سەمەيدىڭ «ەلىماي» فۋتبول كلۋبى 2026 جىلدىڭ ناۋرىز ايىنىڭ سوڭىنا دەيىن بارلىق قارجىلىق تۇيتكىلدەرىن رەتتەپ ۇلگەرمەسە، UEFA كلۋبتى 2026–2027 ماۋسىمىنداعى كونفەرەنتسيالار ليگاسىنا قاتىسۋدان شەتتەتۋى ىقتيمال. ينۆەستور بولادى دەپ كۇتىلىپ وتىرعان KAZ Minerals ءبىر ايدىڭ ىشىندە كلۋبتىڭ قارجىلىق پروبلەماسىن شەشىپ ۇلگەرە مە؟

ماسەلەنىڭ وزەگى مىنادا. KAZ Minerals ەڭ الدىمەن كلۋبتىڭ قارىز جۇكتەمەسىنىڭ ناقتى كولەمىن ءتۇسىنىپ، مۇقيات اۋديت جۇرگىزۋى كەرەك. ال اۋديت ءجاي ءراسىم ەمەس. ول ۋاقىت پەن دالدىكتى تالاپ ەتەتىن پروتسەسس. بىراق «ەلىمايدا» وعان ۋاقىت جوق. ءدال وسى كەزدە تاريحى تەرەڭ كلۋبتى وسىنداي جاعدايعا كىم دۋشار قىلدى دەگەن سۇراق تۋىندايدى. جانە وسى باسسىزدىققا كىم جاۋاپ بەرەدى؟

«ەلىمايدىڭ» وتكەن جىلدارى قوردالانىپ قالعان قارىزدارىن جابۋ ءۇشىن ەلدەگى ەڭ ءىرى مىس ءوندىرۋشى كومپانيامەن شۇعىل كەلىسسوز جۇرگىزىپ جاتقانى تۋرالى العاش بولىپ ASnews.kz جازدى. باسىلىم جۋرناليستەرىنىڭ مالىمەتىنشە، الەۋەتتى ينۆەستورلار قازاقستان فۋتبول فەدەراتسياسىنىڭ باسشىلىعىمەن كەزدەسۋ وتكىزگەن. قويىلعان نەگىزگى شارتتاردىڭ ءبىرى – كلۋبتى قارىزسىز كۇيدە تولىق مەنشىككە بەرۋ. ياعني بارلىق بەرەشەك 2026 جىلدىڭ ناۋرىز ايىنىڭ سوڭىنا دەيىن جابىلۋى ءتيىس. سوعان سايكەس «ەلىماي» باسشىلىعىندا ەلەۋلى كادرلىق وزگەرىستەر بولۋى ىقتيمال.

كلۋبتىڭ كۋراتورى ءارى ديرەكتورلار كەڭەسىنىڭ مۇشەسى اسقار ۇرانحاەۆ قىزمەتىنەن كەتە مە، ازىرگە بەلگىسىز. الايدا باسقارۋ قۇرامى جاڭاراتىن بولسا، قفف تاراپىنان دا، جاڭا ينۆەستورلار تاراپىنان دا ەڭ الدىمەن وسى تۇلعاعا سۇراقتار تۋىنداۋى مۇمكىن. ويتكەنى ۇرانحاەۆ 2022–2023 جىلدارى ءجيى ايتقان «ترانسفورماتسيا» ۇرانى تۇپتەپ كەلگەندە كلۋب شارۋاشىلىعىن توزدىرىپ جىبەرگەنى بايقالادى.

ۇرانحاەۆتىڭ ءوزى جاريا تۇردە مالىمدەگەندەي، ترانسفورماتسيا اياسىندا ونىڭ جۇمىسىنا باپكەرلەر شتابىن شاقىرۋ (اندرەي كارپوۆيچ), ترانسفەرلىك ساياسات جانە سەمەيدەگى ينفراقۇرىلىمدى جاڭعىرتۋ كىرگەن. بىراق بۇگىنگى قارىز تۋرالى اقپارات سول «ستراتەگيالىق دامۋدىڭ» ساپاسىن كورسەتەتىن ناقتى ينديكاتور. كلۋب مەنەدجمەنتى قالتاسى كوتەرمەيتىن كەلىسىمشارتتارعا قول قويىپ، «كەيىن جاڭا قارجى كوزدەرى تابىلار» دەگەن ۇمىتكە سۇيەنگەن سىڭايلى. بىراق KAZ Minerals وبلىستىق بيۋدجەت ەمەس. قاراجاتتى ەسەپپەن جۇمسايتىن ينۆەستور وزگەنىڭ قاتەلىگى ءۇشىن اقشا تولەۋگە قۇلىقسىز.

جاڭا ينۆەستورلاردىڭ كلۋبتىڭ قازىرگى باسشىلىعىن اينالىپ ءوتىپ، قازاقستان فۋتبول فەدەراتسياسىمەن تىكەلەي كەلىسسوز جۇرگىزۋى دە كوپ نارسەنى اڭعارتادى. دەمەك قازىرگى فۋنكتسيونەرلەرگە ەش سەنىم جوق. KAZ Minerals «ەلىماي» كلۋبىنا ينۆەستور بولعان جاعدايدا ونى تولىق مەنشىككە الۋدى سۇراپ وتىر. وندا بىردەن ەسكى ادامداردىڭ بارلىعىنان قۇتىلادى.

اباي وبلىسىنىڭ اكىمدىگى ساياسي جىگەر تانىتىپ، سەمەيگە ۇلكەن فۋتبولدى قايتا ورالتتى. الايدا «ەلىماي» كلۋبىنىڭ مەنەدجمەنتى اباي ءوڭىرىن وسى اق ارماننان ايىرايىن دەپ تۇر. «ەلىماي» اق ديرەكتورلار كەڭەسى ناقتى تابىسى بولماي تۇرىپ، ءتۇرلى شىعىندارعا جول بەرىپ، ەندى تسەيتنوت جاعدايىن تۋعىزىپ وتىر. ەگەر ناۋرىزدىڭ اياعىنا دەيىن قارىزدارى جابىلماسا، UEFA-نىڭ قارجىلىق fair play تالاپتارىنا ىلىككەن «ەلىماي» ءبىر دە ءبىر ماتچ وتكىزبەي كونفەرەنتسيا ليگاسىمەن قوش ايتىسپاق.

Abai.kz