استانادا قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ توراعالىعىمەن قر ەڭبەك جانە حالىقتى الەۋمەتتىك قورعاۋ مينيسترلىگىنىڭ كەڭەيتىلگەن القا وتىرىسى ءوتتى.

ءىس-شاراعا قر ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆ، پارلامەنت دەپۋتاتتارى، ورتالىق جانە جەرگىلىكتى مەملەكەتتىك ورگاندار وكىلدەرى، مينيسترلىككە قاراستى ۇيىمدار، الەۋمەتتىك سەرىكتەستەر قاتىستى.

پرەمەر-ءمينيستردىڭ ورىنباسارى مەملەكەت باسشىسى الەۋمەتتىك سالاعا ەرەكشە كوڭىل بولەتىنىن اتاپ ءوتتى. ازاماتتاردىڭ جاعدايى مەن ەلدىڭ تۇراقتى دامۋى جاڭا كونستيتۋتسيا جوباسىنىڭ نەگىزگى وزەگىنە اينالعانى ايتىلدى.

وتىرىستا باستى ماسەلەلەردىڭ ءبىرى حالىقتى جۇمىسپەن قامتۋ تاقىرىبى بولدى. 2025 جىلدىڭ قورىتىندىسى بويىنشا ەلدە 2,9 ملن ساپالى جۇمىس ورنى ساقتالدى. 2026 جىلى وڭىرلىك جۇمىسپەن قامتۋ كارتالارى اياسىندا 547,7 مىڭ ادامدى جۇمىسقا ورنالاستىرۋ جوسپارلانىپ وتىر.

جيىندا جۇمىس ورنىنداعى ادام قاۋىپسىزدىگى مەن قورعالۋى دا قارالدى. «تسيفرلاندىرۋ جاعدايىندا ىڭعايلى ءارى تۇسىنىكتى كوممۋنيكاتسيا قۇرالدارىن ەنگىزۋ ماڭىزدى»، – دەپ ەسەپتەيدى ايدا بالاەۆا.

سونىمەن قاتار، تاراپتاردىڭ كەپىلدىكتەرىن، قۇقىقتارى مەن مىندەتتەرىن ايقىندايتىن ەڭبەك شارتىن ازىرلەۋ تاپسىرىلدى.

ۆەدومستۆونىڭ باسىم مىندەتتەرىنىڭ ءبىرى – مۇگەدەكتىگى بار ادامداردى كەشەندى الەۋمەتتىك قورعاۋ. ولاردى جۇمىسپەن قامتۋ تاسىلدەرىن جەتىلدىرۋ، تەحنيكالىق قاجەت قۇرالدارىمەن قامتاماسىز ەتۋ جانە ينفراقۇرىلىم نىساندارىنىڭ قولجەتىمدىلىگىن ارتتىرۋ ماسەلەلەرى وزەكتى ەكەنى ايتىلدى. سونداي-اق، مۇگەدەكتىگى بار بالالاردى دامىتۋ مەن الەۋمەتتەندىرۋگە ەرەكشە نازار اۋدارىلدى.

مۇگەدەكتىكتى تاعايىنداۋ ءراسىمىنىڭ اشىقتىعىن قامتاماسىز ەتۋ ماقساتىندا پرەمەر-ءمينيستردىڭ ورىنباسارى دەنساۋلىق ساقتاۋ مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتتىق جۇيەلەرىن بىرىكتىرۋدى تاپسىردى. مەملەكەت باسشىسى جاريالاعان «تسيفرلاندىرۋ جانە جاساندى ينتەللەكت جىلى» اياسىندا مينيسترلىك الدىندا الەۋمەتتىك-ەڭبەك سالاسىن تەحنولوگيالىق تۇرعىدا جاڭعىرتۋ بويىنشا اۋقىمدى مىندەت تۇرعانى ءسوز ەتىلدى.

وتىرىستا مينيستر اسقاربەك ەرتاەۆ بايانداما جاساپ، ۆەدومستۆو جۇمىسىنىڭ ناتيجەلەرىن قورىتىندىلاپ، الداعى كەزەڭگە ارنالعان نەگىزگى مىندەتتەردى بەلگىلەدى.

Abai.kz