مەملەكەت باسشىسىنىڭ تاپسىرمالارى اياسىندا ەلىمىزدە الماتى تاۋ كلاستەرىن دامىتۋعا باعىتتالعان جۇيەلى شارالار جۇزەگە اسىرىلىپ، زاماناۋي تۋريستىك ينفراقۇرىلىمدى قالىپتاستىرۋ جانە ءوڭىردىڭ ينۆەستيتسيالىق تارتىمدىلىعىن ارتتىرۋ جۇمىستارى جۇرگىزىلۋدە.

قازاقستان رەسپۋبليكاسى ۇكىمەتى الماتى وبلىسىنداعى Oi-Qaragai تاۋ كۋرورتىن دامىتۋ جونىندەگى ينۆەستيتسيالىق كەلىسىم جاساسۋ تۋرالى قاۋلىنى بەكىتتى. جوبانى ىسكە اسىرۋ مەرزىمى – 2025-2028 جىلدار.

اتالعان جوبا جىل بويى قىزمەت كورسەتەتىن زاماناۋي تاۋ كۋرورتىن سالۋدى، تاۋ شاڭعى، تۋريستىك جانە سەرۆيستىك ينفراقۇرىلىمدى دامىتۋدى كوزدەيدى. تەحنولوگيالىق ۇدەرىس نىسانداردى ىسكە قوسۋ جانە ولاردى ودان ءارى پايدالانۋ كەزەڭدەرىن قامتيدى. سونىمەن قاتار قاۋىپسىزدىك، ەكولوگيالىق تۇراقتىلىق جانە تابيعي رەسۋرستاردى ءتيىمدى پايدالانۋ تالاپتارى ەسكەرىلگەن.

قازىرگى تاڭدا تاۋ شاڭعى تراسسالارىن جابدىقتاۋ بويىنشا اۋستريانىڭ مامانداندىرىلعان كومپانياسى باس مەردىگەر رەتىندە ايقىندالدى. اسپالى جول قۇرىلىسى اياقتالۋعا جاقىن. اقتاس پلاتوسىنا اپاراتىن اۆتوكولىك جولى سالىندى، تاۋ شاڭعىسى بەكەتتەرى مەن وزگە دە ينفراقۇرىلىم نىساندارى بويىنشا قۇرىلىس-مونتاج جۇمىستارى جۇرگىزىلۋدە.

بىلتىر Oi-Qaragai تاۋ كۋرورتىن جىلىتۋ قازاندىعىن گازبەن قامتاماسىز ەتۋ ماقساتىندا سىرتقى گاز قۇبىرىن سالۋ جوباسى اياقتالدى. ۇزىندىعى 5,9 شاقىرىم بولاتىن گاز قۇبىرى تارتىلىپ، نىسان شتاتتىق رەجيمدە جۇمىس ىستەپ تۇر. وسىلايشا كۋرورت جىلۋمەن جانە ىستىق سۋمەن ۇزدىكسىز قامتاماسىز ەتىلىپ وتىر.

جوبانى ءتيىمدى ۇيلەستىرىپ ىسكە اسىرۋ ماقساتىندا ينۆەستور، الماتى وبلىسىنىڭ اكىمدىگى جانە قر تۋريزم جانە سپورت مينيسترلىگى اراسىندا جول كارتاسى بەكىتىلىپ، ءتيىستى قۇجاتتارعا قول قويىلدى.

Oi-Qaragai جوباسىن جۇزەگە اسىرۋ ءوڭىردىڭ الەۋمەتتىك-ەكونوميكالىق دامۋىنا وڭ ىقپال ەتىپ، جاڭا جۇمىس ورىندارىن اشۋعا، تۋريستىك اعىندى ارتتىرۋعا، شاعىن جانە ورتا بيزنەستى دامىتۋعا، سالىق تۇسىمدەرىن كوبەيتۋگە، سونداي-اق حالىقارالىق دەڭگەيدە باسەكەگە قابىلەتتى تۋريستىك ءونىم قالىپتاستىرۋعا مۇمكىندىك بەرەدى.

Abai.kz