ترامپتىڭ قىتاي مەن رەسەيدىڭ وداقتاسىنا اينالعان ۆەنەسۋەلا پرەزيدەنتى مادۋرونى تۇتقىنداۋمەن عانا شەكتەلمەي، كەلەسى كەزەكتە ىرگەسىندەگى كۋبا مەن كولۋمبيا باستى نىساناعا اينالاتىنى تۋرالى مالىمدەمەسى الەمدىك دەڭگەيدە قىزۋ تىلقىعا ءتۇستى. ساياسي ساراپشىلار ونى ترامپتىڭ «مونرو دوكتوريناسىن» قايتا ءتىرىلتۋى دەپ تاپسىرلەدى.

«بىرەۋ قويعا ايلانعاندا، بىرەۋ تويعا اينالىپتى» دەگەندەي، ەۋروپا باسشىلارىمەن ترامپ گرەنلانديا ماسەلەسىندە ورتاق تۇسىنىككە كەلە الماي، ءوزارا بەت جىرتىسىپ جاتقاندا رەسەي يدەولوگتارى ترامپتىڭ «مونرو دوكتوريناسىن» ءوز كادەلەرىنە جاراتۋعا بارىن سالۋدا.

قالاي دەيسىز عوي؟! ترامپتىڭ جاڭا گەوساياسي ستراتەگياسىندا ازيا مەن ەۋروپادان گورى امەريكا قۇرلىعىن باستى نازارعا الۋ ماقسات ەتىلگەنى سياقتى رەسەي دە بۇرىنعى كەڭەس قۇرامىندا بولعان ەلدەردى وزىنە قوسۋدى نەگىزگى ماقسات ەتۋى كەرەك-مىس. بۇل يدەيا بۇرىننان كرەمل تارابىنان ايتىلىپ جۇرگەنىمەن، ادەمدىك قاۋىمداستىقتاردان يمەنىپ كەلگەن ەدى. ەندى ترامپتىڭ بارلىق زاڭ-زاكوندى قايىرىپ قويىپ، ءبىر ەلدىڭ باسشىسىن بارىمتالاپ اكەتۋى كرەملدىڭ جىمىسقى جوسپارىنا داڭعىل جول سالعانداي. ونى بيلىككە جاقىن ورىس ۇلتشىلدارى اشىقتان-اشىق دارىپتەي باستادى.

كۇنى كەشە ايدىك دۋگين: «پوستكەڭەستىك كەڭىستىكتە تاۋەلسىز مەملەكەتتەردىڭ ءداۋىرى اياقتالدى»، - دەپ مالىمدەپ، ءوز بەتىنشە «تاۋەلسىز مەملەكەت رەتىندە ءومىر سۇرۋىنە جول بەرۋگە بولمايتىن ەلدەردىڭ ءتىزىمىن» جاساعانىن ناقتى مىسال رەتىندە ايتۋعا بولادى. ول تىزىمدە قازاقستان، وزبەكستان، قىرعىزستان، تاجىكستان، ارمەنيا، گرۋزيا جانە ازەربايجان بار.

«ەگەمەن ارمەنيانىڭ، ەگەمەن گرۋزيانىڭ، ەگەمەن ازەربايجاننىڭ، ەگەمەن قازاقستاننىڭ، وزبەكستاننىڭ، تاجىكستان مەن قىرعىزستاننىڭ بولۋىمەن كەلىسۋگە بولمايدى»، – دەي كەلە، ءسوزىن ارى قاراي: «ءبىزدىڭ ماقساتىمىز – ءۇشپوليۋستى الەمدە ەڭ ماڭىزدى كۇش ورتالىعى بولۋ. ەگەمەن، ەركىن، تاۋەلسىز ءارى اۋقىمدى مەملەكەتكە اينالۋ. ال ءبىز باقىلاۋىمىزعا الماعان اۋماقتار بەيتاراپ بولىپ قالماۋى كەرەك»، – دەپ تۇيىندەگەن.

كورىپ وتىرعانىمىزداي دۋگيننىڭ ترامپتىڭ «مونرو دوكتوريناسىن» قايتا تىرىلتۋىنەن شابىت العانى، الاقانىن ىسقىلاپ، جىمىسقى يدەياسىن تاعى دا ورتاعا تاستاعانى سوقىرعا تاياق ۇستاتقانداي انىق اڭعارىلىپ تۇر.

مۇنىڭ ەڭ جامان سالدارى جاھاندىق گەوساياساتتىڭ جاڭا باعىتىمەن كولەگەيلەنگەن سۇرقيا جوسپاردىڭ ءوز ازاماتتارىمىزدى دا يلاندىرا باستاعانى. قازاقستاندىق پەتر سۆويك You Tube-تاعى جەكە كانالىندا دۋگيننىڭ ءپاتۋاسىن اقتاي سويلەگەن. ونىڭ ويىنشا ترامپتىڭ گرەلانديانى قوسىپ الماق بولعانى سياقتى، دۋگيننڭڭ قازاقستاندى رەسەيگە قوسىپ الۋ ساندىراعى دا سونداي قيسىندى ەكەن.

قازاقستان تاۋەلسىزدىكتىڭ 35 جىلىنا قادام باسقاندا كوپ ۆەكتورلى سىرتقى ساياساتىمىز ءتۇرلى سىناقتارعا تاپ بولاتىن ءتۇرى بار. كرەملدىڭ بەيرەسمي يدەولوگتارى مەن وعان ءۇن قوسقان ءوز ىشىمىزدەگىلەردىڭ ارام پيعىلى سونىڭ ايعاعى.

Abai.kz