حالىقارالىق كونكيشىلەر وداعى (ISU) يتالياداعى وليمپيادا ويىندارىندا مانەرلەپ سىرعاناۋدان تورەلىك ەتكەن قازاقستاندىق سۋديا نادەجدا پارەتسكاياعا رەسمي حات جولدادى. 

بۇل تۋرالى قازاقستاننىڭ مانەرلەپ سىرعاناۋ وداعى مالىمدەدى.

ءوز حاتىندا ISU قازاقستاندىق تورەشىگە العىس ءبىلدىرىپ، ونىڭ جۇمىسىنا قاتىستى ايتىلعان «oبەكتيۆتى ەمەس» دەگەن ايىپتاۋلارعا قاتىستى تۇسىنىكتەمە بەردى:

"ISU سىزگە ميلان-كورتيناداعى 2026 جىلعى قىسقى وليمپيادا ويىندارىندا ەرلەر مەن ايەلدەر اراسىنداعى جەكەلەي سىرعاناۋ جارىستارىندا سۋديا رەتىندە اتقارعان جۇمىسىڭىز ءۇشىن العىس ايتادى. ISU ويىندارداعى ءسىزدىڭ تورەلىگىڭىز ۇيىم ەرەجەلەرىنە سايكەس بولعانىن، بەيتاراپ جانە ۇلتتىق مۇددەدەن ادا ەكەنىن ريزاشىلىقپەن اتاپ وتەدى. مانەرلەپ سىرعاناۋدىڭ تۇتاستىعىن ساقتاۋ جانە ونى ءادىل دە قۇرمەتتى سپورت ءتۇرى رەتىندە قالدىرۋ ءۇشىن ISU تورەشىلەردەن ءدال وسىنى تالاپ ەتەدى.

ISU قازاقستانداعى ءباسپاسوز وكىلدەرى مەن قوعام تاراپىنان قىسقى وليمپيادا ويىندارىنداعى تورەلىگىڭىزگە بايلانىستى سىزگە قاتىستى جاسالعان كەز كەلگەن قۋدالاۋ ارەكەتتەرىن قاتاڭ ايىپتايدى", - دەپ جازعان وداقتىڭ مانەرلەپ سىرعاناۋداعى ادالدىقتى قامتاماسىز ەتۋ ءبولىمىنىڭ باسشىسى رەبەككا كەرنس.

ايتا كەتەيىك، ميلاندا وتكەن 2026 جىلعى وليمپيادادا قازاقستاندىق تورەشى نادەجدا پارەتسكايا كوپشىلىكتىڭ تالقىلاۋىنىڭ ورتاسىندا قالعان بولاتىن.  جانكۇيەرلەر ونىڭ ەركىن باعدارلامادا رەسەيلىك ادەليا پەتروسيانعا بارىنشا جوعارى ۇپاي قويىپ، ال قازاقستاندىق مانەرلەپ سىرعاناۋشىلاردىڭ ونەرىنە تىم سىن كوزبەن (قاتال) قاراعانىنا نازار اۋدارعان ەدى.

Abai.kz