بۇگىن مەملەكەتتىك قىزمەت ىستەرى اگەنتتىگىندە 2025 جىلدىڭ ناتيجەلەرى بويىنشا اگەنتتىكتىڭ كەڭەيتىلگەن القا وتىرىسى ءوتتى. بۇل تۋرالى اگەنتتىكتىڭ ءباسپاسوز قىزمەتى ءمالىم ەتتى. 

ءىس-شاراعا پرەزيدەنت اكىمشىلىگىنىڭ وكىلدەرى، پارلامەنت ءماجىلىسىنىڭ دەپۋتاتتارى، ۇلتتىق قاۋىپسىزدىك كوميتەتى باسشىلىعى، پرەزيدەنت جانىنداعى مەملەكەتتىك باسقارۋ اكادەمياسى، اگەنتتىك جانىنداعى قوعامدىق كەڭەس، ادەپ جونىندەگى كوميسسيا، بيۋروكراتيادان ارىلتۋ جانە سىبايلاس جەمقورلىققا قارسى ساياساتتى ىسكە اسىرۋ جونىندەگى كونسۋلتاتيۆتىك-ساراپتامالىقتوپ مۇشەلەرى، سونداي-اق اگەنتتىكتىڭ اۋماقتىق بولىمشەلەرى مەن مەملەكەتتىك باسقارۋ اكادەمياسىنىڭ فيليالدارى ونلاين قاتىستى.

القا وتىرىسىندا اگەنتتىك توراعاسى دارحان جازىقباي 2025 جىل مەملەكەتتىك قىزمەت جۇيەسى ينستيتۋتسيونالدىق تۇرعىدان جاڭعىرتىلعان جىل بولعانىن اتاپ ءوتتى.

— 2025 جىلى مەملەكەتتىك قىزمەتتى دامىتۋدىڭ 2024-2029 جىلدارعا ارنالعان تۇجىرىمداماسىن جۇزەگە اسىرۋ ماقساتىندا «قازاقستان رەسپۋبليكاسىنىڭ مەملەكەتتىك قىزمەتى تۋرالى» جاڭا زاڭ جوباسى ازىرلەنىپ، جەلتوقسان ايىندا پارلامەنت ءماجىلىسىنىڭ قاراۋىنا ەنگىزىلدى. بۇل جاڭا زاڭ جوباسى قازىرگىدەي تەك ەڭبەك قاتىناستارىن ياعني، مەملەكەتتىك قىزمەتكە كىرۋ، وتكەرۋ جانە ونى توقتاتۋ ماسەلەلەرىن رەتتەۋمەن شەكتەلمەي، ەڭ باستىسى مەملەكەتتىك قىزمەتشىلەردىڭ مىنەز-قۇلقىنىڭ ادامعا باعدارلانعان ۇلگىسىن بەكىتۋدى كوزدەيدى، — دەلىنگەن حابارلامادا.

وتكەن جىلى پرەزيدەنتتىك جاستار كادر رەزەرۆىنە ءتورتىنشى ىرىكتەۋ كەزەڭى وتكىزىلدى. ناتيجەسىندە رەزەرۆ 6 باعىت بويىنشا 50 سالالىق بىلىكتى مامانمەن تولىقتى. جوباعا قىزىعۋشىلىق ارتىپ كەلەدى. ەگەر 2019 جىلى 13 مىڭ ازامات قاتىسۋعا نيەت بىلدىرسە، 2025 جىلى بۇل كورسەتكىش 32 مىڭعا جەتتى. جالپى رەزەرۆكە الىنعان 450 ازاماتتىڭ 337-ءسى بۇگىندە ءتۇرلى سالالاردا ەڭبەك ەتىپ ءجۇر.

وڭىرلىك كادر رەزەرۆتەرى دە ناقتى ناتيجە كورسەتتى. 538 رەزەرۆشىنىڭ 260-ى جاڭا لاۋازىمدارعا تاعايىندالىپ، ولاردىڭ 193-ءى جەرگىلىكتى اتقارۋشى ورگانداردا باسشىلىق قىزمەتكە ورنالاستى.

سونىمەن قاتار، تالانتتاردى تارتۋدىڭ وزگە دە تەتىكتەرى قولدانىلىپ جاتىر. 735 ۇزدىك تۇلەك (GPA 3,33-تەن تومەن ەمەس) كونكۋرستان تىس اۋىلدىق جانە اۋداندىق دەڭگەيدەگى لاۋازىمدارعا قابىلداندى. اگەنتتىك 964 جوعارى لاۋازىمعا كونكۋرسسىز تاعايىنداۋدى كەلىسىپ، ولاردىڭ 19,5%-ى كۆازيمەملەكەتتىك جانە جەكە سەكتور وكىلدەرى بولدى.

— بىلتىر مەملەكەتتىك قىزمەتكە ىرىكتەۋ جانە كادرلاردى باسقارۋ تولىقتاي تسيفرلاندىرىلدى. بۇگىندە ونلاين ىرىكتەۋ 94 مەملەكەتتىك ورگاندى قامتىپ وتىر. تسيفرلىق ىرىكتەۋدىڭ تيىمدىلىگىنىڭ ناتيجەسىندە ورتا ەسەپپەن ءبىر بوس ورىنعا 7 ۇمىتكەردەن كەلىپ، باسەكەلەستىك 3,5 ەسەگە ارتتى، — دەپ حابارلادى اگەنتتىكتەن.

