قازاقستان قىتايدىڭ اتموسفەرالىق اۋا ساپاسىن باسقارۋ ءادىسىن قولدانۋ مۇمكىندىگىن زەردەلەپ جاتىر. بۇل جايىندا ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ءبىرىنشى ورىنباسارى رومان سكلياردىڭ جاۋابىندا ايتىلعان.

- وسى جىلدىڭ 12 اقپانىندا ەكولوگيا جانە تابيعي رەسۋرستار ءمينيسترىنىڭ توراعالىعىمەن وبلىستاردىڭ، رەسپۋبليكالىق ماڭىزى بار قالالاردىڭ جانە ەلوردانىڭ اكىمدەرىنىڭ قاتىسۋىمەن تۇراقتى دامۋ ماقساتتارىنا قول جەتكىزۋ تۇرعىسىندا قىتاي حالىق رەسپۋبليكاسىنىڭ تاجىريبەسىندە اتموسفەرالىق اۋا ساپاسىن باسقارۋ جۇيەسى بويىنشا كەڭەس ءوتتى. قىتايدا جۇزەگە اسىرىلعان كەشەندى، عىلىمي نەگىزدەلگەن جانە جۇيەلى ءادىس جوعارى تيىمدىلىگىن كورسەتتى. وسىعان وراي قازىرگى ۋاقىتتا اتالعان ءادىستى قازاقستاندا قولدانۋ مۇمكىندىگى زەردەلەنىپ جاتىر، - دەدى رومان سكليار.

ونىڭ اتاپ وتۋىنشە، ەكولوگيا كودەكسىنىڭ 206-بابىنا سايكەس، ءماسليحاتتار قورشاعان ورتانى قورعاۋ سالاسىنداعى وكىلەتتى ورگاننىڭ كەلىسىمىمەن بەلگىلى ءبىر اۋماق شەگىندە اتموسفەرالىق اۋانى قورعاۋ بويىنشا ارناۋلى ەكولوگيالىق تالاپ بەكىتۋگە قۇقىلى.

- قازىرگى ۋاقىتتا مينيسترلىك ءوڭىردىڭ (شىعىس قازاقستان وبلىسى) ەكولوگيالىق احۋالىن جاقسارتۋ ءۇشىن جەدەل، ورتا جانە ۇزاق مەرزىمدى ءىس-شارالار كەشەنىن ازىرلەدى. ول 2026-2028 جىلدارعا ارنالعان اتموسفەرالىق اۋانى قورعاۋ بويىنشا باعدارلاما ازىرلەۋ بارىسىندا ەسەپكە الۋ ءۇشىن اكىمدىككە جىبەرىلدى. جالپى، وسكەمەن قالاسىنىڭ ەكولوگيالىق احۋالىن جاقسارتۋ ماسەلەسى مينيسترلىك پەن شىعىس قازاقستان وبلىسى اكىمدىگىنىڭ باقىلاۋىندا تۇر جانە جۇمىس جالعاسادى، - دەدى رومان سكليار.

Abai.kz