2025 جىلعى جەلتوقساندا كاسپي قۇبىر كونسورتسيۋمى (كتك) جۇيەسىندەگى شەكتەۋلەرگە بايلانىستى قازاقستان شامامەن 300 مىڭ توننا مۇنايدى وزگە ەكسپورتتىق باعىتتارعا قايتا باعىتتادى، دەپ حابارلايدى BAQ.KZ.

قازمۇنايگاز كومپانياسىنىڭ ءباسپاسوز قىزمەتىنىڭ مالىمەتىنشە، وتكەن جىلدىڭ سوڭىندا قازاقستاندىق مۇنايدى كتك ارقىلى قابىلداۋعا قويىلعان شەكتەۋلەرگە بايلانىستى شيكىزات "قازترانسويل" اق جۇيەسى ارقىلى بالاما ەكسپورتتىق باعىتتارعا جونەلتىلگەن.

– قازترانسويل جۇيەسى ارقىلى شامامەن 300 مىڭ توننا مۇناي ەكسپورتتىق باعىتتا جەتكىزىلدى. اتاپ ايتقاندا، گەرمانياعا، قىتايعا، باكۋ–تبيليسي–دجەيحان باعىتىمەن، سونداي-اق نوۆوروسسيسك پەن ۋست-لۋگا پورتتارى ارقىلى تاسىمالداندى. 2026 جىلدىڭ قاڭتار ايىندا كتك تاراپىنان مۇناي قابىلداۋ شەكتەۋلەرى ساقتالۋىنا بايلانىستى مۇنايدى قايتا باعىتتاۋ شارالارى جالعاسادى. قوسىمشا تاسىمالداۋ باعىتتارى پىسىقتالۋدا، – دەپ حابارلادى كومپانيادا.

سونىمەن قاتار، 2025 جىلدىڭ قورىتىندىسى بويىنشا قازاقستاندىق مۇنايدى گەرمانياعا جەتكىزۋ كولەمى ارتقانى اتاپ ءوتىلدى. اتاپ ايتقاندا، شۆەدت قالاسىنداعى مۇناي وڭدەۋ زاۋىتىنا 2,1 ملن توننا مۇناي جونەلتىلگەن. 2026 جىلى بۇل كورسەتكىشتى 2,5 ملن تونناعا دەيىن ۇلعايتۋ جوسپارلانىپ وتىر.

اقتاۋ پورتىنان باكۋ–تبيليسي–دجەيحان باعىتىمەن تاسىمالدانعان مۇناي كولەمى 1,3 ملن توننانى قۇرادى. ال 2026 جىلى اتالعان باعىتتاعى جەتكىزىلىم 1,6 ملن تونناعا دەيىن جەتۋى مۇمكىن.

بۇدان بولەك، قازاقستان مۇنايىن قىتاي حالىق رەسپۋبليكاسىنا ەكسپورتتاۋ تۇراقتى دەڭگەيدە ساقتالۋدا. 2025 جىلدىڭ قورىتىندىسى بويىنشا قحر-عا 1,1 ملن توننا مۇناي ەكسپورتتالعان.

ەسكە سالساق، بۇعان دەيىن قارا تەڭىزدە رەسەي جاعالاۋىنا جاقىن ورنالاسقان كاسپي قۇبىر كونسورتسيۋمى (كقك) تەرمينالى ماڭىندا مۇناي تانكەرلەرىنە بەلگىسىز ۇشقىشسىز ۇشۋ اپپاراتتارى شابۋىل جاساعان ەدى.

درون شابۋىلىنا ۇشىراعان تانكەرلەردىڭ ءبىرى – Delta Harmony كەمەسى گرەك كومپانياسى Delta Tankers باسقارۋىندا بولعان جانە ول Tengizchevroil كومپانياسىنىڭ قازاقستاندىق مۇنايىن تيەۋى ءتيىس ەدى. ال تاعى ءبىر كەمە – Matilda – Thenamaris كومپانياسىنا تيەسىلى جانە قاراشىعاناق كەن ورنىنان مۇناي تاسىمالداۋعا دايىندالعانىن ايتا كەتەيىك.

قر سىرتقى ىستەر مينيسترلىگىنىڭ رەسمي وكىلى ەرلان جەتىباەۆ قارا تەڭىزدەگى مۇناي تانكەرلەرىمەن بايلانىستى وقيعالار جونىندە مالىمدەمە جاسادى. مينيسترلىك 13 قاڭتاردا قارا تەڭىز اكۆاتورياسىندا كاسپي قۇبىرى كونسورتسيۋمىنىڭ تەڭىز تەرمينالىنا بەت العان ءۇش تانكەرگە ۇشقىشسىز ۇشۋ اپپاراتتارى ارقىلى جاسالعان شابۋىلدارعا بايلانىستى ايتارلىقتاي الاڭداۋشىلىق بىلدىرەتىنىن جەتكىزدى.

ءماجىلىس دەپۋتاتى ايدوس سارىم اتالعان جاعدايعا بايلانىستى شەۆرونمەن كەلىسسوز جۇرگىزۋدى ۇسىندى.

BAQ.KZ تىلشىسىنە ەكسكليۋزيۆ سۇحبات بەرگەن قازاقستان مۇناي سەرۆيستىك كومپانيالارى وداعى پرەزيديۋمىنىڭ توراعاسى راشيد جاقسىلىقوۆ كقك-نىڭ تۇراقسىز جۇمىسى ۇزاققا سوزىلسا، ونىڭ سالدارى بيۋدجەتتەن باستاپ، ۆاليۋتا نارىعىنا دەيىن سەزىلەتىنىن ايتادى.

Abai.kz