«E-قىزمەت» جۇيەسىنىڭ تاجىريبەسى حالىقارالىق دەڭگەيدە جوعارى باعالانىپ، مەملەكەتتىك سەكتورداعى ۇزدىك يننوۆاتسيالىق تاجىريبە رەتىندە تانىلدى. قازاقستاننىڭ «E-قىزمەت» — پەرسونالدى باسقارۋدىڭ ىقپالداستىرىلعان اقپاراتتىق جۇيەسى ەكونوميكالىق ىنتىماقتاستىق پەن دامۋ ۇيىمىنىڭ حالىقارالىق OPSI پلاتفورماسىندا يننوۆاتسيالىق جوبا رەتىندە جاريالاندى. بۇل ەلىمىزدىڭ مەملەكەتتىك قىزمەتتەگى پەرسونالدى باسقارۋدى تسيفرلاندىرۋداعى جەتىستىگىنىڭ حالىقارالىق دەڭگەيدە مويىندالۋىن بىلدىرەدى. OPSI پلاتفورماسى ارقىلى قازاقستاننىڭ تاجىريبەسى وزگە ەلدەرگە ۇتىمدى تاجىريبە رەتىندە ۇسىنىلادى. قازىرگى تاڭدا بىرقاتار مەملەكەتتەر قازاقستاندىق مودەلگە قىزىعۋشىلىق تانىتىپ وتىر.

2025 جىلى «بىرىڭعاي كادرلىق جۇيە» ارقىلى بيۋدجەتتىك ۇيىمدارداعى كادرلىق ءىس جۇرگىزۋ تولىق اۆتوماتتاندىرىلدى. جوسپارلانعان 2,4 مىڭ ۇيىمنىڭ ورنىنا 2,9 مىڭ ۇيىم جۇيەگە قوسىلدى. 482 مىڭ قىزمەتكەردىڭ تسيفرلىق ءپروفيلى قالىپتاستىرىلدى. پرواكتيۆتى باقىلاۋ تەتىكتەرى ەنگىزىلىپ، مۇددەلەر قاقتىعىسىن اۆتوماتتى تۇردە انىقتاۋ مۇمكىندىگى ىسكە قوسىلدى.

جاساندى ينتەللەكت قۇرالدارىن ەنگىزۋ جانە مەملەكەتتىك قىزمەتشىلەردى وقىتۋ جۇمىستارى جالعاستى. مەملەكەتتىك باسقارۋ اكادەمياسىندا «تسيفرلىق مەملەكەتتىك باسقارۋ» ماگيسترلىك باعدارلاماسى ىسكە قوسىلدى. «AI Qyzmet» باعدارلاماسى بويىنشا 52 مىڭنان استام اكىمشىلىك قىزمەتشى وقىتىلدى، ال «AI Governance 500» باعدارلاماسى اياسىندا 100 ساياسي قىزمەتشى ءبىلىم الدى.

مەملەكەتتىك قىزمەت كورسەتۋ سالاسىندا سەرۆيستىك جانە كليەنتكە باعدارلانعان مودەل نىعايتىلدى. قاشىقتىقتان مونيتورينگ ناتيجەسىندە 2 600-دەن استام ازاماتتىڭ قۇقىعى پرواكتيۆتى تۇردە قالپىنا كەلتىرىلدى.

مەملەكەتتىك قىزمەتشىلەردىڭ قۇقىقتارىن قورعاۋ جانە ادەپ نورمالارىن ساقتاۋ ماسەلەسىنە ەرەكشە نازار اۋدارىلدى. 2025 جىلى 19 007 بۇزۋشىلىق انىقتالدى. پروفيلاكتيكالىق جۇمىستار اياسىندا 28 مىڭنان استام ءىس-شارا وتكىزىلدى.

مەملەكەتتىك اپپاراتتى بيۋروكراتيادان ارىلتۋ جۇمىستارى شەڭبەرىندە 1 335 ۇسىنىس ازىرلەنىپ، ونىڭ 406-سى ىسكە اسىرىلدى. جۇرگىزىلگەن تالداۋلار ناتيجەسىندە ميللياردتاعان تەڭگە كولەمىندەگى تاۋەكەلدەردىڭ الدىن الۋ شارالارى قابىلداندى.

جيىن سوڭىندا اگەنتتىك توراعاسى 2025 جىلى كادرلىق ىرىكتەۋ جۇيەسى جاڭعىرتىلعانىن، تسيفرلىق ەكوجۇيە قۇرىلعانىن، جاساندى ينتەللەكت ەنگىزىلگەنىن جانە پرواكتيۆتى باقىلاۋ مودەلى قالىپتاسقانىن اتاپ ءوتتى. الداعى كەزەڭدە مەملەكەتتىك قىزمەتتىڭ ءتيىمدى، اشىق جانە ناتيجەگە باعدارلانعان مودەلىن ودان ءارى دامىتۋ جۇمىستارى جالعاسادى.

Abai.kz