«ءادىل ءسوز» حالىقارالىق قورىنىڭ پرەزيدەنتى قارلىعاش جامانقۇلوۆا قىزىلوردادا ءوتىپ جاتقان V ۇلتتىق قۇرىلتايدا پارالمەنتتەگى ايەلدەر كۆوتاسىن ساقتاۋدىڭ ماڭىزى جونىندە پىكىر ءبىلدىردى.

كەشە ۇلتتىق قۇرىلتايدىڭ «ازاماتتىق قوعام» سەكتسياسىنىڭ وتىرىسى ءوتىپ، 26 قۇرىلتاي مۇشەسى ءوز ۇسىنىستارىن ورتاعا سالعان.

— پارلامەنتتى رەفورمالاۋ جونىندەگى جۇمىس توبىنىڭ مۇشەسى رەتىندە ونىڭ جۇيەلىك ماڭىزىن ايتپاي كەتۋ مۇمكىن ەمەس. قوس پالاتالى جۇيەدەن ءبىر پالاتالى مودەلگە كوشۋ ماسەلەسى ساراپشىلار اراسىندا ۇزاق ۋاقىت تالقىلانىپ كەلەدى جانە بۇگىندە كەڭ قوعامدىق قولداۋعا يە بولىپ وتىر. وسى ورايدا پارتيالىق تىزىمدەردەگى ايەلدەر كۆوتاسىن ساقتاۋدى ءوتىنىش رەتىندە ايتقىم كەلەدى، — دەدى قارلىعاش جامانقۇلوۆا پرەزيدەنت قاتىسۋىمەن ءوتىپ جاتقان V ۇلتتىق قۇرىلتايدا.

سپيكەر شەشىم قابىلداۋ جۇيەسىندەگى ايەلدەردىڭ قاتىسۋىن كەڭەيتۋ مەملەكەت باسشىسى تاراپىنان دايەكتى تۇردە قولداۋ تاۋىپ كەلە جاتقانىن اتاپ ءوتتى.

— 2022 جىلعى ساياسي رەفورمالار پاكەتى اياسىندا پارتيالىق تىزىمدەر مەن وكىلدى ورگاندارداعى كۆوتانى زاڭنامالىق تۇرعىدان بەكىتۋدى ءوزىڭىز ۇسىنعان ەدىڭىز. ايەلدەردىڭ زاڭ شىعارۋشى ورگاندارداعى تۇراقتى قاتىسۋى قابىلداناتىن شەشىمدەردىڭ ساپاسىن ارتتىرادى، كۇن ءتارتىبىن كەڭەيتەدى جانە وكىلدى ينستيتۋتتاردىڭ لەگيتيمدىگىن كۇشەيتەدى. سوندىقتان 2022 جىلى ءوزىڭىز نەگىزىن قالاعان ساياسي جۇيەنى جاڭعىرتۋ قاعيداتتارىنىڭ ينستيتۋتسيونالدىق تۇرعىدا بەكىپ، ساباقتاستىعىن قامتاماسىز ەتۋ تەتىگى رەتىندە ايەلدەر كۆوتاسىن 30% كولەمىندە ساقتاۋدى سۇرايمىن، — دەدى ق. جامانقۇلوۆا.

Abai.kz