قىرعىز باسشىسى سادىر جاپاروۆتىڭ ەڭ سەنىمدى سەرىگى - قامشىبەك تاشيەۆ ەدى. سوورونباي جەەنبەكوۆتى بيلىكتەن كەتىرگەن قىرعىز توڭكەرىسىنەن كەيىن، ءدال وسى تاشيەۆتىڭ كومەگى تۇرمەدەگى جاپاروۆقا كوپ تيگەن. تاشيەۆتىڭ ارقاسىندا جاپاروۆ تۇرمەدەن شىعىپ، قىرعىز پرەزيدەنتى بولدى. وسىدان سوڭ، قامشىبەكتىڭ دە قولىنداعى قۇزىرەتى ۇلعايىپ، بيلىكتىڭ بىرنەشە تارماعانا باقىلاۋ جاساي باستاعان.

كۇنى بۇگىنگە دەيىن تاشيەۆ قىرعىزستان ۇلتتىق قاۋىپسىزدىك كوميتەتىنىڭ توراعاسى ءھام قىرعىزستاننىڭ ۆيتسە-پرەمەرى ەدى. ىقپالى ءتىپتى، جاپاروۆتىڭ وزىنەن اسىپ ءتۇستى. تالاستان نارىنعا، وش-باتكەننەن ىستىق كولگە دەيىن جۇرت جاپاروۆتان ەمەس، قامشىنىڭ قاھارىنان قايمىعاتىن

كەشە جاپاروۆ سول تاشيەۆتى بارلىق قىزمەتىنەن بوساتىپتى. ورنىنا جۇمعالبەك شابدانبەكوۆ دەگەن گەنەرالدى تاعايىنداپ ۇلگەرىپتى.

ەڭ قىزىعى - كەشە ءبىر توپ ازامات قىرعىزستاندا كەزەكتەن تىس پرەزيدەنتتىك سايلاۋ وتكىزۋ تۋرالى اشىق ۇسىنىس جاساعان. سودان بەرى جۇرت «قامشىبەك سايلاۋعا تۇسە مە؟» دەگەندى ىزۋ-قىزۋ تالقىلاپ جاتقان.

كەشەلى-بەرگى اۋىس-تۇيىسكە ناقتى وسى جاي سەبەپ بولدى ما، باسقاسى ما، بەلگىسىز. بىراق، شەكسىز بيلىك سوڭعى جىلدارى قامشى مەن سادىردىڭ اراسىنا سىزات تۇسىرە باستاعانى وتىرىك ەمەس.

سۋرەت: abai.kz سكرينى.

جاپاروۆ-تاشيەۆ تاندەمى بيلىككە كەلگەن تۇستا، قىرعىزدىڭ ساقا ساياساتكەرى ومىربەك تەكەباەۆ: «دوسسەكرەتاردان قۇتىلا المايسىز، جاپاروۆ مىرزا!», - دەپ مالىمدەمە جاساعان ەدى. بۇل 2020 جىل بولاتىن.

قىرعىزستاندا پرەزيدەنت پەن گكنب-نىڭ باسشىسى اراسىندا استىرتىن «كۇرەس»جۇرىپ جاتقانى وسىعان دەيىن دە جازىلعان.

بىلتىر «Intelligence Online» باسىلىمى: «پۋتين ءوزىنىڭ ارىپتەسى سادىر جاپاروۆتان گورى، قامشىبەك تاشيەۆپەن جۇمىس جاساعاندى قولاي كورەدى. قىرعىز ۇقق باستىعى قازىردىڭ وزىندە (دە-فاكتو) پرەزيدەنتتىڭ كولەڭكەسىندە ءجۇرىپ، بىرقاتار ستراتەگيالىق شەشىمدەردى باقىلاۋدا ۇستاپ وتىر. تاشيەۆ 2027 جىلعى پرەزيدەنتتىك سايلاۋدى نازاردان تىس قالدىرماي، بيلىك تەتىكتەرىنە ءوز باقىلاۋىن كۇشەيتۋدە»، - دەپ جازعان.

ول كەزدە جاپاروۆ تا، تاشيەۆ تە بۇل اڭگىمەنى تەرىستەپ، مالىمدەمەلەر جاساعان.

ال كەشەگى كەزەكتەن تىس سايلاۋ تۋرالى ۇسىنىستان كەيىن قىرعىز دەپۋتاتتارى دا: «تاشيەۆتىڭ سايلاۋعا ءتۇسۋ قۇقى بار»، - دەپ سويلەپ جاتتى...

نە دە بولسا، قامشىبەكتى بارلىق قىزمەتىنەن ءبىر كۇندە الۋ - بەكەردەن-بەكەر ەمەس...

Abai.kz