6-بولىگى بويىنشا اكىمشىلىك جاۋاپكەرشىلىككە تارتىلدى.

زاڭسىز ۇتىس ويىندارىن ۇيىمداستىرعان تۇلعالارعا ەسكەرتۋ حاتتارى جولدانىپ، وفلاين جانە ونلاين فورماتتاردا ءتۇسىندىرۋ كەزدەسۋلەرى وتكىزىلدى. الەۋمەتتىك جەلىلەردە ۇتىس ويىندارىن وتكىزگەن اككاۋنتتاردىڭ ءتىزىمى مينيسترلىكتىڭ رەسمي سايتىندا جاريالانعان.

حاتتاما شەشىمىمەن كەلىسكەن جاعدايدا قۇقىق بۇزۋشىلار ايىپپۇلدى ءوز ەركىمەن تولەيدى. كەلىسپەگەن جاعدايدا ءىس سوتقا جولدانىپ، بەلگىلەنگەن تارتىپپەن قارالادى.

ەسكە سالا كەتسەك، قر اقبتك 445-1-بابىنىڭ 6 جانە 7-بولىكتەرىنە سايكەس، لوتەرەيا وپەراتورى ەمەس تۇلعا لوتەرەيا وتكىزەتىن بولسا، جەكە تۇلعالارعا 100 ايلىق ەسەپتىك كورسەتكىش (اەك), ال شاعىن كاسىپكەرلىك سۋبەكتىلەرىنە (جەكە كاسىپكەرلەرگە) 300 اەك مولشەرىندە ايىپپۇل قاراستىرىلعان. ءبىر جىل ىشىندە وسىنداي قۇقىق بۇزۋشىلىق قايتالانعان جاعدايدا ايىپپۇل مولشەرى جەكە تۇلعالارعا – 200 اەك، شاعىن كاسىپكەرلىك سۋبەكتىلەرىنە – 750 اەك بولىپ بەلگىلەنەدى. سونداي-اق اكىمشىلىك قۇقىق بۇزۋشىلىقتان تۇسكەن تابىس تاركىلەنەدى.

تۋريزم جانە سپورت مينيسترلىگى ازاماتتاردى الەۋمەتتىك جەلىلەردە ۇيىمداستىرىلاتىن كۇماندى ۇتىس ويىندارى مەن اكتسيالارعا قاتىسپاۋعا شاقىرادى.

Abai.kz