قازاق وپەرا ونەرىنىڭ التىن قورىنا ەنگەن «اباي» وپەراسى – ۇلتتىق مۋزىكا مەن درامانىڭ ۇشتاسۋىنىڭ بيىك ۇلگىسى سانالاتىن ساحنالىق تۋىندى.

فارحاد مولداعالي قويعان بۇل نۇسقا كلاسسيكالىق مۇراعا زاماناۋي كوزقاراستا قاراۋ دەپ ايتا الامىز. قويىلىمنىڭ تۇساۋكەسەرى دەگەنمەن، رەجيسسەردىڭ كلاسسيكالىق شەشىمدەردەن الىستاماعاندىعىن ايتا كەتكەن ءجون. رەجيسسەرلىك شەشىمدەردە ا. جۇبانوۆ پەن ل. حاميدي اۆتورلىعىنداعى ليبرەتتونى ساقتاي وتىرىپ، يدەيالىق مازمۇن قازىرگى زامانعى الەۋمەتتىك كورىنىستە سۋرەتتەلەدى. رەجيسسەر سپەكتاكلدە ءبىز بىلەتىن ابايدى تاريحي بەينەدە عانا ەمەس، ونى قوعامدىق قايشىلىقتارمەن بەتپە-بەت كەلگەن ويشىل تۇلعا رەتىندە كورسەتۋگە تىرىسقان. ياعني، ءبىز ساحنادان قوعامداعى ادىلەتسىزدىككە قارسى تۇرۋدا رۋحاني جالعىزدىقتى سەزىنگەن ابايدى كورەمىز.

الايدا قويىلىمدا باستى نازار ۇلى اقىنعا تۇسە قويماعان. رەجيسسەر ينتەرپرەتاتسياسىندا اقىن بەينەسىن ساحنالىق قيمىل، جارىق شەشىمدەرى مەن سيمۆولدىق ميزانستسەنالار ارقىلى كۇشەيتەدى. ابايدى قازاقستاننىڭ حالىق ءارتىسى تالعات كۇزەمباەۆ سومدادى. ناتيجەسىندە كورەرمەن اباي ءومىر سۇرگەن تاريحي كەزەڭدى عانا ەمەس، بۇگىنگى كۇنمەن ۇندەس رۋحاني ماسەلەلەردى اتموسفەرا ارقىلى سەزىنە الدى.

ف. مولداعالي ءداستۇرلى ەتنوگرافيالىق دەكوراتسيا ەلەمەنتتەرىن از قولدانۋ ارقىلى سپەكتاكلدى تاريحي سيپاتتان الىستاتىپ، فيلوسوفيالىق مازمۇندا كورسەتكەن. دەكوراتسيادان گورى اكتەرلىك ويىن مەن مۋزىكالىق ەكسپرەسسياعا ءمان بەرگەن. سپەكتاكلدە جارىق پەن كولەڭكەنىڭ وڭتايلى تاسىلدە تۇسۋىنە بايلانىستى كەيىپكەرلەردىڭ پسيحولوگيالىق كۇيى ساحنادان انىق كورىنىپ وتىردى. جالپى، وپەرانىڭ مۋزىكالىق كۇيى ءبىزدىڭ ۇلتتىق ناقىشىمىزعا ساي. قازاقتىڭ ءداستۇرلى اۋەندىك قىرى ەۋروپالىق وپەرا فورماسىمەن ۇيلەستىرىلگەن. بۇل جولدا باس ديريجەر نۇرجان بايبۋسينوۆ باستاۋىنداعى سيمفونيالىق وركەستردىڭ جۇمىسىن ەرەكشە اتاپ وتكەنىمىز ءجون. حور مەن سوليست شىعارمانىڭ فيلوسوفيالىق تەرەڭدىگىن باسا كورسەتە وتىرىپ، ءبىرتۇتاس دىبىستىق كەڭىستىكتە بەرىپ وتىردى. سۋرەتشى ەسەنگەلدى تۇياقوۆ قازىرگى زامانداعى قازاق دالاسىنىڭ جەرىن زاماناۋي تەحنولوگيالاردىڭ كومەگىمەن سيمۆولدىق دەكوراتسيا ارقىلى سۋرەتتەگەن.

وسىعان دەيىن بەلگىلى وپەرانى يتاليالىق رەجيسسەر دجانكارلو دەل موناكو تەرەڭدە جاتقان قازاق حالقىنىڭ تاريحىمەن تانىسا وتىرىپ ساحنالاعان بولاتىن. ادەتتە شىعارماعا تىڭ وزگەرىستەر ارقىلى ساحنالايتىن رەجيسسەر بۇل جولى اسا قاتتى جاڭاشىلدىق ەنگىزە قويماعان. دەگەنمەن، قازاق قاۋىمىنىڭ كورەرمەنى قاشاندا اقىن ابايدىڭ بەينەسىن زامان تىنىسىنا ساي تاماشالاۋدان باس تارتپايدى.

دينارا ساعىنعاليەۆا،

تەمىربەك جۇرگەنوۆ اتىنداعى قازاق ۇلتتىق  ونەر اكادەمياسىنىڭ ستۋدەنتى

Abai.kz